Dzindzimo 105 - Bhibhiliya Nya Guage

Nungungulu kha digi vathu vaye

¹ Bongani Pfhumu Nungungulu, lombani khu lina laye, tivisani mithumo yaye mayigoni gwatshavbo.

² Embelelani dzindzimo nya gu Mu dhumise, mu pwadze sigiro saye satshavbo a giridego nya guliwugise!

³ Dhumisani lina laye nya gukatege; va na tsake avo va vbwetago Pfhumu Nungungulu.

⁴ Vbwetani Pfhumu Nungungulu ni tshivba yaye; mu vbweta khovbe yaye gikhati gyatshavbo.

⁵ Alakanyani mithumo yaye nya gusamadzise a giridego, ni siliwugiso saye ni gulamula gu dugago khu kanani gwaye,

⁶ enu situgulwana sa Abrahama, githumi gyaye, ni enu sanana sa Jakobe, gihathwa gaye.

⁷ Uye khuye Pfhumu Nungungulu wathu; Uye a ngu fuma tigoni gwatshavbo.

⁸ Uye a na alakanya pwanano waye kala gupindruga, a tadzisa situmbiso saye ga mazanazana nya situgulwana.

⁹ A na tadzisa pwanano a hungidego ni Abrahama, ni gitumbiso a sambanyidego ga Isaki.

¹⁰ A si tiyiside si khala nayo ga Jakobe, si khala pwanano ga Israyeli kala gupindruga.

¹¹ Avbo a nga khuye: “Nyi na gu ninga litigo la Khanani, li na lumba uwe kala gupindruga.”

¹² Gikhati gyogyo va na Israyeli va di ngari vadugwana, va di si tisegi, gambe va diri valuveli umo;

¹³ Va di gu legalega khu litigo ni litigo, va duga ga owu mufumo va bela ga wumbe.

¹⁴ Kha dzumedzisa gukhuye va saniswa khu muthu, khu lihaladzo a nga bani ari nalo navo, a di kawuka dzipfhumu a ganela, khuye:

¹⁵ “Mu nga khuhi sihathwa sangu, mu nga tshanisini vaprofeti vangu!”

¹⁶ A di gira yi manega ndzala tigoni mule, a diga vathu nyambana guhodza.

¹⁷ Aholu, a di rumela mbeli gwawe Josefa, va nga mu rengisago a girwa khumbi.

¹⁸ Va mu manyide mawundru khu sikete, va mu hunga thamoni khu makhetshe,

¹⁹ kala gutadzisega magana yaye, mahungu ya Pfhumu Nungungulu ma di mu linga.

²⁰ Mufumeli wa Egipito a di ruma gukhuye va mu tshula; mukhozisi nya mayigo a di mu tulela lipaso.

²¹ A di mu vega kha nga muthangeli nya ndranga yaye, a mu gira musayisi nya dzithomba dzaye dzatshavbo,

²² ningidwe tshivba nya gurume dzindruna nya mufumo, ni gu hevbudza guti madhota yawe.

²³ Khavbo Israyeli, a gu Jakobe, a nga relela tigoni ga Egipito, aya khala muluveli vbakari nya sanana sa Kami.

²⁴ Pfhumu Nungungulu a di andrisa tengo nya vathu vaye, a va ninga tshivba guvbindra valala vawe.

²⁵ A di vbindrugedza myonyo nya Vagipiti, va vengela vathu vaye, gasi va fume vathu vaye khu dzihanyi nya dzikhongolo.

²⁶ A di rumela githumi gyaye Mosi, ni Aroni a nga va hathago.

²⁷ Va di wonegisa siliwugiso saye vbakari gwawe, va gira sisamadziso tigoni ga Kami.

²⁸ Nungungulu a di rumela gidema nya gikhongolo, gi nga fenengedza litigo latshavbo; aholu Vagipiti kha va dzina gu yingisa magana yaye.

²⁹ A di vbindrugedza mati nya mitsongo ma khala novba, a songa dzindzandzi dzatshavbo.

³⁰ A di tadza litigo lawe khu vanyakhele, va nga belago ni makhuvini ga vafumeli vawe.

³¹ Pfhumu Nungungulu a di ganela, gu duga talo nya mabhawa ni dzitshuwane dzi nga tadza litigo lawe latshavbo.

³² Wulangani nya ndzadzi, a di va rumela maralala, ni malavbelavbe nya nilo tigoni gwawe.

³³ A di songa misimbo nya mikandzu ni miguhu; a fanyeledzela misimbo yawe yi guromo mivbinganoni.

³⁴ A di ganela, dzi duga dzimbera, yi vboha mbasa nya gutale nyamba saywa.

³⁵ Mbasa yi di hodza misimbo ni mwasi watshavbo wa khabini, yi gu vbedza mihandro yatshavbo ya mahangeni.

³⁶ A di songa gambe sanana sawe satshavbo nya matiwula, gyanana nya guhegule nya ndranga ni ndranga nya Vagipiti.

³⁷ Aholu, a di dusa vathu vaye na va rwade ndralama ni parata, vbakari gwawe a diri mwalo ni moyo basi nya gudwale.

³⁸ Vagipiti va di nengela khu gu va wona na va gu duga, kholu va di tade khu hwanga ni guthava.

³⁹ Mihani a di ladza lipfhi gasi gu va fenengedza, a vasa nilo gasi gu va wenengedza wutshigu.

⁴⁰ Va di lomba, a va resela sikenya, a va khurisa khu guhodza nya gute khu ndzadzini.

⁴¹ A di pandra giwindri nya gutiye gu duga mati, ma khulunga giwulani kha nga tsongo.

⁴² Kholu a di alakanya magana yaye nya gukatege, a nga sambanya ga Abrahama, gihathwa gyaye.

⁴³ Kharati Pfhumu a di dusa vathu vaye a va hathidego, va duga na va gu embelela, va womba mikulungwane.

⁴⁴ A va ningide litigo la vambe vathu, va hodza lithonga la vambe vathu,

⁴⁵ a va girede esi gasi va sayisa sileletelo saye, va landrisa milayo yaye yatshavbo. Dhumisani Pfhumu Nungungulu!