Dhewuteronome 30 - Bhibhiliya Nya Guage

Situmbiso nya wuhindzi

¹ Khu guralo, gikhati si na gu gu dugelela, silo satshavbo sesi nyi si ganedego gwago, nya makategwa ni mabango, wa gu si alakanyela khu monyoni gwago nuri vbakari nya mayigo yatshavbo ayo Pfhumu Nungungulu wago, a na gu phalalegisago ga ayo;

² wa gu vbindrugedza u wuya ga Pfhumu Nungungulu wago uwe gumogo ni sanana sago, khu monyo wago watshavbo ni hefemulo wago watshavbo, u yingisa lito laye mayelano khu satshavbo esi muhuno nyi gu leletelago;

³ khavbo, Pfhumu Nungungulu wago, a na gu wuyisago khu wugumbitunu, a gu pwela gisiro, a gu tombanisa nyaluphye khu ga mayigo ayo a nga bani a gu phalalegisede umo Pfhumu Nungungulu wago.

⁴ Ambari vathu vago va vbagedwego va gu manegela mahegiso nya mafu, gukhugela iyoyo, Pfhumu Nungungulu wago, a na gu tombanisa a gu wuyisa.

⁵ Pfhumu Nungungulu wago, a na gu wuyisa ga litigo li nga fumedwago khu vababe vago, u ta li fumela. Uye a na gu kategisa gwadi a gu andrisa ngudzu mu tala guvbindra vababe vago.

⁶ Pfhumu Nungungulu wago, a na vbindrugedza monyo wago ni monyo wa livelego lago, gasi u gole Pfhumu Nungungulu wago, khu monyo wago watshavbo ni hefemulo wago watshavbo, u kodze gu vbanya.

⁷ Pfhumu Nungungulu wago, a na thela mabango yaya yatshavbo vbatshani ga valala vago ni ga vatshavbo avo va gu vengago, va gu tshanisa.

⁸ U na vbindrugedza mavbanyelo u yingisa lito la Pfhumu Nungungulu; u landrisa milayo yaye yatshavbo, eyi nyi gu leletelago muhuno.

⁹ Pfhumu Nungungulu wago, a na gu fumisa, a gu kategisa mithumoni yatshavbo nya mandza yago, ni ya mahembeni gwago, ni ya umo nya sifuyo sago, ni mihandro ya mahangeni gwago, yi na tala ngudzu. Pfhumu Nungungulu a na bwelo khavbo a gu kategisa, a salala khuwe, kha nga idzo a kategisidego khidzo vababe vago.

¹⁰ Wa gu yingisa lito la Pfhumu Nungungulu wago, u vegisa milayo ni sileletelo saye, si lovidwego libhukuni momu nya Nayo, wa gu vbindrugedza khu monyo wago watshavbo ni hefemulo wago watshavbo u wuya ga Pfhumu Nungungulu wago.

Nayo wa Pfhumu Nungungulu womo vbafuvbi

¹¹ Kholu Nayo yoyu, nyi gu ningago muhuno, kha wa sihala, wu mwalo hwindzo nago.

¹² Gambe wu mwalo vbatshani ndzadzini, nya gukala u ganela, khuwe: Khu mani a na gwelago vbatshani yoyo ndzadzini, aya wu dzega a hi resela gasi hi kodze gu wu yingisa, ni gu wu landrisa?

¹³ Gambe wu mwalo khisikheyi nya linene, nya gu, u ganela, khuwe: Khu mani a na tshatugago aya khisikheyi nya linene, gasi aya hi dzegela, hi ta wu yingisa ni gu wu landrisa?

¹⁴ Kholu magana yaya momo ngudzu vbafuvbi gwago, kanani gwago ni monyoni gwago gasi u ma landrisa.

Guvbanya mwendro gufa

¹⁵ Wona, muhuno nyi ngu vega mbeli gwago womi ni wuwadi, gufa ni guvivba.

¹⁶ Kharati nyi ngu gu ruma muhuno gukheni, haladza Pfhumu Nungungulu wago, u gimbila khu dzindzila dzaye, u vegisa milayo yaye, sileletelo saye ni wululamo waye. Kharato, u na andra. Pfhumu Nungungulu wago, a na gu kategisa ga litigo u na ya belago gasi u li fumela.

¹⁷ Aholu, monyo wago wa gu ndreya, wu si yingisi, wu dzumela gu ndrindrwa wu ya khozela vambe vanungungulu ni gu va thumela,

¹⁸ nyi ngu sambanya kamwe muhuno, kheni: U nafa, khu na vbanya matshigu nya gulaphe tigoni uyago umo, wa gu tshatuga tsongo wa Joridhani u ya li fumela.

¹⁹ Ndzadzi ni mafu somo muhuno kha nga dzifakazi dzangu, gukheni nyi vegide mbeli gwago guvbanya ni gufa, makategwa ni libango. Hatha guvbanya gasi u kodza gu mana guvbanya, uwe gumogo ni livelego lago.

²⁰ U na gola Pfhumu Nungungulu wago, U mu yingisa ni gu namarela avbo gwaye; kholu Uye khuye guvbanya gwago ni gulapha nya matshigu yago, gasi u fela guvbanya ga litigo eli Pfhumu Nungungulu a sambanyidego ga vababe vago, Abrahama, Isaki ni Jakobe.