Amosi 7 - Bhibhiliya Nya Guage

Siwoniso nya mbasa

¹ Pfhumu Nungungulu a di nyi yeyedza esi: Wonani, guphelani nya gurumbuge nya mela nya wuvili nya mwasi, uye a di gira mbasa. Hwane nya gu mufumeli na vbedzide guvbwera dzimbewu.

² Avbo mbasa yi nga bani yi vbedzide gu hodza mwasi watshavbo wa tigoni, nyi di ganela, kheni: “Pfhumu Nungungulu, va tsetselele!” A na ema kharini Jakobe, olu a ngari dugwana?

³ Khu guralo, Pfhumu Nungungulu, a di dzi laya khisoso a ganela, khuye: “Kha si na nga girega, a di ganela Pfhumu Nungungulu.”

Giwoniso nya nilo

⁴ Pfhumu Nungungulu a di nyi yeyedza esi, khuye: Wona nya gukhuwe Pfhumu Nungungulu a ngu vbweta guta lamula vathu vaye khu nilo, uwo wu na vbisago nondrwa nya guete, wu gu mbembisa gambe linene.

⁵ Khavbo avbo, nyi di ganela, kheni: Pfhumu Nungungulu gira wuhindzi olu u eme: A na khuga kharini Jakobe? Olu uye a ngarigu gyanana.

⁶ Khu guralo, Pfhumu Nungungulu a di dzi laya khisoso, khuye: “Ambari isoso kha si na girega gambe, a di ganela Pfhumu Nungungulu.”

Giwoniso nya ngodzi

⁷ Khu hwane nya ugo, Pfhumu Nungungulu a di nyi yeyedza gambe esi: Nyi di wona Pfhumu na emide vbatshani nya libhiyo na pharide ngodzi nya gupime mandzani gwaye.

⁸ Pfhumu Nungungulu a di nyi wudzisa, khuye: “Amosi, ginani u gi wonago?” Eni nyi di mu hakha, kheni: “Ngodzi nya pimo.” Khavbo avbo, Pfhumu a di nyi embela, khuye: “Wona nya gukhuwe nyi na pima vathu vangu va na Israyeli khu ngodzi nya pimo; gima kha nyi na nga va tsetselela gambe.

⁹ Malangani nya sigomo nya miphaso ya Isaki, ma na vbindrugedza ma khala marumbi, ni malangani nya miphaso ya Israyeli ma na khungumudwa; nyi na wugela nyumba ya Jerobhowamo khu matshari.”

Amaziya a ngu wugela Amosi

¹⁰ Khu guralo, Amaziya, muphasi nya mhamba wa Bheteli, a di rumela guya embela Jerobhowamo, mufumeli wa Israyeli, khuye: Amosi giride gikungo nya gu guwugele, vbakari ga va na Israyeli; litigo kha li dzi kodzi gutimisela magana yatshavbo a ganelago.

¹¹ Kholu Amosi a gu ganela kharati, khuye: Jerobhowamo a na songwa khu litshari, Israyeli a na vbagedwa a yiswa wugumbitunu, vbavbandze nya litigo laye nya mavelego.

¹² Khu guralo, Amaziya, a di embela Amosi, khuye: Uwe muwoni nya misihalo! Khuga avba, kha nyi gu vbweti! Thavela tigoni gwa Judha; umo u na guya manago guhodza u naya gira iyoyo wuprofeti wago.

¹³ Aholu, omu tigoni ga Bheteli, gukhugela olu guya mbeli, khu na nga profeta gambe, kholu, wulanga nya guage wa mufumeli ni nyumba nya miphaso nya mufumo.

¹⁴ Amosi a di hakha a embela Amaziya, khuye: Eni nyi di siri muprofeti, ambari gyanana gya muprofeti; aholu nyi diri muhavisi nya dzimombe ni musayisi nya miguhu.

¹⁵ Aholu Pfhumu Nungungulu a di nyi dusa thumoni nya wuhavisi, a nyi embela, khuye: Indra u ya profeta ga vathu vangu va na Israyeli.

¹⁶ Gasi olu yingisa magana ya Pfhumu Nungungulu. Uwe wari, khuwe: Nyi nga profeti gambe ga va na Israyeli, ambari gu ganela ga livelego la Isaki

¹⁷ Khu guralo, Pfhumu Nungungulu a ngu gu embela, khuye: Mwangadzi wago a na gira wubhayi dhoropani, sanana sago nya sikhwathana niso nya sagadzyana, si na songwa khu matshari, litigo lago li na kabaniswa khu ngodzi, uwe u naya fela tigoni nya mahedheni, Israyeli a na vbagedwa a yiswa wugumbitunu, hwindzo ni litigo laye.”