Dhewuteronome 16 - Bhibhiliya Nya Guage

Mibuzo miraru nya Vajudha Phasika

¹ Vegedza ngima nya Abhibhi u gira buzo nya Phasika ya Pfhumu Nungungulu wago; kholu khu ngima nya Abhibhi khuye ngima Pfhumu Nungungulu wago, a gu dusidego ni wutshigu, khu tigoni ga Egipito.

² Khavbo avbo, u na dusa gifuyo gya tshambini gwago u gira khigyo ningelo nya phaso nya Phasika ga Pfhumu Nungungulu wago, wulangani wu na gu hathwago khu Pfhumu Nungungulu gasi gu khala avbo lina laye.

³ Nyama yakone u nga hodzi ni gibaba nya guthedwe mela; u na vbedza livbandre na mavili matshigu na wu gu hodza sibaba nyambana mela, gibaba nyamba thedwa mela, gibaba nya wuvi kholu, u dugide khu guvbiredza khu tigoni ga Egipito, gasi u alakanye matshigu yatshavbo nya guvbanye gwago, litshigu u dugidego khilo khu tigoni ga Egipito.

⁴ Tigoni gwago gwatshavbo, gu nga manegi mela kala guvbela livbandre na mavili matshigu; nyama u na girago khiyo miphaso vbasilambotunu nya litshigu nya guhegule, yi nga tshali kala dzimindrudzile.

⁵ U nga tshuki u gira phaso nya Phasika ndrani nya madhoropa yale Pfhumu Nungungulu wago, a gu ningago,

⁶ vbavbandze basi ga wulanga Pfhumu Nungungulu wago a na gu wu hathago gasi gu khala avbo lina laye, khavbo u na gu girago avbo mhamba nya Phasika vbasilambotunu, gupfolani nya lidambo, a gu igyo gikhati u dugidego khigyo khu tigoni ga Egipito.

⁷ Khavbo avbo, mu na yi phula ni gu yi hodza wulangani wu hathidwego khu Pfhumu Nungungulu wago; vbadzimindrutunu, moyo ni moyo nya enu a na bwelela mitshatshani gwaye.

⁸ Ndrani nya livbandre na limwedo matshigu, u na hodza sibaba nyambana mela, gasi khu litshigu nya livbandre na mavili, tshangano nya gudhumise Pfhumu Nungungulu wago; u nga thumi gilo khu litshigu lolo.

Pentekosta

⁹ Gukhugela litshigu u phelago gu vbwera tirigu; u na saya livbandre na dzimbili dzisemana.

¹⁰ U na gira Buzo nya Dzisemana, u rungudza Pfhumu Nungungulu wago, u phara mandzani gwago miningelo nya guningele khu gugola nya monyo wago, gukhedza khedzi Pfhumu Nungungulu wago a gu kategisidego khidzo.

¹¹ U na tsaka mbeli ga Pfhumu Nungungulu wago, uwe, gyanana gyago nya gikhwathana ni nyamahegyane wago, githumi gyago nya mwama, egi nya nyamayi ni Mulevhi a guromo dhoropani gwago, ni muluveli, dzikhulungu, ni vamalile va guromo vbakari gwago, wulangani owu Pfhumu Nungungulu wago a na gu wu hathago gu khala avbo lina laye.

¹² Dundruga gukhuwe uwe u diri khumbi tigoni ga Egipito, u na vegedza sileletelo sesi u si landrisa.

Buzo nya Mitshatsha

¹³ U na gira buzo nya Mitshatsha ndrani nya livbandre na mavili matshigu, hwane nya gu bani na wu hengeledzede dzimbewu dzago githalani ni gikhwatini gwago.

¹⁴ U na nengela khu buzo wago, uwe ni gyanana gyago nya gikhwathana, nya nyamahegyane, githumi gyago nya mwama, nya nyamayi, Mulevhi, muluveli, khulungu ni malile, va guromo ndrani nya madhoropa yago.

¹⁵ U na gira buzo ga Pfhumu Nungungulu wago, khu livbandre na mavili matshigu, wulangani owu Pfhumu Nungungulu a na wu hathago, kholu Pfhumu Nungungulu wago, a na gu kategisa ga mithumo yatshavbo nya guvbwere gwago, ni mithumo yatshavbo nya mandza yago, a gu nengedzisa khu satshavbo.

¹⁶ Vama vatshavbo va na gyanu, va fanede guya dzi wonegisa mbeli ga Pfhumu Nungungulu wago, nyondro tharu khu mwaga wulangani a na wu hathago, khu Buzo nya Sibaba nyambana Mela, ni ga Buzo nya Dzisemana, ni ga Buzo nya Mitshatsha; aholu u nga hongoli nyamba phara gilo mandzani gwago mbeli ga Pfhumu Nungungulu;

¹⁷ muthu ni muthu a na dusa khavbo a dzi kodzago khavbo gukhedza khidzo a kategisidwego khidzo khu Pfhumu Nungungulu wago.

Dzifanelo dza valamuli

¹⁸ U na vega valamuli ni dzindruna ga madhoropa yago yatshavbo aya Pfhumu Nungungulu wago, a na gu ningago vbakari nya mahundzu yago, gasi va lamule vathu khu gululama.

¹⁹ U nga hambanisi wulamuli, u nga hatheli vathu, ambari gu rengeledwa; kholu wurengeleli wu ngu sega maho ya va nya guti, gambe wu ngu ndreyisa mahungu ya va nya gululama.

²⁰ U na landra basi gululama, gasi u kodza guvbanya ni gu hakha kha nga thomba litigo lile Pfhumu Nungungulu wago, a na gu ningago.

²¹ Gambe u nga tshuki u yala simbo nya guphasele avbo nungungulu nya gifananiso vbafuvbi ni giluvelo mu nga vbahela Pfhumu Nungungulu wago.

²² U nga tsitsi lidingo nya gifananiso, kholu khiso a si nyenyego Pfhumu Nungungulu wago.