Dhewuteronome 5 - Bhibhiliya Nya Guage

Guwusedzwa nya likhumi sirumo nya Nayo

¹ Mosi a di ramba va na Israyeli vatshavbo a ta va embela, khuye: “Yingisa, uwe Israyeli, milayo ni sileletelo muhuno nyi ganelago dzindzeveni gwanu, gasi mu si hevbula, mu si vegedza ni gu si landrisa.

² Pfhumu Nungungulu wathu, giride gidzumeledzwano ni ethu gigomoni ga Horebhi.

³ Pfhumu Nungungulu, kha gira gidzumeledzwano gegi ni vababe vathu, aholu giride ni ethu hatshavbo hi guromo avba muhuno hi vbanyago.

⁴ Pfhumu Nungungulu ganede ni ethu khovbe ni khovbe nari gigomoni, khu vbakari nya nilo.

⁵ Khu gikhati gyogyo, eni nyi di emide vbakari ga Pfhumu ni enu, gasi gu mi tshamuselani malito ya Pfhumu Nungungulu, kholu enu kha mwa nga gwela gigomo khu gu thava nilo:

⁶ Eni kheni Pfhumu Nungungulu wago, a gu dusidego khu tigoni ga Egipito, nyumbani nya wugumbi.

⁷ Khu na manega ni vambe vanungungulu mbeli gwangu.

⁸ U nga dzi gireli gifananiso nya guvatwe, ambari nya gufanane ni gimwegyo nya esi si guromo vbatshani ndzadzini, ambari vbavbatshi mafuni mwendro matini vbavbatshi nya mafu;

⁹ u nga gi khidzimeli ambari gu gi khozela; kholu Eni Pfhumu Nungungulu wago, nyi Nungungulu nya wufu, nyi tsayisago sanana khu kotani nya sighoho sa vavelegi kala gitugulwana nya wuraru nigyo nya wu na ga vale va nyi vengago;

¹⁰ nyi girela wuhindzi kala likhumi mazana situgulwana sa vale va nyi golago ni gu sayisa milayo yangu.

¹¹ U nga hagani khu lina la Pfhumu Nungungulu wago, umo nyamba vbwetega, kholu Pfhumu kha na nga diga gu tsayisa wule a haganago khu lina laye.

¹² U na vegisa litshigu nya Sabhadho, u li agisa, kha nga idzo u leletedwego khidzo khu Pfhumu Nungungulu wago.

¹³ U na thuma livbandre na limwedo matshigu u gira mithumo yago yatshavbo.

¹⁴ Aholu litshigu nya livbandre na mavili, Sabhadho ya Pfhumu Nungungulu wago; khu kotani nya kharato, khu na nga thuma gilo, uwe, ambari gyanana gyago nya gikhwathana, negi nya gyagadzyana, ambari githumi gyago nya mwama, nigyo nya nyamayi, ambari mombe ni buru yago, ambari ni gevbi girengo, mwendro muluveli a vbanyago vbakari gwago, gasi githumi gyago nya mwama nigyo nya nyamayi, si mane gu hefemula niso kha nga uwe.

¹⁵ Dundruga gukhuwe uwe nuwe u diri khumbi tigoni ga Egipito, aholu Pfhumu Nungungulu wago, a gu duside khu mule khu gyandza nya tshivba ni libogo nya gulaphe; khigyo givangelo gi girago Pfhumu Nungungulu wago, a gu ninga nayo nya guvegise gu vegisa litshigu nya Sabhadho.

¹⁶ Rungudza babe ni mayi wago, kha nga idzo a gu rumidego khidzo Pfhumu Nungungulu wago, gasi matshigu yago ma engedzedwa u kodze guya khala gwadi ga litigo u ningwago khu Pfhumu Nungungulu wago.

¹⁷ U nga songi.

¹⁸ U nga bhayi.

¹⁹ U nga bi.

²⁰ U nga giri wufakazi nya malipha u lumbedza muthu kwanu.

²¹ U nga naveli mwangadzi wa muakelane wago, ambari gu navela nyumba ya muthu kwanu, ambari lithembwe laye, ambari githumi gyaye nya mwama mwendro nya nyamayi, ambari mombe yaye, ambari buru yaye, ambari ni gevbini gilo gi mu lumbago.

Mosi mutshanganisi wa vathu ni Nungungulu

²² Pfhumu Nungungulu a di ganela magana yaya ga tshangano wanu watshavbo mugigomoni, nari khu vbakari nya nilo, umo nya lipfhi nya gidema, khu lito nya gulaledze, nyamba engedzela gilo. A lova magana yaya umo nya sivatu nya siwindri a nyi ninga.

²³ Avbo mu ngapwago lito leli na li gu duga khu vbakari nya gidema, gigomo na gi gu dzura khu nilo, enu mwatshavbo mu di hidzimela avbo gwangu gumogo ni vathangeli nya mahundzu yanu, ni madhota yanu,

²⁴ mu ta ganela, khenu: Wonani nya gukhenu Pfhumu Nungungulu wathu, a hi nonedzide wudhumo ni wugulu waye, ni gupwa lito laye khu vbakari nya nilo; muhuno hi wonide nya gukhethu Nungungulu a ngu ganela ni muthu, muthu a simama a vbanya.

²⁵ Gasi olu, hi ngafa khu ginani? Kholu nilo yoyu nya wukhongolo khongolo na hi dagarede khuwo; naripwani hi di simamide gu yingisa lito la Pfhumu Nungungulu hi di hadza gufa.

²⁶ Kholu khu wevbini muthu a nga yingisa lito la Pfhumu Nungungulu a vbanyago na li gu ganela khu vbakari nya nilo, kha nga idzo ethu hi nga mu yingisago khidzo a simama gu vbanya?

²⁷ Hidzimela uwe u ya yingisa satshavbo iso a nga gu embelago Pfhumu Nungungulu wathu; gasi uwe u na hi embela satshavbo iso a na gu embelago Pfhumu Nungungulu wathu, hi na si yingisa bwelo hi si landrisa.

²⁸ Avbo Pfhumu Nungungulu, a ngapwago magana yanu mu nga bani mu ganela gwangu, Pfhumu a di nyi embela, khuye: Eni nyi yingiside magana ya vathu vava, ayo va gu embedego; va ganede gwadi satshavbo.

²⁹ A diri gwadi ngudzu naripwani va gu mana monyo yoyu, nya gu va nyi ninga githawo ni gu sayisa gikhati gyatshavbo milayo yangu yatshavbo, gasi va katega avo ni sanana sawe kala gupindruga.

³⁰ Indra uya va embela gukhuwe va bwelele mitshathani gwaye.

³¹ Aholu uwe tshala avba ni eni, gasi Eni nyi na gu ninga sirumo satshavbo sileletelo ni milayo esi uwe u na gu va hevbudzago gasi va ya si landrisa ga litigo nyi na gu va ningago vaya li fumela.

³² Khu guralo, girani kha nga idzo Pfhumu Nungungulu wanu a mi rumidego; mu nga ndreyini muya nyamudye, mwendro nyambade.

³³ Mu na gimbilani khu ndzila yatshavbo mu rumwago khu Pfhumu Nungungulu wanu, gasi mu kodza guvbanya ni sigiro sanu satshvbo si mi dugela gwadi. Mwa gu gira isoso, mu na katega mu vbanya matshigu nya gutale ga litigo mu na guya li fumelago.