Amosi 3 - Bhibhiliya Nya Guage

Gu na ranwa dzifakazi gasi guta rwega nandru Israyeli

¹ Upwani magana yaya Pfhumu Nungungulu a ganedego gwanu, enu va na Israyeli, ni ga lihundzu latshavbo leli a li dusidego khu tigoni ga Egipito wari khuye:

² Ga mafumbo yatshavbo ya mafuni, nyi hathide enu basi; khu guralo, nyi na mi tsayisa khu kotani nya guvivba gwanu gwatshavbo.

³ Ina vathu vavili va ngu dzi kodza gu longoloka na va si pwanani, gani?

⁴ Ina nghala yi ngu gungurangura khabini, ya sa mola pfimba, gani? Ginghalana gi ngu khusa lito phalani gwaye, gya sa mola gilo, gani?

⁵ Ina ginyoni gi ngu modwa khu naphwi, wa sa dembwago, gani? Ina naphwi wu ngu kodza gu tshaphuga, nyamba mola gilo nya gukari, gani?

⁶ Ina gu ngu wombwa pundru dhoropani, vathu va si ndrendremeli khu hwanga, gani? Ina gu ngu kodzega gu dugelela mhango dhoropani nyambata khiyo ga Pfhumu Nungungulu, gani?

⁷ Khu lisine, Pfhumu Nungungulu, kha na gira gilo nyamba phela khu gu ninga giwoniso ga sithumi saye, a gu vaprofeti.

⁸ Ya gu bhonga ngala, khu mani a gumba ndrendremela? Pfhumu Nungungulu a gu ganela, khu mani a na gumba profeta?

Gumbemba ga Samariya

⁹ Pwadzani esi umo nya dzinyumba nya wufumu dza Asidhodhi ni dzinyumba nya wufumu dza tigoni ga Egipito, mu va embela, khenu: Tombanani musigomoni sa Samariya, mu wona pfilupfilu nya yikhongolo yi guromo umomo, ni wughevenga yi guromo mabhiyoni gwaye.

¹⁰ Kholu avo kha va kodzi gu gimbila khu gululama, a ngu ganela Pfhumu Nungungulu, va gu wungedzela dzinyumbani gwawe nya wufumu esi va nga phangago khu wurena ni dzihanyi.

¹¹ Khu guralo, Pfhumu Nungungulu, a ngu ganela kharati, khuye: “Nala a na dugelela, a ta randrela litigo lago, a na khungumula likhokhola lago, a phanga dzinyumbani gwago nya wufumu.”

¹² Pfhumu Nungungulu a ngu ganela gambe kharati, khuye: “Kha nga muhavisi a vbulugisago mawundru mavili nya nvuta mwendro gipandre gimwegyo nya ndzeve kanani nya nghala, kharato nugo va na vbulugisa guralo sanana sa Israyeli, va vbanyago tigoni ga Samariya, va khadego havo ghagha vbatshani nya masofa nya seda.

¹³ Olu, tulani dzindzeve mu yingisani esi, khu mahungu nya livelego la Jakobe, a ngu ganela Pfhumu Nungungulu nya Tshivba Yatshavbo.

¹⁴ Khu litshigu nyi natago nyita tsayisa Israyeli khu kotani nya sighoho saye, nyi na khungumula siluvelo sa Bheteli ni dzikeho nya siluvelo dzi na pidwa dzi thega vbavbatshi.

¹⁵ Nyi na khungumula nyumba ya vbagirametunu ni nyumba nya maronga, dzinyumba dzi mburisedwego khu magwaha nya dzindzofu dzi na fuviswa, gu na fuviswa gambe ni dzinyumba nya dzikhongolo, a ngu ganela Pfhumu Nungungulu.”