Dhaniyeli 3 - Bhibhiliya Nya Guage

Dhaniyeli niloni nya gudzure

¹ Mufumeli Nabhukodhonosori a di gira gifananiso nya ndralama nya livbandre na limwedo magumi mikono gukhugega, ni magumararu mikono guanama, a gi emisa kovani ga Dhura, gipandrengulu gya Bhabhiloni.

² Mufumeli Nabhukodhonosori a di ruma gu tombanisa manganagana, dzindruna, vathangeli, valamuli, vaphari nya gyuma, madhota, dzindruna nya nyimbi ni vamwamangulu vatshavbo nya sipandrengulu, gasi guta khangula gifananiso gi nga emiswago khu mufumeli Nabhukodhonosori.

³ Khu guralo, gu di tombana manganagana, dzindruna, vathangeli, valamuli, vaphari nya gyuma, vasingalagadzi, vathangeli nya dzinyimbi ni vamwamangulu vatshavbo nya sipandrengulu, gasi guta khangula gifananiso egi mufumeli Nabhukodhonosori a nga gi emisago, vatshavbo va di emide mbeli nya gifananiso gi nga emiswago khu mufumeli.

⁴ Khavbo avbo, mutivisi nya mahungu nya litigo a di khusa lito a laledza, khuye: “Enu vathu nya mafumbu yatshavbo, mayigo ni vathu mu ganelago malimi nya guhambanelane, nyi ngu mi embelani, kheni:

⁵ Avbo mu na pwago gudzuma nya pundru, ni tsholi, ni gitendre, ni gitoliyo, ni tandrandra, ni hwambi, ni sengele ni satshavbo siwombawomba si ningago wutsendze, mu fanede gu khidzima mu khozela gifananiso nya ndralama gi emisidwego khu mufumeli Nabhukodhonosori.

⁶ Uye a na gumba khidzima a gi khozela, a na dzegela gu rinywa niloni gidhingiseloni nya gudzure ngudzu.”

⁷ Khavbo avbo, vathu vatshavbo gikhati va ngapwa gudzuma nya pundru, ni gitendre, ni hwambi, ni tsholi ni satshavbo si ningago wutsendze, mayigo yatshavbo, mafumbu, malimi, va di thega vbavbatshi va khidzimela gifananiso nya ndralama gi nga emiswago khu mufumeli Nabhukodhonosori.

⁸ Khu gikhati gyogyo, gu dita vama nya gukari nya Vakalidhiya, va dita ketsari Vajudha,

⁹ va embela mufumeli Nabhukodhonosori, khavo: “Uwe mufumeli, vbanya kala gupindruga!

¹⁰ Uwe mufumeli u emiside nayo, u leletela gukhuwe watshavbo wule a na pwago gudzuma nya pundru, sengele, gitendre, tsholi, hwambi, ni satshavbo siwombawomba nya wutsendze, a ngu yela gu thega vbavbatshi a khozela gifananiso nya ndralama,

¹¹ gasi ni wevbini a na gumba khidzima a gi khozela a na rinywa niloni nya gidhingiselo nya gudzure khu tshivba.

¹² Vomo Vajudha nya gukari avo u nga va emisago gu khala dzindruna nya gipandrengulu gya Bhabhiloni, a gu Sadraki, Misaki ni Abhedhi-Negho, vama vava, kha va khathali khuwe mufumeli, ni gu khozela vanungungulu vago, ambari gifananiso nya ndralama, u gi emisidego, kha va gi khozela.”

¹³ Khavbo avbo, Nabhukodhonosori, a di tala khu giviti nya likhulo, a rumela guya ranisa Sadraki, Misaki ni Abhedhi-Negho va va resa mbeli ga mufumeli.

¹⁴ Nabhukodhonosori a di va wudzisa, khuye: “Ina lisine, nya gupwani uwe Sadraki, Misaki ni Abhedhi-Negho, kha mu khozeli vanungungulu vangu ambari ni gifananiso nya ndralama nyi gi emisidego, gani?”

¹⁵ Gasi olu, nyi embeleni gu ni gevbini gikhati mu na gu pwago gudzuma nya pundru, nya ngoma, nya gitendre, nya hwambi, nya tsholi, nya sengele ni satshavbo siwombawomba si ningago wutsendze, khidzimani mu khozela gifananiso nyi nga gi emisago. Mwa gumba girani kharato mu na dzegela gu modwa mu rinywa niloni gidhingiseloni nya gudzure ngudzu. Hi na wona gukhethu khu wevbini Nungungulu a na gu mi vbulugisago mandzani gwangu.

