Dhaniyeli 13 - Bhibhiliya Nya Guage

III. MATIMU YA SUZANA Suzana manidwe nyambana nandru

¹ A diromo mwama moyo nya gupwani khu Jowakimi, a nga bani na gu vbanya tigoni ga Bhabhiloniya.

² A di dzegide nyamayi nya gupwani khu Suzana, nyamahegyane wa Helikiya, nya wumburi ngudzu ni githawo ga Pfhumu Nungungulu,

³ kholu a di layidwe khu vavelegi vaye va nga bani vari vathu nya gululame ni gu landrisa Nayo wa Mosi.

⁴ Jowakimi adiri muthu nya gufume dzithomba nya dzingi. Vbafuvbi ni ndranga yaye, adiri ni lithembwe; dzinyondro nya dzingi Vajudha va di gu tala guya tshangana ndrangani gwaye, kholu a di gu ningwa ngudzu githawo vbakari nya vatshavbo va na gyawe.

⁵ Mwagani mule, va di hathidwe gu khala valamuli nya mahungu, madhota mavili nya libandla. Ga avo, ma di tadzisega magana ya Pfhumu Nungungulu, ma gu khayo: “Wuvivbi wu dzude khu Bhabhiloniya, ni madhota ni valamuli, va nga bani va gu wonwa kha nga gimbidzisi nya vathu.”

⁶ Madhota yoyo ya mavili ma di gu tala guta ndrangani ga Jowakimi, va di guta vata va vbweta avbo vathu vatshavbo va nga bani vari ni guganedzisana.

⁷ Khu gikhati nya vbakari nya mihani, vathu vatshavbo vovo na va phalalegide, Suzanaa a di gu duga a ya pepa thembeweni ga mwama waye.

⁸ Madhota ya mavili ma di gu mu wona matshigu yatshavbo khu gikhati nya gupepe, iso si nga gira gu myonyo yawe yi mu dogorela khu tshivba ni tshivba.

⁹ Va di vbela mapimo va si kodzi ni gu hambanisa iso nya guvivbe niso nya sadi.

¹⁰ Vavavili va di dzi hodzedzela khu gudogorela Suzana, aholu nyamba embeledzana khu gyawe gudogorela nya myonyo yawe.

¹¹ Moyo ni moyo a dipwa dzitshoni gu embela kwawe khu mahungu nya lidora a nga bani nari nalo nya guvbwete gubhaya naye.

¹² Matshigu yatshavbo, va di garadzega, khu gu vbweta gikhati nya gu mu holelelele.

¹³ Gikhati nya gukari, va di embeledzana khu gyawe, khavo: “Hongole gaya, kholu gikhati nya guambule.” Moyo ni moyo a di duga khu yaye ndzila.

¹⁴ Aholu, vavavili va di wuya hwane, va ta manana dangamwedo. Na va wudzisanide khu gyawe mayelano khu gighelo nya guwuye gwawe hwane, moyo ni moyo a di dawulela ga kwawe gudogorela gwaye. Khavbo avbo, va di pwanana gu vbweta gikhati nya gyadi nya gumane Suzana nari uye ekha. Va di hevbula gikhati nya gyadi.

¹⁵ Litshigu limwedo, kha nga giolovedzo gyaye, Suzana a di vboha na gu bangaladzwa basi khu sithumi sivili nya vanyamahegyane, a di gu dzi dongisela gu hamba thembweni, kholu gu di gu vbisa.

¹⁶ Gudiri mwalo muthu wulanga wule, vbavbandze ga madhota ya mavili basi, ma nga bani ma sihade ma mu holelela.

¹⁷ Suzana a di embela dzimbiri dzile dzi nga bani dzi mu bangaladza, khuye: “Nyi reseleni mafura nya gunungele, mu sega malimba nya lithembwe, gasi nyi fela gu hamba.”

¹⁸ Avo va di gira iso va nga rumwago, na va segide malimba nya lithembwe, va di duga khu mwanya wa magumbini, va ya vbweta iso va nga lombwago; va di si dziti gukhavo madhota ma di sihade vbale.

¹⁹ Me di gu duga vanyamahegyane, vama va vavili va di hidzimela khu guvbiredza ga Suzana.

²⁰ Va mu embela, khavo: “Malimba nya lithemwe ma segidwe, mwalo a hi wonago, ethu hi ngu dagarela khu gu gu dogorela. Dzumela, u dzi ningele ga ethu.

²¹ Wa gu wo, hi na gu thuledza. Hi na khethu udiri gumogo ni lidzaha ni gukhethu khigyo ginga gu gira u tutumisa sithumi nya vanyamahegyane.”

