2 Vatesalonika 1 - Bhibhiliya Nya Guage

Gulosa

¹ Eni Pawulo ni Silivhano ni Thimoti, hi ngu losa libandla nya vathu va Nungungulu va vbanyago dhoropani ga Tesalonika, na hi patane khu lihaladzo la Nungungulu, Babe wathu, ni Pfhumu Jesu Kristo,

² hi ngu mi suvelani, khu ga Nungungulu ni Pfhumu Jesu Kristo, mathomo ni gurula.

Kristo a nguta lamula litigo

³ I fanelo yathu gu dhumisa Nungungulu gikhati gyatshavbo khu enu, vandruye. Gu ngu yela gu gira kharalo kholu gukhodwa gwanu gu andride ni lihaladzo lanu li dandride, eli mu girelanago khu gyanu.

⁴ Khu guralo ethu hi ngu dzi khusedza khu enu vbakari nya mabandla ya Nungungulu, khu kotani nya gutimisele ni gukhodwa gwanu mu gu yeyedzago vbakari nya sigaradzo, ni gusaniseka mu gu rwadego;

⁵ isoso sa gu yeyedza gulamula nya lisine ogu Nungungulu a na gu mi sayelago mufumoni waye, khu kotani nya olu mu timiselago sigaradzoni.

⁶ Khu magirelo ya mamowo, vale va mi sanisago, va na hakha ga Nungungulu tsayiso nya lisine.

⁷ Gasi enu mu nga sanisekago gumogo ni ethu, a na hi ninga guhefemula gikhati a na gutago khu Ndzadzini Pfhumu Jesu Kristo, gumogo ni dzingilozi dzaye, na tade khu tshivba.

⁸ A nata khu vbakari nya nilo ata tsayisa vale va si khodwigo ga Nungungulu, ni ava va si hakhigo Mahungu nya Yadi ya Pfhumu yathu Jesu Kristo.

⁹ Avo va na mbembiswa va yiswa hwindzo, nyamba wona ni gupwa tshivba ni wudhumo wa Pfhumu.

¹⁰ A na bani ari litshigu Pfhumu atago guta dhumiswa khu vatshavbo vale a va hathidego, a na wonwa khu vatshavbo va dzumedego gukhodwa. Enu mu hakhide gwadi mahungu yathu.

¹¹ Khu guralo, hi ngu lomba ga Nungungulu wathu gikhati gyatshavbo khu enu, gasi a mi phasani gu girani dzifanelo nya guranwe gwanu, a mi ningani tshivba ni masuwo nya gutshambe, ni gu tiyisa gukhodwa gwanu.

¹² Khu magirelo yoyo, Pfhumu yathu Jesu Kristo, a na dhumiswa khu gu dzi vegisa gwanu, enu nenu mu na dhumiswa khuye, khu wuhigo wa Nungungulu wathu ni wa Pfhumu Jesu Kristo.