Amosi 6 - Bhibhiliya Nya Guage

Gumbembiswa ga Israyeli

¹ Libango ga avo va vbanyago Siyoni na va khadzisegide, va dzipwago na va tiyide gigomoni gya Samariya, vathu nya guthavisege vbakari nya mayigo nya guhegule, mayigo ma tumbwago khu va na Israyeli!

² Vbindrani khu dhoropani ga Kaline, mu li wona; khu vbale indrani kala Hamati nya gukhongolo; mu relela kala Gati, nya Vafilisitiya. Ina madhoropa yaya ma mburide guvbindra mifumo yanu, gani? Mwendro litigo lawe likhongolo guvbindra lanu, gani?

³ Enu mu pimisago gukhenu mwa gu ndreya ga litshigu nya guvivbe, gasi mwa gu hidzimela vbafuvbi ni wulanga nya tshanisa.

⁴ Enu mu lalago malawuni nya gugirwe khu magwaha nya ndzofu, mu dzi ghwimba umo nya masofa yaye, mu hodzani sinvutana nya tshambi ni simombyana nya gunone sa mavbandroni,

⁵ mu embelela khu wutsendze nya hwambi mu dzi girela siwombawomba nya wutsendze nga Dhavhidhe.

⁶ Enu mu selago vbinyu khu mikanvu, mu tola mafura nya lisima, gambe kha mu khathali khu gumbembiswa ga Josefa.

⁷ Khu guralo, mu na thangiswa mbeli ga avo va yiswago wugumbitunu; gu vbela ni mibuzo ya avo va nga bani va dzipwa na va tangade.

⁸ Pfhumu Nungungulu, mune nya satshavbo, sambanyide khu hefemulo waye! Pfhumu Nungungulu nya Tshivba Yatshavbo a ngu ganela kharati, khuye: Nyi ngu swireka khu matshandza ya Jakobe, nyi ngu nyenya dzinyumba dzawe nya wufumu; nyi na ningela lidhoropa ni satshavbo si guromo umo.

⁹ Gu na girega iso nya gu, ambari va gu tshala likhumi vama ga ndranga mweyo, avo navo va nafa.

¹⁰ A gu manega muthu, nya gute dzega girumbi gya nongo waye, gasi guya gi vbisa, gikhati a tago a ta bela nyumbani, a na embela uye a guromo dzikhonani nya nyumba, khuye: “Ina a nga guromo mumbe muthu omu, gani?” Uye a na khuye ahihi! Aholu uye a na khuye: Degula! Kholu hi mwalo fanelo nya gu dundruge khu lina la Pfhumu Nungungulu.

¹¹ Kholu wona nya gukhuwe Pfhumu Nungungulu, a ngu rumela gukhuye nyumba nya yikhongolo yi na pfhungumudwe yi khala marumbi nyumba nya yidugwana yi pandreledwa yi khala malufa.

¹² Ina dzikavalu dzi ngu kodza gu tutuma musiwindrini, mwendro gulima khu dzimombe, gani? Khu ginani mu vbindrugedzago gululama gu khala nyongwa, ni handro nya gululame, wu khala wuhungu.

¹³ Enu mu tsakelago iso nyamba phasa gilo, mu ganela, khenu: Ina khandri tshivba yathu hi nga pala khiyo, gani?

¹⁴ Kholu wonani nya gukhenu nyi na emisa vbakari gwanu, enu va na Israyeli, litigo li na guta mu sasela, a ngu ganela Pfhumu Nungungulu nya Tshivba Yatshavbo, li nata mi tshanisa gukhugela dzinyangwani dza Hamati kala gitsongwanani gya panini ga Arabha.