Dzindzimo 112 - Bhibhiliya Nya Guage

Gutumbega ga muthu nya gululame

¹ Aleluya! Dhumisani Pfhumu Nungungulu! Kategide muthu a thavago Pfhumu Nungungulu! A golago gu landrisa milayo yaye.

² Livelego laye li na tala khu tshivba tigoni, wu na kategiswa melego wa va nya gululama.

³ Nyumbani gwaye gu na tala khu dzithomba ni gufuma gululama gwaye gu ngu simama kala gupindruga.

⁴ Wenengedzo wu ngu wenengedza gidemani ga muthu nya gululame; uye a na ni wuhigo, wuhindzi ni gululama.

⁵ Kategide muthu a pwelago wuhindzi a lombisa; a gimbidzisago silo saye khu gululama.

⁶ Kholu uye gima kha na thega vbavbatshi; muthu nya gululame a na alakanywa kala gupindruga.

⁷ Uye kha na thava mahungu nya guvivbe, kholu monyo waye wu tiyide wu ngu tumba Pfhumu Nungungulu.

⁸ Monyo waye, wu tiyide, kha thavi gilo, a ngu tumba gukhuye valala vaye va na padwa.

⁹ A ngu kabana silo saye ni sisiwana; gululama gwaye gu ngu simama kala gupindruga, tshivba yaye yi na khusedzwa khu wudhumo.

¹⁰ Muthu nya guvivbe a gu wona esi a napwa wuvi; a tala khu lidiwo ni guvbisega, a khukhurusa magwaha; aholu mapimo yaye ma na hegisa khu gu fuva.