Dhaniyeli 2 - Bhibhiliya Nya Guage

Ndroro ya Nabhukodhonosori

¹ Khu mwaga nya wuvili nya gufume ga Nabhukodhonosori, uye a di lora dzindroro, a hambanega khidzo mapimo a si mani ligovbe.

² Khu guralo, mufumeli a di rumela gu tombaniswa dzinyanga, valoli nya dzisolo, va nya sikwembu ni vagengeli nya Vakalidhiya, vata mbeli ga mufumeli gasi vata mu ninga tshamuselo nya esi a nga lorago,

³ uye a di va embela, khuye: “Nyi loride ndroro nyi garadzegago khiyo muliphuvboni gwangu, nya gu vbweta guti tshamuselo yaye.”

⁴ Vakalidhiya va di embela mufumeli khu Gisiriya khavo: “Uwe Mufumeli vbanya kala gupindruga! Hi embele ndroro yago, ethu sithumi sago, hi na gu ninga tshamuselo waye.”

⁵ Mufumeli a di ninga phindrulo Vakalidhiya, khuye: “Nyi fungide gukheni mwa gumba nyi ningani tshamuselo nya ndroro yeyi, mwatshavbo mu na vbadzuledwa mu tshala khu sipandre, dzinyumba dzanu dzi khala matala.

⁶ Aholu mwa gu nyi ningani tshamuselo yaye, mu na hakhani khu mandzani gwangu siningwa nya lisima nya guzundzege; gasi olu, nyi embeleni ndroro yangu ni gu nyi ningani tshamuselo yaye.”

⁷ Va di engedza va mu hakha, khavo: “Mufumeli, embela ndroro yago sithumi sago, ethu hi na gu ninga tshamuselo yaye.”

⁸ Mufumeli a di va hakha, khuye: “Nyi ngu dziti gwadi gukheni enu mwa gu vbweta gu ndrindra gikhati, kholu mu ngu dziti gukhenu eni nyi fungide gu mi tsayisa mwa gumba nyi ninga tshamuselo nya ndroro yeyi.

⁹ Ni gukheni mwa gumba kodza gu nyi ninga tshamuselo mwatshavbo tsayiso wanu moyo basi! Kholu mu lugide makungo nya malipha gasi guta nyi kanganyisa khayo kala gikhati gi vbindra. Gasi olu, nyi embeleni ndroro gasi nyi kodze gu wona gukheni mu ngu kodza gu nyi ningani tshamuselo.”

¹⁰ Vakalidhiya va di ema mbeli ga mufumeli va mu phindrula, khavo: Mwalo muthu omu mafuni a dzi kodzago gu ninga phindrulo nya esi uwe mufumeli u si lombago! Ambari dzipfhumu nya dzikhongolo dzi gu ni tshivba, gima dzi si gu lombi ga dzinyanga, ga va nya sikwembu ni ga Vakalidhiya, silo nya nga esi.

¹¹ Iso u si lombago uwe mufumeli si ngu garadza, mwalo ni moyo a na gu emago mbeli ga mufumeli a mu ninga tshamuselo, vbavbandze nya vanungungulu, va gumba khala nyamani nya vathu.

¹² Magana yaya ma di gorogisa ngudzu mufumeli guvbindra pimo; uye a di ruma gukhuye va songwa vatshavbo vagengeli va Bhabhiloni.

¹³ Avbo gu nga duswa nayo yoyu nya gusongetedwe vatshavbo vagengeli, va diya dzega Dhaniyeli gumogo ni dzipari dzaye, gasi vata songwa navo.

Nungungulu a ngu wonisa Dhaniyeli tshamuselo nya ndroro

¹⁴ Khavbo avbo, Dhaniyeli a di ganela khu wusingalagadzi ni guti, ga Ariyoki, ndruna nya vavhikeli va mufumeli, uye a nga bani na ningidwe nayo nya gusonge vagengeli va tigoni ga Bhabhiloni.

¹⁵ Uye a di wudzisa ndruna ya mufumeli, khuye: “Khu ginani mufumeli a dusidego nayo yoyu nya gulemele ngudzu?” Khavbo avbo, Ariyoki a di tshamusela Dhaniyeli iso si giregidego.

¹⁶ Khavbo avbo, Dhaniyeli a di hongola ga mufumeli, aya mu lomba gukhuye a mu ninge gikhati nya gu mu tshamusele ndroro yaye.