²² Suzana, na garadzegide ngudzu a di ganela, khuye: “Nyi randredwe khu sigaradzo khu maphuvbo yatshavbo! Nya gu gira isoso, nyi na mana lufu. Ambari nya gumba gira gambe, gima kha nyi na vbuluga mandzani gwanu.

²³ Aholu eni nya gu wona nari tshukwana gu thegela mandzani gwanu, nyamba gira guvivba, guvbindra gu ghohela Pfhumu Nungungulu.”

²⁴ Khavbo avbo, Suzana a di womba huwa khu tshivba, aholu madhota yale ya mavili ma di womba nayo huwa gumogo naye;

²⁵ moyo wawe a di tutumela mwanyatunu nya lithembwe a ya tula malimba.

²⁶ Vathu va ndrangani, na va pwide ligwaha lolo, va di tutuma khu guvbiredza vaya mwanyatunu wa magumbini, gasi guya wona ginani gi dugeledego.

²⁷ Na si pwide esi ma nga ganelago madhota, sithumi si di tala khi dzitshoni, kholu gima va di si gupwi na gu ganedwa silo nya nga sile khu mahungu ya Suzana.

²⁸ Khu mindru gakone, madhota ya mavili na ma gu fumedwa khu gikungu nya wughevenga nya guvbwete gu girela guvivba Suzana, va dita tshanganotunu wunga manegago ndrandrani ga mwama waye Jowakimi;

²⁹ a ganela mbeli ga vathu vatshavbo, khavo: Va na hongole va ya vbweta Suzana, nyamahegyane wa Helekiya, mwangadzi wa Joawakimi!” Va di hongola va ya mu vbweta.

³⁰ Uye a dita ni vavelegi vaye, ni sanana, gumogo ni valongo va ndrangani gwaye.

³¹ Suzana adiri wa giemo nya gutsakise ni khovbe nya gumbure.

³² Kha nga a nga bani a fenengedzidwe khovbeni, vama vava nya guvivbedwe khu monyo, na va gu dwanela gu dzi tsakisa khu gu wona wumburi nya khovbe yaye, va di ruma gu mu funungula mwendra.

³³ Va di lila vatshavbo valongo vaye ni vatshavbo vale va nga bani va gu muti.

Suzana a ngu singedzwa khu madhota

³⁴ Madhota ya mavili ma di khuga va ema mbeli nya vathu vatshavbo, va gu handzega mandza hungoni ga Suzana,

³⁵ uye a di naganide khu marongo aholu monyo waye na wu tade khu gitumbo ga Pfhumu Nungungulu, a di khedzisa Ndzadzini.

³⁶ Khavbo avbo, madhota ma di ganela, khayo: “Gikhati hi nga bani hi gu vbindra ethu hekha khu thembweni, uye a di bela na gu bangaladzwa khu sithumi sivili nya vanyamahegyane; na segide malimba, a di tutumisa sithumi si hongola.

³⁷ Khavbo avbo, lidzaha li nga bani li sihade thembweni, li di hidzimela li ya bhaya naye.

³⁸ Ethu hi diromo ga yimbe tshoka nya lithembwe. Na hi wonide dzitshoni nya nga dzile, hi di tutuma hi va yela, hi ya va mana na va gu ghoha.

³⁹ Kha ha dzi kodza gu mola lidzaha kholu lidiri ni tshivba guvbindra ethu, ilo li di tula lidimba li gu thava.

⁴⁰ Gasi uye hi di mu mola. Aholu na hi mu wudziside gukhethu khu mani lidzaha lile,

⁴¹ uye a di bomba gu hi hakha. Ethu hi dzifakazi nya silo sesi.” Tshangano wu di khodwa khu iso si nga ganedwago khu vama vava, va nga bani vari madhota ni valamuli nya vathu, wu konela gufa Suzana.

⁴² Khavbo avbo, Suzana, a di khusedza lito khu tshivba, khuye: Nungungulu nya gupindruge u wonago misihalo, u tigo sigiro si si gu manegi.

⁴³ Uwe u ngu dziti gwadi nya gukhuwe va giride wufakazi nya malipha, vanyi logovedza. Nyi na songwa na nya sa gira gilo nya esi satshavbo va ganedego va nyi singedza.

Dhaniyeli a ngu emela Suzana, nyamayi nya gu dzi vegise

⁴⁴ Nungungulu a dipwa nombelo wa Suzana.

