Dhewuteronome 18 - Bhibhiliya Nya Guage

Thomba ni dzifanelo dza vaphasi nya mamba ni Valevhi

¹ Vaphasi nya mhamba nya Valevhi, gumogo ni lihundzu latshavbo la na levhi, kha va na mana gipandre mwendro thomba tigoni ga Israyeli; va na hodza miningelo nya guvbisedwe Pfhumu Nungungulu, ni sile si va lumbago.

² Khu guralo, kha va na nga mana thomba vbakari ga vandriyawe; Pfhumu Nungungulu khuye thomba yawe, kha nga a va embedego.

³ Khu guralo, vaphasi nya mhamba, esi va yelago gu si mana ga vathu va ningelago miphaso khu mombe mwendro nvuta, khesi: Siphanga, hungo ni gisusu.

⁴ U na va ninga mihandro nya guhegule nya tirigu yago, vbinyu yago, mafura yago gumogo ni mawoya nya guhegule nya dzinvuta dzago.

⁵ Kholu Pfhumu Nungungulu wago, a mu hathide vbakari nya mahundzu yago gasi gu a thuma khu lina la Pfhumu Nungungulu, matshigu yatshavbo, uye gumogo ni sanana saye.

⁶ A guta Mulevhi nya gukari khu ga limwedo nya madhoropa yago ya Israyeli watshavbo, umo uye a vbanyago umo, a guta khu ligolo nya monyo waye watshavbo ga wulanga Pfhumu Nungungulu a wu hathidego,

⁷ a ta thuma khu lina la Pfhumu Nungungulu waye, gu fanana gambe ni vatshavbo vandriyaye, va na Levhi, va manegago vbale mbeli ga Pfhumu Nungungulu,

⁸ uye a na mana guhodza nya gudingane ni gwa Valevhi vakwawe, vbavbandze ga sile a si manago khu gurengisa silo nya thomba yaye.

Guloledziswa nya sihena sa va nya mayigo

⁹ Avbo u na belago ga litigo eli Pfhumu Nungungulu wago, a na gu ningago, u ngayi uya yedzedzela mavbanyelo nya guvivbe ya vathu va tigoni momo.

¹⁰ A nga manegi vbakari gwanu ni moyo nya gugire phaso khu guvbisa mwamana waye mwendro nyamahegyane waye niloni, gambe a nga manegi oyu nya guthumise wunyanga, ni gulola dzisolo, va nya gufemba ni wuloyi;

¹¹ nya gugire sisamadziso, va nya gutshwayina, va nya sikwembu, dzinyanga ni va nya guwudzisa vafi;

¹² kholu vatshavbo avo va na girago isoso, manyala ga Pfhumu Nungungulu, kholu khu kotani nya manyala nya nga aya, Pfhumu Nungungulu wago, tutumiside va nya mayigo mbeli gwago.

¹³ Uwe gu vbwetega gu khala na wu lulamide mbeli ga Pfhumu Nungungulu wago.

¹⁴ Kholu vathu nya mayigo yaya u na guya ma khozisa, va gu yingela magana ya va nya gusasula ni gufemba; aholu Pfhumu Nungungulu wago kha si vbweti isoso.

Gitumbiso nya gu resedwe muprofeti nya khongolo

¹⁵ Pfhumu Nungungulu wago, a na gu wusela muprofeti vbakari gwago ni ga vandriyago, nya gufanane ni eni; guvbweta u mu yingisa,

¹⁶ gukhedza khu satshavbo esi u lombidego ga Pfhumu Nungungulu wago, gigomoni ga Horebhi, khu litshigu nya tshangano avbo mu nga, khenu: Kha nyi vbweti gupwa gambe lito la Pfhumu Nungungulu wangu, ambari gu wona nilo wowu nya khongolo, kholu nyi ngafa.

¹⁷ Khavbo avbo, Pfhumu Nungungulu a di nyi embela, khuye: Va ganede gwadi satshavbo esi va ganedego.

¹⁸ Nyi na va wusela muprofeti vbakari ga vandriyawe, nya gufanane ni uwe, kanani gwaye nyi na thela magana yangu, uye a na va embela satshavbo nyi na gu mu rumago.

¹⁹ A gu manega uye a na gumba yingisa magana yangu, aya uye a na gu ganelago khu lina langu, eni nyabune nyi na mu rana nyita mu wudzisa.

Vaprofeti nya malipha

²⁰ Aholu muprofeti a na gu tshuka a ganela khu lina langu nya sa mu ruma, mwendro gu ganela khu lina la vambe vanungungulu, muprofeti yoyo a na songwa afa.

²¹ Wa gu ganela khu monyoni gwago, khuwe: “Nyi na mati kharini magana yaya, olu Pfhumu Nungungulu a ngamba ganela?

²² Dziti gwadi nya gukhuwe muprofeti yoyu a gu ganela khu lina la Pfhumu Nungungulu, aholu magana yaye ma si landriswi, ni gumba dugelela kha nga idzo a nga profetago khidzo, gu yeyedza gupwani magana yoyo khandri ya Pfhumu Nungungulu; a ma ganede khu matshandza yaye muprofeti yoyu; u nga thedwi hwanga khuye.”