¹⁶ Aholu Sadraki, Misaki ni Abhedhi-Negho, va di phindrula mufumeli Nabhukodhonosori, khavo: “Ethu kha hi vbweti gu gu ninga phindrulo khu mahungu yoyo.

¹⁷ Sa gu girega kharato, Nungungulu wathu hi mu khozelago, khuye a yelago gu hi vbulugisa mandzani gwago uwe mufumeli, ni gu hi dusa khu niloni gidhingiseloni nya gudzure.

¹⁸ Ambari a gumba hi vbulugisa, dziti gwadi uwe mufumeli, gukhuwe ethu gima kha hi na nga khozela vanungungulu vago, ambari gu khozela gifananiso nya ndralama u gi emisidego.”

¹⁹ Khavbo avbo, Nabhukodhonosori a di tala khu giviti khu gu wona Sadraki, Misaki ni Abhedhi-Negho, yi vbindrugedza ni khovbe yaye. A di ninga nayo nya gukhuye gidhingiselo nya nilo gi engedzedwa gu dzuriswa livbandre na dzimbili dzinyondro guvbindra idzo gi dzuriswago khidzo,

²⁰ a leletisa gukhuye dzindrena nya gukari nya nyimbi, dzi na hunge Sadraki, Misaki ni Abhedhi-Negho, va va rinya gidhingiseloni nya nilo nya gudzure khu tshivba.

²¹ Khavbo avbo, vama vale va di hungwa va rinywa gidhingiseloni nya nilo nya gudzure ngudzu na vari ni dzingandzu dzawe, mabhuluku, sihugu ni mabhadzi yawe.

²² Guleleta ga mufumeli gu diri ga givbiredza, gidhingiselo gi di vbiside ngudzu avbo malavbelavbe yaye ma nga songa vama vale va nga rinyago niloni, Sadraki, Misaki ni Abhedhi-Nego.

²³ Vama vava va vararu, Sadraki, Misaki ni Abhedhi-Negho, va di thega gidhingiseloni nya nilo nya gudzure na va hungidwe.

Ndzimo ya Azariya

²⁴ Va vararu va di gu gimbilagimbila vbakari nya malavbelavbe nya nilo, va dhumisa Nungungulu ni gu rungudza Pfhumu.

²⁵ Azariya na emide vbakari nya malavbelavbe nya nilo, a di gira nombelo yoyu, khuye:

²⁶ “U na rungudzwe ni gu dhumiswa Uwe Pfhumu Nungungulu wa vababe vathu! Lina Lago li na khusedzwe ndrani nya mazanazana nya myaga!

²⁷ U lulamide guvbanyani gwago gwatshavbo ni ethu, Mithumo yago yi lulamide, ni dzindzila dzago dzi lulamide ni gulamula gwago khwa idzosaye.

²⁸ U lamude khu gululama ga satshavbo U hi giredego, ni ga satshavbo U giredego lidhoropa nya guage la vababe vathu, Jerusalema; si di girwa khu gulamula gwago nya gululame, gu kala u hi ninga tsayiso yatshavbo yeyi, kotani nya sighoho sathu.

²⁹ Hi ghohide, hi giride ugo gu vivbidego hi gu hambana nago; ga satshavbo ha gu gira ugo gu vivbidego; kha hi landrisi milayo Yago.

³⁰ Kha hi theli kota khiyo muguvbanyani gwathu; kha hisayisi milayo U hi ningidego, yi nga vbweta gu hi ninga gunengela.

³¹ Ga satshavbo nya guvivbe U hi rumedego, ga sitsayiso satshavbo U hi ningidego, U thumiside gulamula nya lisine.

³² U hi ningede mandzani ga valala nya guwegele, ga vathu nya guvivbedwe khu monyo, nyambana nayo, ni ga mufumeli nyambasi wadi, nya guvivbe, guvbindra vatshavbo va mafuni.

³³ Olu kha hi nga gu tiya gambe ni gu tula likana. Dzitshoni ni givalo sa gu fenengedza sithumi sago Ni vatshavbo avo va gu khozelago.

³⁴ Khu lina Lago, U nga hi digeli muphelo, U nga tshipisi gidzumeledzwano.

³⁵ U nga dusi wuhindzi Wago avbo gwathu, khu kotani ya Abrahama pari Yago ni ya Isaki, githumi Gyago,

³⁶ U nga va thumbisago gukhuwe U na andrisa livelego lawe kha nga dzinyeledzi dza damboni, kha nga mafu nya fungu wa phwani.