⁴⁵ Na va gu mu yisa gusongwatunu, Pfhumu Nungungulu a di khendzugisa liphuvbo nya gutenge la lidzahana limwedo nya gupwani khu Dhaniyeli,

⁴⁶ li nga kwangulago khu lito nya tshivba, khilo: “Eni nyi mwalo nandru khu gufa ga nyamayi yoyo!

⁴⁷ Vathu vatshavbo va di thendregedza va mu khedzisa, va ganela, khavo: “Ginani u vbwetago gu ganela khu isoso?”

⁴⁸ Lidzaha, li diya ema vbakari gwawe, li gu ganela, khilo: “Enu va na Israyeli, ina mu di vbunguga mapimo gukala mu vbweta gu kona nyamahegyane wana Israyeli, nyamba phela khu gu khedzisa gwadi ni guti lisine, gani?

⁴⁹ Pheledzani nya luphye gulamula, kholu vama vava vavavili va giride wufakazi nya malipha, va mu singedza.”

⁵⁰ Vathu va di vbiredza gu bwelela. Madhota ma di embela Dhaniyeli, khayo: “Delu uta khala vbakari gwathu u hi tshamusela, kholu Nungungulu a gu ningide mapimo nya muthu khongolo!

⁵¹ Dhaniyeli a di ganela, khuye: “Va hambaniseni va khala hwindzo ni hwindzo, eni nyi na va lamula.

⁵² Va di va hambanisa. Khavbo avbo, Dhaniyeli a di rana moyo wawe a mu embela, khuye: “Gikhosane nya guvivbedwe khu monyo! Olu khavbo si dzi wonegisago gwago sighoho u giridego gale khu wulamuli nya guwegele,

⁵³ gikhati u nga bani u gu kona vathu nyambana nandru, u tshula avo va gu ni nandru, u hambanisa iso Pfhumu Nungungulu a ganedego, khuye: U nga giri gufa muthu nyambana nandru, mwendo uye a lulamidego.

⁵⁴ Hongole! Wa gu bani u va wone furi khu lisine, hi embele, vbavbatshi nya simbo muni u va wonego na va gu bhayana?” A di hakha, khuye: “vbavbatshi nya dimwa.”

⁵⁵ Dhaniyeli a di phindrula, khuye: “Lisine! Ayoyo malipha yago, u na ma livbago khu hungo wago. Wona nya gukhuwe Ngilozi ya Pfhumu Nungungulu, mayelano ni gulamula gwa Nungungulu, yina gu hapfha khu vbakari!”

⁵⁶ Va di ndreyisa mwama wule, Dhaniyeli a gu ranisa mumbe, ata mu embela, khuye: “Uwe u melego wa Khanani, khuri Mujudha. Wumburi khuwo wunga gu kotola, ni lidora khilo li nga gu hambanisa mapimo.

⁵⁷ Khidzo kharato mu nga bani mu gira gikhati gyatshavbo ni vanyamahegyane va Israyeli, avo khu hwanga va dzi ningela gwanu. Aholu nyamahegyane moyo wa Judha kha dzi ningela guvivbani nya myonyo yanu.

⁵⁸ Olu, nyi embele vbavbatshi nya simbo muni u va manego na va gu bhayana?” A di hakha, khuye: “Vbavbatshi nya nguhu.”

⁵⁹ Dhaniyerlia di pindrula, khuye: Lisine! Uwe nuwe u ganede malipha u na ma livbago khu womi wago. Wona nya gukhuwe Ngilozi ya Pfhumu Nungungulu yi pharidego litshari mandzani, yi dzi emisede gu gu pila khu vbakari gasi gu gu mbembisa.”

⁶⁰ Nyamba hwela, mwandra nya vathu wu di gira ligwa nya likhongolo, wu gu bonga Nungungulu a vbanyisago vatshavbo va vegago gitumbo avbo Gwaye.

⁶¹ Khavbo avbo, vathu vatshavbo va di wugela madhota ya mavili ma nga konwago khu Dhaniyeli khu magana yawe, kholu va nga girago wufakazi nya malipha, va di ningwa tsayiso ya yimweyo va nga bani va yi dongisede gu ninga muthu kwawe.

⁶² Maningano ni Nayo wa Mosi, va di va songa. Khu magirelo yaya, litshigu lolo gu vbulugisidwe gufa muthu nyambana nandru.

⁶³ Helekiya ni mwangadzi waye va di rungudza Nungungulu khu mwanawe Suzana, gumogo ni mwama waye Jowakimi ni gilongo gyawe gyatshavbo, kholu kha va mana guvivba guvbanyani gwaye gwatshavbo.

⁶⁴ Gukhugela avbovbo, Dhaniyeli a di ningwa githawo nya gikhongolo khu vatshavbo va na gyawe.