Dhaniyeli 14 - Bhibhiliya Nya Guage

IV. DHANIYELI NI VAPHASI NYA MHAMBA VA BHELI

¹ Gufani ga Mufumeli Atige, Kiro Muperesi, a di khala vbagikhalotunu nya wufumu.

² Dhaniyeli a di gu vbanya ni mufumeli, gambe a di gu ningwa wuzundzo ngudzu guvbindra dzatshavbo dzimbe dzipari dza mufumeli.

³ Vbakari nya vathu va tigoni, gu diromo githombe nya nungungulu nya malipha nya gupwani khu Bheli, oyu khu litshigu ni litshigu a nga bani na gu dusedwa likhumi na mivili mipimo nya wuguvbi, magumana dzihamba ni livbandre na moyo mipimo nya vbinyu.

⁴ Mufumeli a di gu phasela githombe, matshigu yatshavbo a di ya gi khozela, aholu, Dhaniyeli a di khozela Nungungulu waye.

⁵ Mufumeli a di mu wudzisa, khuye: “Khu ginani u si khozeligo Bheli?” Dhaniyeli a di hakha, khuye: Kholu eni kha nyi khozeli nungungulu nya malipha nya gugirwe khu mandza nya vathu, aholu nya gukhozela Nungungulu a vbanyago, Muvangi nya ndzadzi ni mafu, a fumago vbatshani nya vathu vatshavbo.”

⁶ Mufumeli a di engedza, khuye: “Khu guralo, Bheli khu mu woni kha nga nungungulu a vbanyago! Khu woni satshavbo a hodzago ni gu sela matshigu yatshavbo, gani?”

⁷ Dhaniyeli a di hega a mu hakha khuye. Hapfhula, mufumeli; nungungulu yoyu khu ndrani libumba, khu vbavbandze sugu, gima kha hodzi mwendro gu sela.” Mufumeli a di goroga a ranisa vaphasi nya mhamba va Bheli a va embela, khuye:

⁸ “Mwa gumba nyi embelani khu mani a hodzago miningelo yeyi, mu nafani. Aholu mwa gu nyi yeyedzani nya gukhenu khu Bheli a hodzago, anafa Dhaniyeli, kholu a mu hembulude!”

⁹ Dhaniyeli a di hakha mufumeli, khuye: “Gu na girege kha nga idzo u ganelago.” Va diri livbandre na mavili magumi vaphasi nya mhamba va Bheli, nyamba saya vanyamayi ni sanana.

¹⁰ Mufumeli a di hongola nyumbani nya miphaso ya Bheli na gu bangaladwa khu Dhaniyeli.

¹¹ Vaphasi nya mhamba va di ganela, khavo: “Ethu hi na duga. Uwe mufumeli ruma gu reswa guhodza na gu pfangidwe gumogo ni vbinyu; khu hwane nya ugo, sega lidimba u li vega gitambo nya phera yago. Mindru vbadzimindrutunu gikhati u na belago nyumbani nya miphaso, wa gu wona nya gukhuwe silo satshavbo kha sa hodzwa khu Bheli, hi nafa; khu mambe magirelo, anafa Dhaniyeli a nga hi hembululago.”

¹² Va di tade khu gutiya kholu va di pode gihogo nya gusihalege khu vbavbatshi nya meza, va nga bani va gu bela khavbo vaphasi nya mhamba matshigu yatshvbo gasi guta dzega miningelo.

¹³ Hwane nya gu na va dugide, avbo mufumeli a vegedzedego guhodza mbeli ga Bheli,

¹⁴ Daniyeli a di ruma sithumi gu resa nguma ata wu swayela nyumbani gwatshavbo, na gu wonwa basi khu mufumeli. Khavbo avbo, va di duga va sega lidimba. Hwane nya gu na va vegide gitambo nya wufumu vbalidimbatunu.

¹⁵ Ni vbakari nya wutshigu, kha nga giolovedzo gyawe, va di bela vaphasi nya mhamba ni vagadzi vawe ni sanana sawe, va gu hodza ni gusela satshavbo.

¹⁶ Gukhugani nya lidambo, a dita mufumeli gumogo ni Dhaniyeli. Mufumeli a di wudzisa, khuye:

¹⁷ “Sitambo si nga romo wulangani gwawe, gani Dhaniyeli?” Dhaniyeli a di hakha, khuye: “Ina, mufumeli, somo wulangani gwawe.”

¹⁸ Avbo a nga tulago lidimba, a gu khedzisa vbamezatunu, mufumeli a di ganela khu lito nya gukhusege, khuye: “Uwe Bheli, u khongolo, khwa hi kanganyisa.”

¹⁹ Aholu Dhaniyeli a di hega, a gu himbedzela mufumeli guya mbeli, a mu embela, khuye: “Khedzisa gwadi vbavbatshi. Khya vamani migondro yeyi?”

²⁰ Mufumeli a di hakha, khuye: “Nyi ngu yi wona, khu lisine. Migondro nya vama, vanyamayi ni sanana.”

²¹ Na gorogide, mufumeli a di ruma gu modwa vaphasi nya mhamba gumogo ni vagadzi vawe ni sanana. Avo furi khavo va nga mu yeyedzago gihogo nya gusihalege va nga bani va bela khavo vaya hodza iso si nga bani si romo vbatshani nya meza.