³⁷ Pfhumu, hi tshisidwe vbavbatshi hi siri va gilo Mbeli nya mahigo, hi vbwasamisidwe mbeli nya vathu va mafuni gwatshavbo, khu kotani nya sighoho sathu.

³⁸ Olu hi mwalo gambe, mufumeli, mwendro muprofeti, mwendro muthangeli, hi mwalo gambe miphaso nya guvbiswe, mwendro mhamba, mwendro ningelo, mwendro libani, mwendro wulanga nya guningele avbo mihandro nya guphele, hi kodze gu mana wuhindzi.

³⁹ Khu gu dzi laya monyoni ni gu dzi sodzisa hefemuloni, hi na mane guhakwa, gukhwatshi ha guta ni miphaso nya guvbiswe nya dzihamba ni dzikuzi, ni mazanazana nya dzinvuta nya guene.

⁴⁰ Wu na khale uwo muhuno phaso wathu mahoni Gwago; wu na hi gire hi wuyelelana Nago, kholu kha va yeli gu khala dzitshoni vale va tumbago Uwe.

⁴¹ Khu monyo wathu watshavbo olu hi Gu landrelago, hi Gu rungudzago ni gu vbweta khovbe Yago. U nga hi digi hi thega dzitshoni.

⁴² Hi phare khu ndruma Yago ya matshigu yatshavbo U hi tadza khu dzithomba dza wuhindzi Wago.

⁴³ Hi vbulugise khu siliwugiso Sago, U tadza Lina Lago khu wuzundzo, Uwe Pfhumu Nungungulu.

⁴⁴ Va na fenengedzwe khu dzitshoni avo va tshanisago sithu Sago, va na khale dzitshoni khu gu dzipwa vari mwalo tshivba, na va mbembisidwe tshivbani gwawe.

⁴⁵ Kharato, va na dziti gukhavo Uwe khuwe Pfhumu Nungungulu wa moyo basi U zundzegidego mafuni gwatshavbo!

⁴⁶ Gikhati gyogyo,sithumi sa mufumeli, sile si nga va rinyago niloni, si di si garali khu gu engegedzela nilo khu sikuti ni wuluva, ni nyedi zi, ni siguni nya guvbange.

⁴⁷ Malavbevbe nya nilo wakone ma di gwela guvbindra magumana na livbandre na mina mikono vbatshani nya gikho.

⁴⁸ Ma di thendregedza ma ya vbisa Vakalidhiya va nga bani varomo bambe nya gikho.

⁴⁹ Aholu Ngilozi wa Pfhumu yi di kala ga Azariya ni vabangaladzi vaye, yiya va ndreyisela nilo nya gikho.

⁵⁰ Yi di vbindrugedza vbakari nya gikho gu khala kha nga wulanga yi furugedzago phuvbo nya gupepe nya dzimindru: Nilo kha wa va kuha, gambe kha wa va bayisa mwendro gu va pwisa guvbisa.

Ndzamu ya madzaha ya mararu

⁵¹ Madzaha ya mararu madi patana khu lito limwedo basi, ma thula ndzimo yeyi, ma rungudza ni gu khusedza ni gu zundza Nungungulu, khayo:

⁵² “ U na rungudzwe uwe Pfhumu Nungungulu wa vababe vathu: - U ngu yela gu rungudzwa ni gu khusedzwa kala gupindruga! Li na rungudzwe lina Lago nya guage nya gutale khu wudhumo: - U ngu yela gu rungudzwa ni gu khusedzwa kala gupindruga!

⁵³ U na rungudzwe nyumbani nya miphaso nya wudhumo Wago nya guage: - U ngu yela gu rungudzwa ni gu khusedzwa kala gupindruga!

⁵⁴ U na rungudzwe U belago guetani nu khilede dzikerubhimi: - U ngu yela gu rungudzwa ni gu khusedzwa kala gupindruga!

⁵⁵ U na rungudzwe Uwe khu vbagikhalotunu Gwago nya wufumu: - U ngu yela gu rungudzwa ni gu khusedzwa kala gupindruga!

⁵⁶ U na rungudzwe Uwe ndrengelengeni wa Ndzadzini: - U ngu yela gu rungudzwa ni gu khusedzwa kala gupindruga!

⁵⁷ Mithumo ya Pfhumu, mwatshavbo dhumisani Pfhumu: - Mu ningeni wudhumo ni wuzundzo kala gupindruga!