¹⁷ Dhaniyeli a di wuya gaya, ata embeledzela mahungu yaya dzipari dzaye Hananiya, Misayeli ni Azariya,

¹⁸ gasi va lomba wuhindzi ga Nungungulu wa ndzadzini gu a va pwela wusiwana a va tugudzisa sihalo yoyu gasi va si mbembiswi gumogo ni vagengeli va Bhabhiloni.

¹⁹ Khavbo avbo, Dhaniyeli a di tugudziswa sihalo nya ndroro khu gu loriswa ni wutshigu. Dhaniyeli a di rungudza Nungungulu wa ndzadzini.

²⁰ Dhaniyeli a di ganela, khuye: Li na rungudzwe lina la Nungungulu kala gupindruga; kholu tshivba ni guti sa gu lumba uye.

²¹ Uye a ngu vbindrugedza dzinango ni gikhati, uye a ngu dusa vafumeli ni gu tiyisa vafumeli, uye a ngu ninga guti va nya gugengela ni wugengeli ga va nya mapimo.

²² Uye a ngu tugudzisa silo nya guete niso si sihadego; khuye atigo iso si guromo gidemani guwonegela gwa gu khala avbo gwaye.

²³ Eni nyi ngu gu bonga ni gu gu rungudza, uwe Nungungulu wa vababe vangu; khuwe u nyi ningidego guti ni tshivba, olu u nyi yeyedzide iso hi gu lombidego, kholu u hi tugudziside mahungu yaya ya mufumeli.

²⁴ Khu guralo, Dhaniyeli a diya wonana ni Ariyoki, uye a nga bani na emisidwe gu khala musaseli wa vagengeli vatshavbo va Bhabhiloni; a mu embela, khuye: “U nga songi vagengeli va Bhabhiloni, nyi yise mahoni ga mufumeli, gasi nyi ya mu ninga tshamuselo nya ndroro yaye.”

²⁵ Ariyoki a di dzegela gu dzega Dhaniyeli a mu yisa mbeli ga mufumeli a mu embela kharati, khuye: “Nyi manide moyo vbakari nya dzikhumbi dza Judha, a na gu tshamuselago mufumeli ndroro yaye.”

²⁶ Mufumeli a di wudzisa Dhaniyeli, a nga bani na gu ranwa gambe pwani khu Bhalitazari, khuye: “Ina uwe u nga dzi kodza gu nyi pwadzela ndroro nyi nga yi wonago ni gu nyi ninga tshamuselo waye, gani?”

²⁷ Dhaniyeli a di hakha, khuye: “Mwalo ni moyo mugengeli, va nya gulola dzisolo, ni avo vatigo dzinyeledzi mwendro dzinyanga, a dzi kodzago gu ninga tshamuselo nya ndroro ya mufumeli.”

²⁸ Aholu womo Nungungulu moyo ndzadzini a tugulago misihalo; uye a pwadzede mufumeli Nabhukodhonosori, iso si na gu mu dugelelago matshiguni yaye nya guhegise. Ndroro yago ni siwoniso sa vbadawutunu gwago khesi:

²⁹ Avbo u nga bani nu lade vbadawutunu gwago, uwe mufumeli, u tedwe khu gupimisa nya iso si na gu gudugelelago khu matshigu ma nga gutago; kholu uye a tugudzisago misihalo, a gu yeyedzide iso si na gu dugelelago.

³⁰ Gasi avbo gwangu nyi tuledwe sihalo yoyu, nasi khu guti guvbindra vambe va vbanyago mafuni, ahihi; aholu gasi nyi kodza gu pwadzela mufumeli tshamuselo ni guti iso si dugeledego mapimoni gwago.

³¹ Uwe mufumeli, u di gu wona mbeli gwago, gi diromo gifananiso nya gikhongolo, nya gulaphe, gungangamela gwaye gu di samadzisa, muthu a gu gi wona a di tala khu hwanga.

³² Hungo nya gifananiso gyogyo wu diri wa ndralama nya guhutwe, khana ni mawogo yaye, si diri sa parata, girumbu ni dzinyonga dzaye, dzi diri dza sugu,

³³ mawundru, ma diri ya simbi, migondro yakone, gimbe gipandre a diri simbi, gimbe a diri libumba.

³⁴ Avbo u nga bani u gi wona, gu di thindriliga giwindri khu gigomoni nyamba rinywa khu muthu gi ta veta migondro nya gifananiso gi khungumuga.

