Dhewuteronome 10 - Bhibhiliya Nya Guage

Sileti nya wuvili nya nayo

¹ Gikhati gile, Pfhumu Nungungulu a di nyi embela, khuye: “Vata sileti sivili nya giwindri, kha nga esi nya guhegule, u gwela naso eno gwangu, vbatshani nya gigomo, gira gambe ni ngasa nya mapulango.”

² Nyi na lova vbasiletitunu sa sivili magana ma nga bani ma lovidwe ga sileti nya guhegule u nga si pandrago U na si thela umo nya ngasa.

³ Khu guralo, nyi di gira ngasa nya mapulango nya sena, nyi vata sileti sivili nya siwindri, kha nga iso nya guphele, nyi gwela gigomoni na nyiri ni sileti sa sivili mandzani gwangu.

⁴ Khavbo avbo, Pfhumu Nungungulu a di lova avbo nya sileti, mahungu a nga bani na lovide guphelani, milayo yile nya likhumi a nga mi embelago litshigu nya tshangano mugigomoni, vbakari nya nilo. Khavbo avbo, Pfhumu Nungungulu a di nyi ninga.

⁵ Nyi di thendregedza nyi tshiga khu gigomoni, nyi ta thela sileti umo nya ngasa nyi nga bani nyi vatide; ni olu somo mule kha nga idzo Pfhumu Nungungulu a nga nyi rumago khidzo.

Ga giningwa nya lihundzu la Levhi

⁶ Sanana sa Israyeli si di khuga khu Bheyerote-Bhene-Jahakami vaya Mosera. Khiyo a nga ya fela iyo Aroni, va mu dzinga iyoyo. Mwanaye Eliyazari, a di mu tshikhedza wulangani gwaye nya wuphasi nya mhamba.

⁷ Khu vbale, va di khuga va hongola Godigodha, khu Godigodha va hongola Jatibhata, litigo nya mitsongo nya mati.

⁸ Khu gikhati gyogyo gya gimwegyo, Pfhumu Nungungulu, a di hatha lihundzu la na Levhi gasi li rwala Ngasa nya Gidzumeledzwano gya Pfhumu Nungungulu, gasi va manega mbeli ga Pfhumu Nungungulu, va mu thumela ni gu kategisa vathu khu lina laye kala na muhuno.

⁹ Khidzo kharato va na Levhi va ngamba kavedwa thomba ni vandriyawe, kholu thomba yawe khu Pfhumu Nungungulu, kha nga idzo Pfhumu Nungungulu wago, a gu tumbisidego khidzo.

¹⁰ Nyi di simama gu khala gigomoni, kha nga guhegulani, magumana matshigu ni magumana wutshigu; Pfhumu Nungungulu a di nyi yingisa gambe ga egi gikhati, a diga makungo nya gu mi mbembise.

¹¹ Aholu Pfhumu Nungungulu a di nyi embela, khuye: “Khuga, u phare ndzila, u thanga mbeli nya vathu, gasi vaya bela va fumela litigo nyi tumbisidego khu gusambanya, gu li ningela ga vababe vawe.”

Gitiviso nya guyingise

¹² Olu uwe Israyeli, gasi ginani Pfhumu Nungungulu a gi vbwetago avbo gwago? Khandri a gu vbweta basi gukhuye u ninga githawo Pfhumu Nungungulu wago, u landrisa dzindzila dzaye dzatshavbo, u mu gola ni gu thumela Pfhumu Nungungulu wago, khu monyo wago watshavbo, ni hefemulo wago watshavbo,

¹³ u vegisa sirumo sa Pfhumu Nungungulu ni milayo yaye, esi muhuno nyi gu leletelago, gasi u mane makategwa, gani?

¹⁴ Wona nya gukhuwe dzindzadzini gwatshavbo, ni mafuni ni satshavbo si guromo umo sa gu lumba Pfhumu Nungungulu wago.

¹⁵ Aholu Pfhumu Nungungulu a di tangadziswa khu vababe vago, a va gola, bwelo khavbo a hatha enu sanana sawe vbakari nya mafumbu yatshavbo nya mambe mayigo, kha nga idzo mu dzi wonago khidzo muhuno.

¹⁶ Khu guralo, vbindrugedzani myonyo yanu, mu si bangisi dzithamo dzanu.

¹⁷ Kholu, Pfhumu Nungungulu wanu, Nungungulu nya vanungungulu ni Pfhumu nya dzipfhumu, Nungungulu nya khongolo, nya tshivba, nya guthavisege, a si hatheligo vathu, gambe a si dzumeligo gu rengeledwa;

¹⁸ a lamulago khu gululama dzikhulungu ni vamalile, ni gu gola valuveli, a va ninga guhodza ni guambala.

¹⁹ Khu guralo, golani valuveli, kholu, enu nenu mu diri valuveli tigoni ga Egipito.

²⁰ U na ninga githawo Pfhumu Nungungulu wago, u khozela Uye basi, u namarela avbo gwaye, u sambanya khu lina laye.

²¹ Pfhumu khuye wudhumo wago ni Nungungulu wago, kholu khuye a gu giredego silo sesi nya sikhongolo nya guthise, esi u si wonidego khu maho yago.

²² Vababe vago va nga relelago tigoni ga Egipito va diri basi livbandre na mavili magumi; gasi olu Pfhumu Nungungulu wago, a gu giride u andra, u tala kha nga dzinyeledzi dza ndzadzini.