Dzindzimo 10 - Bhibhiliya Nya Guage

Nombelo nya vale va saniswago

¹ Pfhumu Nungungulu, khu ginani u khala hwindzo? Khu ginani u nyi sihalela gikhati nya gusaniseke?

² Va nya guvivbedwa khu monyo, va gu dzi khusedza va tshanisa sisiwana; va na pfarwe khu kuni va nga riyago vabune.

³ Kholu muthu nya guvivbedwe khu monyo, a gu bhuma khu manavelo yaye nya guvivbe, muthu nya makolo a gu nyenya, a vala Pfhumu Nungungulu.

⁴ Muthu nya guvivbedwe khu monyo, khu kotani nya matshandza yaye; kha khathali khu gu vbweta Nungungulu, uye a gu pimisa, a ganela, khuye: “Mwalo Nungungulu!”

⁵ Gikhati gyatshavbo sigiro saye sa gu duga gwadi, kha theli kota khu gulamula gwago; a gu kanyisa valala vaye vatshavbo.

⁶ Mapimoni gwaye a gu alakanya, khuye: “Mwalo a na gu nyi thesago; gima kha nyi na nga mana libango.”

⁷ Khanani gwaye gu tade khu tshamba, gukanganyisa ni gutshanisa; lidimi laye, la gu ganela manyala ni gupoyila.

⁸ A gu varamela vathu vbafuvbi nya dzindranga, a sihala afela gu songa muthu nyambana nandru; maho yaye ma gu holelela gisiwana.

⁹ A gu varama kha nghala yi guromo phalani gwaye, a vandramela gasi gu mola gisiwana; a gi ndrindrela phalani gwaye.

¹⁰ A gu holelela, a dzi fumba, a ndraga; gisiwana gi thegela mandzani gwaye.

¹¹ A ganela khu monyoni gwaye, khuye: “Nungungulu a si divade, fenengedzide khovbe gima kha na wona gilo.”

¹² Khuga u ema Pfhumu Nungungulu! Yeyedza tshivba yago! U nga divali sisiwana.

¹³ Khu ginani muthu nya guvivbedwe khu monyo a valago Nungungulu, a pimisa khu monyoni gwaye, khuye: “Nungungulu kha na nyi tsayisa?”

¹⁴ Aholu Uwe u ngu wona, guvbisega ni gutshaniseka, u si vega mandzani gwago. Uye a sanisekago a gu dzi ningela mandzani gwago; uwe khuwe u vhikelago khulungu.

¹⁵ Fuvisa tshivba ya va nya guvivba ni sighohi, tsayisa guvivba gwawe, kala gu si wonegi gambe.

¹⁶ Pfhumu Nungungulu, a ngu fuma kala gupindruga; va nya mayigo va na tutumiswa tigoni gwaye.

¹⁷ Pfhumu Nungungulu, yingisa nombelo wa gisiwana, va tiyise myonyo yawe, u va hakhe,

¹⁸ u emela khulungu ni uye a sanisekago, gasi muthu wa tigoni, a si giri gambe wughevenga.