2 Vatesalonika 3 - Bhibhiliya Nya Guage

Dzi woneleni wugara ni pfilupfilu

¹ Khu guhegisa, vandruye, hi lombeleleni nethu ga Nungungulu, gasi mahungu yaye ma andre, ma hakhwe gwadi, nga edzi gu nga girega khidzo vbakari gwanu.

² Hi lombeleleni gasi Nungungulu a hi vbulugise mandzani ga vathu nya guvivbe. Kholu khandri vatshavbo va khodwago.

³ Gasi, Pfhumu khwadi. Uye a na mi ningani tshivba, a mi vbulugisani muguvivbani.

⁴ Hi ngu tumba khu lina la Pfhumu nya gukhethu mu na simama gikhati gyatshavbo gu girani esi hi nga mi hevbudzani.

⁵ Pfhumu yi na khusedze myonyo yanu lihaladzoni ga Nungungulu, gasi mu virela Kristo khu gutumba.

⁶ Vandruye, khu lina la Pfhumu yathu Jesu Kristo, hi ngu mi embelani khethu hambanani ni vandruye vale va vbanyago nyamba thuma gilo, va si landrigo nayo nya tumbunugo mu wu hakhidego ga ethu.

⁷ Kholu mu ngu dzitini gwadi gukhenu guvbweta mu vbanya nga ethu. Ethu kha ha khala vbakari gwanu nyamba thuma gilo,

⁸ kha ha hodza guhodza ga muthu mahala. Hi di thuma nya guvbindre pimo, wutshigu ni mihani, gasi hi si lemedzi muthu.

⁹ Khandri gukhwatshi hi diri mwalo fanelo nya guhakhe gilogyo.

¹⁰ Aholu, hi di mi ningani giwonelo gasi mu gire nga idzo hi nga girago ethu. Kholu gikhati hi nga bani na hiri iyo gwanu hi mi embedeni nya gukhethu, oyu a si dzinigo gu thuma mwalo fanelo nya guhodze.

¹¹ Kholu hi pwide nya gupwani, vbakari gwanu, vomo va vbanyago nyamba thuma gilo, wulangani nya guthume va gu luza gikhati khu gu belela siloni si si va lumbigo.

¹² Vathu vovo, hi ngu va khongotela ni gu va laya khu lina la Pfhumu yathu Jesu Kristo, gukhethu va na thume khu gurula, va hodze guhodza nya lithonga lawe.

¹³ Gambe, vandruye, mu nga garali khu gu girani wuwadi.

¹⁴ Aholu a gu manega muthu nyamba landrisa milayo yeyi hi mi ningago khu lidangalila leli, mu khedzeni gwadi, mu nga hengeli naye, gasi afela gu khala dzitshoni.

¹⁵ Mu nga mu vengini nga nala, aholu, mu layeni kha nga ndriyanu.

¹⁶ Gasi Pfhumu, Nungungulu nya gurule a na mi ningeni gurula gwaye khu maphuvbo yatshavbo. Pfhumu yi na khale ni enu mwatshavbo.

Malosedzela nya guhegise

¹⁷ Eni Pawulo, nyi ngu rumela malosedzela yangu, nya gulowe khu mandza yangu. Egi giyeyedzo gasi mufela gu mati malangalila yangu yatshavbo. Khigyo kharati gyandza gyangu.

¹⁸ Wuhigo wa Pfhumu yathu Jesu Kristo wu na khale ni enu mwatshavbo.