Dhewuteronome 32 - Bhibhiliya Nya Guage

Ndzimo ya Mosi

¹ Upwani ndzadzini, kholu nya gu vbweta gu ganela; Wpwa uwe litigo, magana ya kanani gwangu.

² Gihevbudzo gyangu gi na dote kha nga ndzadzi, lito langu li naganisa kha nga thondrwane, kha nga humguva vbatshani nya mwasi, kha nga madona nya mati mwasini.

³ Kholu nyi na huwelela lina la Pfhumu Nungungulu, rungudzani wugulu wa Pfhumu Nungungulu wathu.

⁴ Uye Giwindri nya gutiye, thumo waye wu vbelede, kholu dzindzila dzaye dzatshavbo dzi lulamide! Nungungulu tumbegide, avbo gwaye gu mwalo gukanganyisa; Uye khwa lisine ni gululama.

⁵ Si Mu ghohede, sanana Saye nya guwegele, khu guralo kha muri sanana saye, aholu mu gilo gyaye, nya gunyenyeze; gitugulwana nya guwegele ni malipha.

⁶ Ina khidzo kharati, mu bongago khidzo Pfhumu Nungungulu, enu vathu nya sipumbu, nya guhandruge, gani? Gasi khandruye babe wago, ni muvangi wago, gani? Khuye a gu wumbidego a wuya a gu tiyisa!

⁷ Dundruga matshigu yago ya gale, alakanya myaga ya galegaleyo myaga ya situgulwana ni situgulwana si vbindridego wudzisa babe wago, uye a na gu tshamusela, ni madhota yago, ayo ma na gu hevbudza!

⁸ Gikhati Uye a Khusegidego ngudzu a nga bani a kabanisela dzithomba mayigo, gikhati a nga bani na kavedzela khu mahundzu sanana sa Adhamu, a di vegedzela mivbingano nya mayigo, gu khedza khu tengo nya sanana sa Israyeli.

⁹ Gipandre gya Pfhumu Nungungulu, khu vathu vaye, Jakobe khuye gipandre nya thomba yaye.

¹⁰ A mu rode ga litigo nya giwula, wulanga nya pfilupfilu, nya dzihuwa ni guthisa; A mu vhikede a mu wundza, a mu sayiside gukhwatshi ndzololo nya liso laye.

¹¹ Uye lighama li khendzugisago sanana saye mugihagani, li vbuvbelago vbatshani nya sifondro saye, li tula mambapi li si vega avbo, gasi gu si rwala li vbuvba naso,

¹² kharati, nuye Pfhumu Nungungulu, khuye ekha basi a nga va gimbidzisa, nyamba phaswa khu mumbe nungungulu.

¹³ A di mu gira mu legalega musigomoni sa tigoni a mu hodzisa mihandro nya likhabi; a di mu ninga mu hodza wulombe wa mugiwindrini ni mafura nya guduge khu giwindrini nya gutiye,

¹⁴ ni wusa nya mahwe nya dzimombe ni mahwe nya dzinvuta ni mafura nya sinvutana, nya dzihamba dzi haviswago Bhasani ni vamabhongwe, gumogo ni wuguvbi nya wadi nya gukuwudwe; mu sede vbinyu nya gutshambe a gu novba nya dziuvha.

¹⁵ Aholu Jakobe, a di ena a gugumugelana a tala khu mafura, aholu a di hambana ni Nungungulu a nga mu vangago, a wugela Giwindri nya guvbanyiswe gwaye.

¹⁶ Va Mu giride a khala wufu khu vanungungulu nya valombo. Va Mu wusede likhulo khu silo nya gunyenyeze.

¹⁷ Va phasede mandriki ni maphuvbo nya guvivbe a si gu nungungulu, ni vanungungulu va si vatigo, vanungungulu nya vaphya va gu ngari gu vboha, va ngamba khozedwa khu vababe vanu.