³⁵ Khavbo avbo, simbi, libumba, sugu, parata ni ndralama si di khungumuledwa, si gira nga mungu nya tirigu nya guvbudwe vbamarongatunu, si di vbuvbiswa khu phuvbo si mwalalega. Aholu giwindri gi nga pandra gifananiso gi di vbindrugedza gi khala gigomo nya gikhongolo gi fenengedza litigo latshavbo.

³⁶ Eyi khu ndroro u loridego, tshamuselo yaye, hi na gu ninga mufumeli.

³⁷ Uwe pfhumu, mufumeli nya khongolo guvbindra vafumeli vatshavbo, Nungungulu wa ndzadzini a gu ningide mufumo, gufuma, tshivba ni wugulu.

³⁸ Malangani yatshavbo a gu ningide vathu, sirengo sa khabini ni sinyoni sa damboni, a si ningede mandzani gwago, gasi satshavbo si fumwa khuwe, hungo nya ndralama khuwe.

³⁹ Khu hwane gwago, gu na vegwa wumbe mufumo nya wuphya nya wudugwana gu vbindrwa khuwo wago. Khu gu landrela, gu na emiswa mufumo nya wuraru nya sugu, uwo wu na fuma mafuni gwatshavbo.

⁴⁰ Gasi mufumo nya wu na, wu na bani wuri ni tshivba, na wu tiyide nga simbi. Kholu kha nga simbi yi phwatiselago ni gu tshigira silo satshavbo, kharato nuwo kha nga simbi yi phwatiselago silo satshavbo, uwo nuwo wu na tshigira ni gu phwatisela.

⁴¹ Gasi iso u si wonidego migondroni ni dzinyalani gwaye, limbe liphuvbo gu nga bani nari simbi gumbe libumba, gu na bani nari mufumo nya gu kabaniswe khu vbakari, ambari khu kharato, wu na bani wuri ni tshivbanyana yidugwana nya nga simbi, ambari u wu wonidego na wu patedzedwe ni libumba.

⁴² Kha nga olu dzinyala limbe liphuvbo gu nga bani na guri ga simbi limbe nya libumba, uwo nuwo mufumo wowo, gimbe gipandre gi na tiya, gimbe gipandre wu na vbevbuga.

⁴³ Kha nga u wonidego gukhuwe, simbi yi di patedzedwe ni libumba, va na patedzelana khu gu dzegana ni mambe mafumbu, aholu kha va na tshangana gwadi khu gu vbelela, kholu simbi ni libumba kha si pfangani.

⁴⁴ Khu matshiguni ya vafumeli vovo, Nungungulu wa ndzadzini a na emisa wumbe mufumo nya gu gima kha wu na khoziswa khu mambe mafumbu. A na pfhungumula ni gu mbembisa mifumo yatshavbo ya vafumeli vale, mufumo waye wu na tiya kala gupindruga.

⁴⁵ “Kha nga u wonidego nya gukhuwe, khu gigomoni gu di wumbuluga giwindri nyamba pidwa khu muthu, gita pfara ni gu phwatisela simbi, sugu, libumba, parata ni ndralama. Nungungulu nya Tshivba Yatshavbo tiviside mufumeli iso si na gu giregago khu matshigu ma natago. Eli khu lisine nya ndroro, tshamuselo yaye yi tiyide khya lisine.”

⁴⁶ Khavbo avbo, mufumeli Nabhukodhonosori, a di thega khu khovbe a khozela Dhaniyeli, a leletela gukhuye a giredwa miphaselo nya guhodze ni mafura nya gunungele.

⁴⁷ Mufumeli a di embela Dhaniyeli, khuye: “Kha nyi kanakani nyi ngu tiyisa gukheni Nungungulu wanu, Nungungulu nya vanungungulu, ni Pfhumu nya vafumeli, khuye a tugulago iso si sihadego, kholu u kodzide gu nyi tshamusela sihalo yoyu.”

⁴⁸ Khavbo avbo, mufumeli a di dandrisa Dhaniyeli, a mu ninga sihiwa nya singi, ni gu mu emisa gu khala mwamangulu nya gipandrengulu gya Bhabhiloni, gumogo ni gu khala muthangeli wa vagengeli vatshavbo va Bhabhiloni.

⁴⁹ Dhaniyeli a di lomba ga mufumeli gu a emisa Sadraki, Misaki ni Abhedhi-Negho, gu khala dzindruna nya gipandrengulu gya Bhabhiloni, gasi Dhaniyeli a di tshala umo nya huwo ya mufumeli.