Dhewuteronome 13 - Bhibhiliya Nya Guage

Vaprofeti nya malipha ni vakhozeli nya sifananiso

¹ Gwa gu tshuka gu dugelela muprofeti mwendro mutshamuseli nya miloro vbakari gwanu a ta huwelela giyeyedzo mwendro giliwugiso,

² giyeyedzo gyogyo mwendro giliwugiso gyogyo gi ta ganela, khigyo: Hongoleni hi landrela vambe vanungungulu (u ngamba vati) hi va khozela,

³ u nga yingisi magana ya muprofeti yoyo mwendro mulori yoyo; kholu Pfhumu Nungungulu wanu, a gu mi linga gasi gu wona gukhuye mu ngu haladza Pfhumu Nungungulu wanu, khu monyo wanu watshavbo ni hefemulo wanu watshavbo.

⁴ Enu mu na landrela Pfhumu Nungungulu wanu, mu na mu ninga githawo; mu na vegedza milayo yaye, mu yingisa lito laye, mu hidzimela avbo gwaye.

⁵ Muprofeti yoyo mwendro mutshamuseli yoyo nya miloro fanede gu songwa, kholu huwelede khu guwugela Pfhumu Nungungulu wanu, a mi dusidego khu tigoni ga Egipito a mi dzegisa nyumbani nya wugumbi, gasi gu mi hambanisa ni ndzila Pfhumu Nungungulu wanu, a mi ningidego gasi mu gimbila khiyo. Kharati u na vbedza wuvivbi vbakari gwago.

⁶ Ndriyago, u velegidwego naye khu mayi moyo, mwendro gyanana gyago nya mwama mwendro nya nyamayi, mwendro mwangadzi wago nya gu mu haladze, mwendro pari yago nya gu yi gole kha nga hefemulo wago, a gu ganela khu gisihaledza, khuye: Hongole hi khozela vambe vanungungulu, avo uwe u ngamba vati, ambari vababe vago,

⁷ vbakari ga vanungungulu nya vathu va gu randredego, va vbafuvbi mwendro hwindzo nago, gukhugela mahegiso kala mahegiso nya litigo,

⁸ u nga dzumeli ambari gu va yingisa; u nga mu pweli wusiwana gambe u nga mu tsetseleli, ambari gu mu ninga wulanga nya gusihale.

⁹ Aholu, khu lisine u na mu songa, mandza yago khayo ma na gu phela khayo gu mu songa, khu hwane gu landrela mandza ya vathu vatshavbo.

¹⁰ U na mu pfara khu siwindri kala afa, kholu a gu hambaniside ni Pfhumu Nungungulu wago, a gu dusidego khu tigoni ga Egipito, nyumbani nya wugumbi.

¹¹ Israyeli watshavbo a na dzipwa a khala hwanga, gima kha na nga engedza gambe gu gira guvivba nya nga ugogo vbakari gwago.

¹² Wa gupwa ga lidhoropa nya gukari eli Pfhumu Nungungulu wago, a nga gu ningago gasi gu vbanya umo, na gu ganedwa pwani

¹³ vama nya gukari nya guvivbedwe khu monyo va dugide khu vbakari gwago, va gurumedza vavbanyi va dhoropani gwawe, khavo: Hongoleni hi khozela vambe vanungungulu, u si vatigo,

¹⁴ ma gu tshuka ma manega mahungu nya nga ayoyo, mu fanede gu dzi garadza khu gu wudzisela gwadi; gwa gu wonega nari lisine na gu giregide vbakari gwago manyala yoyo,

¹⁵ vavbanyi va dhoropani momo, u nga va tsetseleli, va mbembise khu matshari havo bhi ni satshavbo si guromo umomo gumogo ni sirengo.

¹⁶ U na wungedzela tendrelani nya lidhoropa lawe satshavbo esi u phangidego, u na si vbisa si khala ningelo ga Pfhumu Nungungulu wago, gu na khala litala nya marumbi kala gupindruga; gima kha li na vbahedzwa gambe.

¹⁷ Gambe ni gimwegyo nya esi si nyenyezidego gi nga khali mandzani gwago, gasi gu, Pfhumu Nungungulu a hambanisa likhulo laye, a gu girela wuhindzi, a gu pwela gisiro, a gu andrise kha nga a sambanyidego ga vababe vago.

¹⁸ Pfhumu Nungungulu wago a na gu girela isoso wa gupwa lito laye u sayisa milayo yaye nyi gu ningago muhuno, u gira ugo gu lulamidego mahoni gwaye.