¹⁸ U yeyiside Giwindri gi nga gu velega, gambe u divade Nungungulu a nga gu wumbago.

¹⁹ Pfhumu Nungungulu a si wonide a gu goroga, a mu diga, na gu goroswa khu sanana sawe nya sikhwathana niso nya sagadzyana.

²⁰ A ganela, khuye: Nyi na va sihela khovbe yangu, nyi na wona khu mevbini mahegiso yawe, kholu avo melana nya guyeyise, a gu sanana nyamba tumbega.

²¹ Khu sifaniso sawe va nyi giriside wufu khu egi gi si gu Nungungulu, va nyi wusela likhulo khu sikono nya vanungungulu vawe nya malipha. Eni neni nyi na va wusela wufu khu kotani nya silo si si phasigo gilo, khu gu hatha mayigo ma sirigo mayigo, nyi na va gorosa khu gu hatha litigo nya sipumbu, nyambana mapimo.

²² Kholu wu khondride nilo nya likhulo langu, wu dzura kala phalani nya guete nya vafi; wu vbisa mafu gumogo ni mihandro yaye, wu na nyiviligisa matshina nya sigomo.

²³ Nyi na wungedzela gwawe mabango nya mangi, nyi na vbedza siholoma sangu khu gu va khwandrela.

²⁴ Va na mbemba khu ndzala, ni gu hodzwa khu dzingumbe ni mitungu nya guvbise, nyi na va rumela magwaha nya sirengo nya likhabi, ni wuhungu nya gusonge nya sirengwanana nya gukhwirire khu lididi.

²⁵ Vbavbandze, va naya sasedwa khu matshari, dzinyumbani va na mbemba khu guvbisa; lidzaha lina mbemba gumogo ni likendzi, gyanana gya beleni gumogo ni gikhosane.

²⁶ Eni nyi di, kheni: Nyi na va phalalegisa, nyi fuvisa gialakanyiso gyawe vbakari nya vathu.

²⁷ Nasiri ga olu nyi thavago matshandza ya valala vawe, va nga hadza gu dzi zundza, va ghiya, va ganela, khavo: Mandza yathu ma khusegide, ma va pade, khandri Pfhumu Nungungulu a giridego satshavbo sesi.

²⁸ Kholu vathu vangu va mwalo wusingalagadzi, sipumbu nya vathu, va gu mwalo mapimo.

²⁹ Naripwani avo va diri vathu nya guti, na va si pimide, va di hadza gu alakanya mahegiso yawe.

³⁰ Ga gu kodzega kharini muthu moyo basi a lundra likhumi mazana (1.000), ni vathu vavili va lundra likhumi magumi mazana (10.000) vathu? Kholu Muvhikeli wawe, ava digidego, Pfhumu Nungungulu a va rengiside ga valala.

³¹ Kholu muvhikeli wawe, kha fanani ni Muvhikeli wathu, ni valala vathu, dzifakazi nya isoso.

³² Kholu lithembwe lawe nya miuvha la gu dugela tigoni ga Sodhoma, ni mahangeni ga Ghomora; dziuvha dzawe khya wuhungu, sitsatsa sakone khya guvava;

³³ wadwa wawe, wa gu pupuma liguvi nga wuhungu nya dzinyoga, ni wuhungu nya gusonge nya dzimamba.

³⁴ Ina silo sesi satshavbo kha nya si vegedza sisangalani gwangu, kha nya si khothela umo nya dzithomba dzangu, gani?

³⁵ Guphodza ni gubweledzela sa gu lumba eni, li na vboha litshigu eli ngondro wawe wu na kwirigago; kholu mahegiso gwawe gu na vboha nyamba hwela, silo va dongisedwago si nguta khu guvbiredza.

³⁶ Kholu, Pfhumu Nungungulu, a na lamulela vathu vaye, ni gupwela gisiro sithumi saye, avbo a na va wonago gukhuye va ngu vbela tshivba, ni gukhuye avbo gwawe mwalo na moyo a na tshalago, gu mwalo khumbi mwendro nya gutshulege.