⁵⁸ Ndzadzini Dhumisani Pfhumu: - Mu ningeni wudhumo ni wuzundzo kala gupindruga!

⁵⁹ Dzingilozi dza Pfhumu, dhumisani Pfhumu: - Mu ningeni wudhumo ni wuzundzo kala gupindruga!

⁶⁰ Mati ma guromo vbatshani ndzadzini, dhumisani Pfhumu: - Mu ningeni wudhumo ni wuzundzo kala gupindruga!

⁶¹ Mifumo yatshavbp ya mafuni, dhumisani Pfhumu: - Mu ningeni whudhumo ni wuzundzo kala gupindruga!

⁶² Lidambo ni Ngima, dhumisani Pfhumu: - Mu ningeni wudhumo ni wuzundzo kala gupindruga!

⁶³ Dzinyeledzi dza Ndzadzini, dhumisani Pfhumu: - Mu ningeni wudhumo ni wuzundzo kala gupindruga!

⁶⁴ Ndzadzi ni mumya, dhumisani Pfhumu: - Mu ningeni wudhumo ni wuzundzo kala gupindruga!

⁶⁵ Dziphuvbo dzatshavbo, dhumisani Pfhumu: - Mu ningeni wudhumo ni wuzundzo kala gupindruga!

⁶⁶ Nilo ni malavbelavbe, dhumisani Pfhumu: - Mu ningeni wudhumo ni wuzundzo kala gupindruga!

⁶⁷ Girame ni guvbisa, dhumisani Pfhumu: - Mu ningeni wudhumo ni wuzundzo kala gupindruga!

⁶⁸ Mumya ni thondrwane, dhumisani Pfhumu: - Mu ningeni wudhumo ni wuzundzo kala gupindruga!

⁶⁹ Gudzidzila ni gupepa, dhumisani Pfhumu: - Mu ningeni wudhumo ni wuzundzo kala gupindruga!

⁷⁰ Girame ni dzihunguva, dhumisani Pfhumu: - Mu ningeni wudhumo ni wuzundzo kala gupindruga!

⁷¹ Wutshigu ni Mihani, dhumisani Pfhumu: - Mu ningeni wudhumo ni wuzundzo kala gupindruga!

⁷² Guwonegela ni gidema, dhumisani Pfhumu: - Mu ningeni wudhumo ni wuzundzo kala gupindruga!

⁷³ Gulasa ni mapfhi, dhumisani Pfhumu: - Mu ningeni wudhumo ni wuzundzo kala gupindruga!

⁷⁴ Litigo li na dhumise Pfhumu: - Mu ningeni wudhumo ni wuzundzo kala gupindruga!

⁷⁵ Sigomo ni sigomwana, dhumisani Pfhumu: - Mu ningeni wudhumo ni wuzundzo kala gupindruga!

⁷⁶ Satshavbo si bugago mafuni, dhumisani Pfhumu: - Mu ningeni wudhumo ni wuzundzo kala gupindruga!

⁷⁷ Yiphwa ni mitsongo, dhumisani Pfhumu: - Mu ningeni wudhumo ni wuzundzo kala gupindruga!

⁷⁸ Sifefe, dhumisani Pfhumu: - Mu ningeni wudhumo ni wuzundzo kala gupindruga!

⁷⁹ Sirengo nya sikhongolo sa linene ni satshavbo si vbanyago matini, dhumisani Pfhumu: - Mu ningeni wudhumo ni wuzundzo kala gupindruga!

⁸⁰ Sinyoni satshavbo sa damboni, dhumisani Pfhumu: - Mu ningeni wudhumo ni wuzundzo kala gupindruga!

⁸¹ Sirengo satshavbo, sa khabini ni sifuyo, dhumisani Pfhumu: - Mu ningeni wudhumo ni wuzundzo kala gupindruga!

⁸² Enu vathu va tigoni, dhumisani Pfhumu: - Mu ningeni wudhumo ni wuzundzo kala gupindruga!

⁸³ Israyeli a na dhumise Pfhumu: - Mu ningeni wudhumo ni wuzundzo kala gupindruga!

⁸⁴ Vaphasi nya mhamba, dhumisani Pfhumu: - Mu ningeni wudhumo ni wuzundzo kala gupindruga!

⁸⁵ Sithumi sa Pfhumu, dhumisani Pfhumu: - Mu ningeni wudhumo ni wuzundzo kala gupindruga!

