Amosi 2 - Bhibhiliya Nya Guage

Gusasedwa ga va na Mowabhi

¹ Pfhumu Nungungulu a ngu ganela kharati, khuye: “Khu kotani nya sighoho siraru mwendro sina sa Mowabhi kha nyi na bweledza tsayiso, kholu vbiside marambo ya mufumeli wa Edhomi kala ma khala nguma.

² Khu guralo, nyi na rotha Mowabhi khu nilo, wu na vbisago dzinyumba nya wufumu dza Keriyoti; Mowabhi a nafa khu gudzuma nya gukhongolo, vbakari nya ligwaha nya nyimbi, ni gu gudzuma nya pundru.

³ Nyi na dusa mulamuli vbakari gwawe, nyi mu songa gumogo ni dzindruna dzaye dzatshavbo;” a ngu ganela Pfhumu Nungungulu.

Gusasedwa ga Judha

⁴ Pfhumu Nungungulu a ngu ganela kharati, khuye: “Khu kotani nya sighoho siraru mwendro sina sa Judha, kha nyi na bweledza tsayiso. Kholu va kanyiside nayo wa Pfhumu Nungungulu ni gumba vegisa sileletelo saye, aholu a di dzumela gu kanganyiswa, khu vanungungulu nya malipha, vanungungulu va nga khozedwago khu vababe vawe.

⁵ Khu guralo, nyi na rotha Judha khu nilo, wu na vbisago dzinyumba nya wufumu dza Jerusalema.”

Gusasedwa ga Israyeli

⁶ Pfhumu Nungungulu a ngu ganela kharati, khuye: “Khu kotani nya sighoho siraru mwendro sina sa Israyeli, kha nyi na bweledza tsayiso. Kholu va ngu rengisa muthu nya gululame khu dzitsapawu, va rengisa muhamugi khu patwa nya silato.

⁷ Va gu gandra hungo wa muhamugi gukhwatshi va gu gandra kudzudzwane nya mafu, va wegedza dzindzila dza vathu nya gurule. Babe ni gyanana va gu hengela nyamayi moyo, va nyenyezisa kharati lina langu nya guage.

⁸ Va gu lala bambe nya giluvelo ni giluvelo vbatshani guambala va wandredego va nya mangava navo. Nyumbani gwa vanungungulu vawe, va gu sela vbinyu ya vale va livbisidwego khu mangava.

⁹ Kheni nyi mbembisidego Vaamori mbeli gwawe, ambari va nga bani va laphide ngudzu kha nga misedhari, va tiyidego gu fanana ni miguhu. Eni nyi kutsungide mihandro yawe ya vbatshani, nyi sigula mikhamba yawe khu vbavbatshi.

¹⁰ Eni kamwe nyi mi duside khu tigoni ga Egipito, nyi mi gimbidzisa giwulani gipimo nya magumana myaga, gasi guya mi ningani litigo la Vaamori.

¹¹ Nyi hathide gambe vambe vbakari nya sanana sanu, gasi va khala vaprofeti, ni vambe nya madzaha yanu, gasi va khala vanaziri. Ina isoso khandri lisine gwanu enu va na Israyeli, gani?

¹² Aholu enu mu ningide vbinyu vanaziri va sela vaprofeti mu va rumani, khenu: “Mu nga profeti.”

¹³ Wonani nya gukhenu nyi na mi pfugunyedzisa wulangani gwanu, kha nga kareta yi pfugunyelago ya gu bani yi tade khu dzinyandra.

¹⁴ Muthu nya mazambo kha na vbuluga, ambari muthu nya tshivba a na vbeledwa khu tshivba, ni ndrena kha yi na vbulugisa womi waye.

¹⁵ Uye a gu ni wulaho kha na nga emega gwadi, muthu nya mazambo kha na dzi vbulugisa ni mukhileli nya kavalu kha na vbulugisa womi waye.

¹⁶ Ga litshigu lile, ambari ndrena yi tiyidego yi na tutuma wumbwiri; a ngu ganela Pfhumu Nungungulu.