³⁷ Khu guralo, a na, khuye: Gasi vomo hayi vanungungulu vawe, muvhikeli wawe nya gu mu tumbe?

³⁸ Vanungungulu va nga bani va gu hodza mafura nya miphaso yawe, avo va nga bani va sela vbinyu nya miningelo yawe? Va na khuge va mi phasedzela, gasi mu mane wulanga nya gusihale.

³⁹ Gasi olu, wonani gwadi gukhenu, Eni kheni nyi gu Nungungulu, mwalo mumbe nungungulu vbavbandze ga Eni! Eni kheni nyi ningago guvbanya ni gufa, Eni nyi ngu songa ni guvbanyisa, mwalo a vbulugago mandzani gwangu.

⁴⁰ Nyi na khusedza mandza yangu nyi khedzisa ndzadzini, nyi ganela, kheni: Eni nyi ngu vbanya kala gupindruga!

⁴¹ Avbo nyi na lodzago litshari langu nya gukhedzige, avbo nyi na gu lamulago khu mandza yangu, nyi dzi phodzela ga valala vangu, nyi na bweledzela vale va nyi vengago.

⁴² Sighalala sangu nyi na si lovega novbani, (makoke wangu wu na hodza nyama), khu novba nya avo va fudego ni sibotshwa ni mihungo ya vathangeli ya valala.

⁴³ Nengelani enu mayigo, gumogo ni vathu vaye, kholu Pfhumu Nungungulu a na phodzela novba wa sithumi saye a na si phodzela vbatshani ga valala vaye, a na pwela wuhindzi litigo laye ni vathu vaye.

⁴⁴ Mosi a dita ganela magana yatshavbo nya ndzimo yeyi dzindzeveni ga vathu, uye gumogo ni Josuwa, mwamana wa Nuni.

⁴⁵ Avbo Mosi a nga ganela magana yatshavbo yaya ga vatshavbo va na Israyeli,

⁴⁶ a di va embela, khuye: Vegedzani myonyoni gwanu magana yatshavbo yaya nyi mi fakazelago muhuno; mu na leletelani sanana sanu gasi si dzi wonele khu gu vegedza magana yatshavbo nya Nayo yoyu.

⁴⁷ Kholu, magana yaya, khandri ya nyalidede ni gumbana lisima, aholu khya guvbanya gwanu; khu magana yaya ya mamowo, mu na engedzelani matshigu yanu nya guvbanye ga litigo mu na ya li fumelago na mu tshatugide tsongo wa Joridhani.

LITSHIGU NYA GUHEGISE NYA GUVBANYE GA MOSI Mosi a ngu wona gigomo gya Nebhu tigoni ga Khanani

⁴⁸ Khu litshigu lile kamwe, Pfhumu Nungungulu a di ganela ga Mosi, khuye:

⁴⁹ “Gwela gigomo gegi gya Abharimi, avbo nya gigomo gya Nebhu, gi guromo tigoni gwa Mowabhi, gi khedzanidego ni Jeriko, u wona litigo la Khanani, nyi ningago sanana sa Israyeli si li fumela.

⁵⁰ Uwe u nafa gigomoni momo u na gwelago, u naya hakhwa khu va na gyanu, kha nga ndriyago Aroni a fedego mugigomoni ga Hori, a hakhwa khu va na gyawe;

⁵¹ kholu enu mwa vavili mu nyi ghohede vbakari ga sanana sa na Israyeli, vbafuvbi ni mati ya Meribha ni ya Kadesi, giwulani ga Zimi, kholu kha mwa nyi agisani vbakari ga sanana sa na Israyeli.

⁵² Uwe u na ya li wona khu hwindzo, aholu khu na nga bela tigoni nyi na ningago sanana sa Israyeli.”