2 Vatesalonika 2 - Bhibhiliya Nya Guage

Guwuya ga Pfhumu ni siyeyedzo sakone

¹ Khu mahungu nya guwuye ga Pfhumu yathu Jesu Kristo, a ta tshangana ni ethu,

² hi ngu mi lombani, vandruye, mu nga kanganyisegi, mu nga vbeli mapimo va gu mi embelani khavo, litshigu la Pfhumu li vbohide. Ambari a gu manega muthu a ganela ni gu hevbudza khu lina la Nungungulu a tiyisa khuye isoso si lovidwe vbalidangalilatunu gwangu,

³ mu nga dzumelini gukanganyiswa khisoso. Litshigu lolo kha li na ngata gu si gu manegi guwugela nya guhegise; a na dugelela muwugeli, oyu a dongisedwego gumbemba.

⁴ Uye a wugelago satshavbo, a dzi gira khongolo nya silo satshavbo si ranwago khu vathu khavo vanungungulu. A na dzega ni Nyumba ya Nungungulu, a dzi gira uye nungungulu.

⁵ Kha mu dundrugi gukhenu nyi mi embedeni silo sesi gikhati nyi nga bani nyiri iyo gwanu, gani?

⁶ Gambe mu ngu dziti nya gukhenu gyomo gilo gi himbedzago gumba girega isoso olu. Kholu muwugeli a na dzi yeyedza khu gikhati gyaye.

⁷ Khu guralo dzitshivba nya sihalo nya guvivbe dzi ngu thuma. Gasi satshavbo si girege, gu vbwetega a mbemba oyu a himbedzago.

⁸ Khavbo a na gu dugelelago muwugeli oyu Pfhumu Jesu a na mu songago khu phuvbo ya kanani gwaye. A mu mbembisa khu gungangamela nya gute gwaye.

⁹ Muwugeli a nata na tade khu tshivba ya Sathane, a na yeyedza tshivba nya yikhongolo khu siliwugiso ni sigiro nya malipha.

¹⁰ A na thumisa guvbanya gwatshavbo nya guvivbe, gasi gu kanganyisa ava va dzimedego, va na gumba dzumela gu hakha lisine li nga vbweta gu va vbanyisa.

¹¹ Khu guralo, Pfhumu a di va diga va fumwa khu tshivba nya gukanganyise, eyi yi va yisago gukhodwani nya malipha.

¹² Va na lamudwa kharalo vale va si khodwigo lisineni, va gola gu gira guvivba.

¹³ Khu kotani gwanu, hi ngu bonga Nungungulu gikhati gyatshavbo, vandruye, sigodwa sa Pfhumu, kholu a di mi hathani mu khala va nya guhegula gu hakha guvbanyiswa ni gu dzumela lisine ni gu agiswa khu tshivba nya Liphuvbo.

¹⁴ Khidzo Nungungulu a mi ranedego idzo, khu Mahungu nya Yadi hi nga tshumayela, mu ya hengela wudhumoni wa Pfhumu yathu Jesu Kristo.

¹⁵ Khu kharato, vandruye, emani mu tiya, mu sayisa sihevbulo nya tumbunugo, esi hi nga mi hevbudzani khu magana, ambari khu malangalila yathu.

¹⁶ Uye mune Jesu Kristo, Pfhumu yathu, ni Nungungulu Babe wathu a nga hi haladzago, khu wuwadi waye, a hi ningide tshivba nya gutiye, ni gutumba nya gukhongolo ngudzu.

¹⁷ A na tangadzise myonyo yanu khu gutumba, a mi ningani gu simama wuwadini nya mithumo ni guganela gwanu.