Dhewuteronome 17 - Bhibhiliya Nya Guage

Gitsayiso khu gu khozela sifananiso

¹ U nga tshuki u girela phaso ga Pfhumu Nungungulu wago, khu gikuzyana mwendro nvuta nya libawa ambari guhasa nya gukari; kholu isoso si nyenyezide ngudzu mahoni ga Pfhumu Nungungulu wago.

² A gu manega muthu vbakari gwanu, madhoropani a na gu ningago Pfhumu Nungungulu wago, gani mwama gani nyamayi a na girago ugo gu vivbidego mahoni gwa Pfhumu Nungungulu wago, a hambanisa gidzumeledzwano gyaye,

³ khu gu hongola aya thumela vambe vanungungulu, ni gu va khozela, ni gu khozela lidambo mwendro ngima, ambari libutho latshavbo la ndzadzini, iso eni nyi ngamba mi leletela;

⁴ va ta gu tivisa, mwendro wa gu mapwa mahungu yaya, guvbwetega u si vbwetedzela gwadi; ga gu manega nari lisine, gunyenyeza gogo na gu giregide kamwe tigoni gwa Israyeli,

⁵ u na dzega mwama yoyo mwendro nyamayi yoyo a giridego guvivba gogo, u hongola naye nyangwatunu gwago u ya mu pfara khu siwindri kala afa.

⁶ Khu wufakazi wa vathu vavili mwendro vararu, fanede gu songwa; aholu khu wufakazi wa muthu moyo basi, mwalo fanelo nya gusongwe.

⁷ Mandza nya dzifakazi ma na phela khayo gu mu veta, gasi gu mu songa; gu landrela mandza ya vathu vatshavbo; kharati, u na vbedza guvivba vbakari gwago.

Phatha nya khongolo

⁸ Ma gu manega mahungu nya gugaradze ngudzu gu ma lamula; mahungu nya gusonge mwendro nya gubangelane, ni mahungu nya gubayisane mwendro gu wusa pfilupfilu, ni mambe mahungu nya gugaradze dhoropani gwago, u na khuga u gwela wulangani Pfhumu Nungungulu wago, a na wu hathago.

⁹ U nata ga Valevhi, vaphasi nya mhamba ni ga mulamuli va na gu bani va romo ga litshigu lolo; va na ya vbwetedzela gwadi mahungu, va na gu embela wulamuli nya lisine u fanedego guya wu gira.

¹⁰ U naya gira gukhedza khu guruma nya magana va na gu tivisago ga wulanga wule Pfhumu Nungungulu a na wu hathago; u na dzi garadza khu gu gira satshavbo esi va na gu hevbudzago.

¹¹ U na gira gukhedza khu milayo va gu embedego gukhedza ni malamulelo a gu hevbudzidego; u si ndreyi nyamudye mwendro nyambade.

¹² Muthu a na kanyisago a si yingisi muphasi nya mhamba a na gu bani ari vbale gasi gu thumela Pfhumu Nungungulu wago, ambari gu yingisa mulamuli, muthu yoyo fanede gu songwa; khu magirelo yoyo mu na vbedza wuvivbi vbakari ga va na Israyeli,

¹³ gasi vathu vatshavbo va gu yingisa, va thava va si dzi gugumugisi.

Gihathamani ni dzifanelo dza mufumeli

¹⁴ Wa gu bela tigoni a gu ningago Pfhumu Nungungulu wago, u li dzega u vbaha umo, u li fumela; wa gu ganela, khuwe: Nyi na dzi emisela mufumeli, kha nga mambe mayigo ma nyi randredego.

¹⁵ U na dzi emisela mufumeli wule Pfhumu Nungungulu wago, a na gu mu hathago; gambe oyu u na mu hathago gu khala mufumeli wanu guvbwetega nari wa na gyanu, u nga tshuki u vega muthu wa vbavbandze.

¹⁶ Aholu, mufumeli yoyo kha gu vbwetegi a dzi garadza khu gu mana dzikavalu nya dzingi, gambe kha gu vbwetegi gu a gurumedza vathu gu bwelela gambe tigoni ga Egipito, gasi guya mana dzikavalu nya dzingi; kholu Pfhumu Nungungulu a mi embede, khuye: Gima kha mu na bwelela gambe khu ndzila yeyi.

¹⁷ A na dzi wonele, a nga tshuki a dzega vanyamayi nya gutale, gasi monyo waye wu si ndreyi; gambe a nga hengeledzeli ndralama mwendro parata nya yingi.

¹⁸ A gu khala vbagikhalotunu gwaye nya wufumu, fanede gu dzi lovela nayo yoyu libhukuni, nya idzosaye ni owu wu guromo mbeli ga Valevhi, vaphasi nya mhamba.

¹⁹ Libhuku leli a na bani ari nalo, a li hevbula matshigu yatshavbo nya guvbanye gwaye, gasi a hevbule gu ninga githawo Pfhumu Nungungulu waye, gasi a kodze gu vegisa yatshavbo magana nya nayo yoyu, ni sileletelo sesi, gasi gu si landrisa.

²⁰ Esi si na gira gu monyo waye wu si dzi khusedzi vbatshani ga vandriyaye, gambe a si ndreyi ga nayo, guya nyamudye mwendro nyambade; gasi a kodze gu engedzedwa matshigu nya wufumu waye, uye gumogo ni sanana saye vbakari ga va na Israyeli.