⁸⁶ Maphuvbo ni mihefemulo ya va nya gululame, dhumisani Pfhumu: - Mu ningeni wudhumo ni wuzundzo kala gupindruga!

⁸⁷ Va nya guaga ni gu dzi sodzisago monyoni, dhumisani Pfhumu: - Mu ningeni wudhumo ni wuzundzo kala gupindruga!

⁸⁸ Ananiya, Azariya ni Mikayeli dhumisani Pfhumu: - Mu ningeni wudhumo ni wuzundzo kala gupindruga! Kholu a hi tshudziside wulangani nya gidema: A hi vbanyiside ga tshivba nya lufu; a hi duside gikhoni nya gungangamele, a gu hi dusa khu vbakari nya nilo.

⁸⁹ Dhumisani Pfhumu, kholu khwadi, Kholu wuhindzi waye wu ngu simama kala gupindruga.

⁹⁰ Enu mu khodwago ni gu ninga githawo Pfhumu, Nungungulu wa vanungungulu, mu rungudzeni ni gu Mu khusedza, kholu wuhindzi waye wu ngu simama kala gupindruga!”

⁹¹ Khavbo avbo, Mufumeli Nabhukodhonosori a di samala a dzegela gu khuga a ema, a embela dzindruna dzaye, khuye: “Gasi khandri vama vararu hi nga va rinyago niloni, gani?” Avo va di embela mufumeli, va hakha, khavo: “Ina Mufumeli, lisine u ganelago!”

⁹² Uye a di hakha, khuye: “Eni nya gu wona vama vana nyamba hungwa va gimbila gimbilago vbakari nya nilo nyambavbya, giyemo gya uye nya wu na gya gu fanana ni mwamana wa vanungungulu.”

⁹³ Khavbo avbo, Nabhukodhonosori, a di hidzimela vbafuvbi nya mwanya nya gidhingiselo nya gudzure a laledza, khuye: “Sadraki, Misaki ni Abhedhi-Negho, sithumi sa Nungungulu a Khusegidego ngudzu, dugani mute eno!” Khavbo avbo, Sadraki, Misaki ni Abhedhi-Negho, va di duga khu vbakari nya nilo.

⁹⁴ Khavbo avbo, manganagana ni dzindruna, vafumeli, ni vasingalagadzi va mufumeli, va di tombana va wona nya gukhavo, khidzo kamwe nilo wu diri mwalo tshivba sivilini ga vama vale, kholu ambari ni ndzudzu moyo basi wa hungoni gwawe kha wavbya gilo, ambari mabhadzi yawe kha mavbya, ni mahema nya guyeyedze gupwani va diri niloni kha mapwali.

⁹⁵ Nabhukodhonosori a di ganela, khuye: “A na dhumiswe Nungungulu wa Sadraki, Misaki ni Abhedhi-Negho, a rumedego ngilozi yaye yita vbanyisa sithumi saye, si mu tumbidego, kholu kha va dzumela gu landrisa magana ya mufumeli, si hatha gu ningela sivili sawe, guvbindra gu khozela mumbe nungungulu, vbavbandze ga Nungungulu wawe.”

⁹⁶ “Khu guralo, eni nyi leletede gukheni muthu watshavbo wa levbini litigo, lifumbu ni lidimi a na ganelago guvivba khu Nungungulu wa Sadraki, Misaki ni Abhedhi-Negho, a na vbadzuledwe ni dzinyumba dzawe dzi na khale matala nya marumbi, kholu mwalo mumbe nungungulu a kodzago gu vbanyisa kha nga oyu.”

⁹⁷ Khavbo avbo, mufumeli a di khusedza Sadraki, Misaki ni Abhedhi-Negho, umo nya gipandrengulu gya Bhabhiloni.

Ndroro nya yiphya ya mufumeli

⁹⁸ Mufumeli Nabhukodhonosori, a di rumela ga mayigo yatshavbo, mafumbu ni vathu nya malimi yatshavbo va vbanyago mafuni gwatshavbo, gukhuye: Gurula gu na khale nenu!

⁹⁹ Nyi di wona na si lulamide gu yeyedza siwonegiso ni siliwugiso Nungungulu a khusegidego ngudzu, a si giridego avbo gwangu.

¹⁰⁰ Idzo si gu sikhongolo khidzo siwoniso saye, nidzo si gu ni tshivba khidzo! Mufumo waye khwa gu kala gupindruga, gufuma gwaye gwa gu thaphela mimela ni mimelana.