Agewu 1 - Bhibhiliya Nya Guage

NOMBELO NYA GUHEGULE Vathu va ngu rumwa gu vbahedza Nyumba ya Nungungulu

¹ Khu mwaga nya wuvili nya mufumo wa mufumeli Dhariyo, khu litshigu nya guhegule nya ngima nya livbandre na moyo, magana ya Pfhumu Nungungulu ma dita khavbo ga muprofeti Agewu, a ma vbohisa ga Zorobhabheli, mwamana wa Salatiyeli, mwamangulu wa Judha, ni ga Josuwa, mwamana wa Jozadhaki, muphasi nya khongolo nya mhamba, khuye:

² “Pfhumu Nungungulu nya Tshivba Yatshavbo a ngu ganela kharati, khuye: Vathu vava, va gu ganela, khavo: Gi si gu vbohi gikhati, hi yelago guvbahedza khigyo Nyumba ya Pfhumu Nungungulu.”

³ Khu guralo, magana ya Pfhumu Nungungulu, ma dita khavbo nya thumo nya wuprofeti wa Agewu, khuye:

⁴ “Ina khigyo egi gikhati nya gu enu mu khalani dzinyumbani nya gumburisedwe khu mapulango, aholu nyumba yeyi yi simama gu khala marumbi, gani?”

⁵ Olu, Pfhumu Nungungulu nya Tshivba Yatshavbo, a ngu ganela kharati, khuye: “Dzi khedzeni myonyoni gwanu khesi si dugelelago guvbanyani gwanu.

⁶ Mwa gu yala nya singi, aholu mu vbwera sidugwana; guhodza mu ngu hodza, aholu kha mu khuri; mu ngu sela, aholu kha mu tshimi lidora; guambala mu ngu ambala, aholu kha mu furumeli; wule a hakhago tshatshazelo nya thumo waye, a gu wu thela kwamani nya gupolege.”

⁷ Pfhumu Nungungulu nya Tshivba Yatshavbo, a ngu ganela kharati, khuye: Khedzani khu monyoni gwanu iso si mi dugelelago guvbanyani gwanu.

⁸ “Gwelani gigomo mu ya dzega misimbo mu ta vbahedza nyumba, yi na gu nyi nengedzisago, gasi nyi kodza gu dhumiswa umo.” A ngu ganela Pfhumu Nungungulu.

⁹ Mu di gu lirela nya singi, aholu mu manide sidugwana; ambari esi nya sidugwana avbo mu nga si resani gaya, eni nyi di si furugedza si mwalalega. Khu kotani nya ginani? A ngu ganela Pfhumu Nungungulu nya Tshivba Yatshavbo, khuye: Khu kotani nya nyumba yangu yi khadego marumbi, gasi enu, muthu ni muthu a gu hongola gaya gwaye.

¹⁰ Khu guralo, ndzadzini gu segegide thondrwane kha yi thegi mafuni kha gu ningi mihandro.

¹¹ Nyi reside gihala mafuni, musigomoni, umo nya tirigu, umo nya miuvha, umo nya mafura ni gwatshavbo umo mafu ma ningago mihandro, gumogo gambe ni umo nya vathu, numo nya sirengo, ni vbatshani nya thumo watshavbo nya mandza yanu.

¹² Khu guralo, Zorobhabheli, mwamana wa Salatiyeli, ni Josuwa, mwamana wa Jozadhaki, muphasi nya khongolo nya mhamba, ni yatshavbo mitshaledwa nya vathu, avbo va ngapwago lito la Pfhumu Nungungulu wawe, ni magana ya muprofeti Agewu, a nga ma ganelago khu gu rumedwa khu Pfhumu Nungungulu wawe, vatshavbo va di thava mbeli ga Pfhumu Nungungulu.

¹³ Khavbo avbo, Agewu, girumwa gya Pfhumu Nungungulu, a di ganela ga vathu gukhedza khidzo a nga rumedwago khidzo khu Pfhumu Nungungulu, khuye: “Eni nyi womo vbakari gwanu, a ngu ganela Pfhumu Nungungulu.”

¹⁴ Khu guralo, Pfhumu Nungungulu, a di khendzugisa liphuvbo la Zorobhabheli, mwamana wa Salatiyeli, mwamangulu wa Judha, ni liphuvbo la Josuwa, mwamana wa Jozadhaki, muphasi nya khongolo nya mhamba, ni liphuvbo la mitshaledwa yatshavbo, va ta thuma thumo nya guvbahedze Nyumba ya Pfhumu Nungungulu, nya Tshivba Yatshavbo, Nungungulu wawe,

¹⁵ khu litshigu nya magumavili na mana matshigu nya ngima nya livbandre na moyo, khu mwaga nya wuvili nya gufume ga Dhariyo.