²² A di ruma gukhuye va songwe, a gu ningela Bheli ga Dhaniyeli a gira gugola gwaye. Uye a di pfhungumula Bheli ni nyumba yaye nya miphaso.

Dhaniyeli a ngu rinywa phalani nya dzinghala

²³ Gu di romo gambe mwamilambo nya khongolo a nga bani na gu khozedwa khu Vabhabhiloni.

²⁴ Mufumeli a di embela Dhaniyeli, khuye: “Uwe wa gu vbweta gambe gukhuwe wule nungungulu nya sugu gani? A ngu vhanya, a ngu hodza ni gusela. Khu dzi kodzi gu ganedza gukhuwe oyu nungungulu avbanyago. Khu kharato, mu khozele.” Dhaniyeli a di phindrula, khuye:

²⁵ “Eni nya nyi khozeli mumbe nungungulu vbavbandze ga Pfhumu Nungungulu wangu basi, kholu Uye Nungungulu a vbanyago. Nyi dzumedzise, uwe mufumeli, eni, nyambana litshari mwendro simbo, nyi na songa mwamilambo.”

²⁶ Mufumeli a di hakha, khuye: “Nyi ngu gu dzumedzisa.” Khavbo avbo, Dhaniyeli a di dzega nyedzi, ni mafura ni mawoya; a ruma gu phula na si pfangidwe satshavbo gumogo, a gira sitsidwa a si rinyela kanani ga mwamilambo, uye a di vbophoga.

²⁷ Dhaniyeli a di ganela, khuye: “Kha mu gi woni avbovbo egi mu gi khozelago!”

²⁸ Vabhabhiloni na va matide mahungu yoyo, va di goroga ngudzu; va di wugela mufumeli, va gu laledza khavo: “Mufumeli vbindrugedzide a dzi gira Mujudha, pfhungumude Bheli, songide mwamilambo a gu sasela vaphasi nya mhamba.”

²⁹ Va dita ga mufumeli gasi guta mu embela, khavo: “Hi ningedze Dhaniyeli, wa gu wo, hi na songa uwe ni ngamo yago yatshavbo.”

³⁰ Na gu wona dzihanyi va nga bani va guta mu thusedzela khidzo, mufumeli a di gurumedzwa gu ningela Dhaniyeli.

³¹ Avo va di mu dzega va mu rinya phalani nya dzinghala, a gu khala umo livbandre na limwedo matshigu.

³² Phalani mule dzi di roma livbandre na dzimbili dzinghala va nga bani va dzi ninga matshigu yatshavbo sirumbi sivili ni dzihamba dzimbili.

³³ Aholu, matshigu yale kha va nga dzi ninga gilo khu gufela gukhavo dzi vbadzulela Dhaniyeli.

³⁴ Khu gikhati gyogyo, a di gu vbanya tigoni ga Judheya muprofetii Habhakuki. A di ngari gu phula mapunga a gu thela guhodza gifugoni a gu hongola naso gundze a ya ningela vavbweri. Aholu Ngilozi ya Pfhumu yi di mu embela, khiyo: Dzega guhodza gogu u hongola nago Bhabhiloni, ga Dhaniyeli a guromo phalani nya dzinghala.”

³⁵ Habhakuki a di hakha, khuye: “Pfhumu yangu, eni gima nyi si gu woni Bhabhiloniya, gambe kha nyi liti liphala lolo.”

³⁶ Khavbo avbo, Ngilozi yi di mu phara khu vbatshani nya hungo yi mu khusa khu ndzudzu, khu furugedzo, kala Bhabhiloni, khu vbatshani nya liphala.

³⁷ Habhakuki a di rana, khuye: “Dhaniyeli, Dhaniyeli, hakha guhodza u rumedwago khu Nungungulu.”

³⁸ Dhaniyeli a di hakha, khuye: “Oh, Nungungulu u nyi alakanyidego! Khwa diga avo va gu golago.”

³⁹ Dhaniyeli a du wuga a hodza, Ngilozi ya Pfhumu na yi gu vbwelegedza Habhakuki gaya gwaye.

⁴⁰ Khu litshigu nya livbandre na mavili, mufumeli a dita gasi guta lila Dhaniyeli. Na vbohide vbafuvbi ni liphala, a di khedzisa ndrani nya liphala a wona Dhaniyeli na khade.

⁴¹ A di laledza, khuye: “Uwe u khongolo, Pfhumu Nungungulu wa Dhaniyeli! Mwalo mumbe Nungungulu vbavbandze ga Uwe basi!”

⁴² A di ruma gu mu dusa khu phalani nya dzinghala, va gu rinya umo vatshavbo vale va nga vbweta gu mu mbembisa. Na gu va wona, va di dzegela gu vbadzuledwa.

⁴³ Mufumeli a di ganela, khuye: “Vathu vatshavbo va mafuni va na ninge githawo Nungungulu wa Dhaniyeli, kholu khuye muvbanyisi a girago siliwugiso mafuni; khuye a nga vbulugisago Dhaniyeli phalani nya dzinghala!