Dzindzimo 111 - Bhibhiliya Nya Guage

Mithumo nya gusamadzise ya Nungungulu

¹ Aleluya! Dhumisani Pfhumu Nungungulu! Nyi na rungudza Pfhumu Nungungulu khu monyo wangu watshavbo, vbakari nya tshangano wa va nya gululama.

² Sigiro sa Pfhumu Nungungulu sikhongolo, si ngu tsakisa vatshavbo va si vbwetago.

³ Thumo waye khwa wuzundzo ni wugulu, gululama gwaye gu ngu simama kala gupindruga.

⁴ Giride gukhuye siliwugiso saye si na alakanywe; Pfhumu Nungungulu a na ni wuhindzi gambe tade khu wuwadi.

⁵ A ngu hodzisa avo va mu ningago githawo; gikhati gyatshavbo a na alakanya gidzumeledzwano gyaye!

⁶ Yeyedzide vathu vaye tshivba ni mithumo yaye, a va ninga thomba ya va nya mayigo.

⁷ Mithumo nya mandza yaye khya gutumbega ni lisine, sileletelo saye satshavbo si tiyide.

⁸ Kholu a si tiyiside kala gupindruga; a si giride khu gutumbega ni gululama.

⁹ Uye dzegiside vathu vaye; a gira navo gidzumeledzwano nya gupindruge; lina laye li agide li ngu thavisega.

¹⁰ Guti nya gukhongolo khu gu thava Pfhumu Nungungulu; avo va mu rungudzago va na ni mapimo. Rungudzo waye wu ngu simama kala gupindruga.