2 Vakorinto 7 - Bhibhiliya Nya Guage

¹ Na hiri ni situmbiso sesi, sigodwa sangu, hongoleni hi dzi handze guvivba gwatshavbo nya givili ni liphuvbo, hi gira thumo wathu nya guagiswe ni githawo ga Nungungulu.

² Hi hakheni myonyoni gwanu. Kha ha vivbisa muthu, kha ha senga muthu, kha ha vbweta giphaso ga muthu. Kha ha kalavela muthu.

³ Kha nyi ganeli esi khu gu vbweta gu mi kona, kholu nyi mi embedeni khu gale kheni mu womo myonyoni gwathu gasi hi vbanya ni gufa gumogo.

⁴ Nyi na ni gutumba nya gukhongolo ngudzu khu enu, nyi ngu dzi zundza ngudzu khu enu; nyi tade khu gu thaveledwa, nyi tade khu gutsaka, vbakari nya gusaniseke gwathu gwatshavbo.

⁵ Kholu gukhugela hi vboha tigoni ga Makedhoniya, gima kha hi mani ni gikhati nya guhefemule. Kholu ha gu wona sigaradzo maphuvbo yatshavbo: Mayunga ni guhambana ni vathu, khu vbavbandze; khu ndrani gu gugaradzega nya monyo.

⁶ Nungungulu a thavelelago ava va sanisekago, a hi thavelede khu gu vboha ga Tito.

⁷ Khandri basi khu gu vboha gwaye, aholu khu gu thavelela a nga gu mana gwanu. Uye a hi tiviside gusuva gwanu, ni marongo yanu, ni gukhathala gwanu khu eni. Esi satshavbo si engedzede gutsaka gwangu.

⁸ Lidangalila langu la gu bani li mi thedeni wusiwana, kha nyipwi wuvi. Nyi ngu dziti gwadi gukheni lidangalila langu li mi thede wusiwana gikhati gyogyo. Ambari ulo, si nga nyi pwisa wuvi,

⁹ olu nyi ngu tsaka, kha nyi tsaki khu olu mu nga saniseka, aholu, kholu gusaniseka gwanu gu mi giride mu vbindrugedza. Mu di thedwa wusiwana, khu gu dzina ga Nungungulu, khu guralo kha ga ghoheka gilo khu ga ethu.

¹⁰ Kholu wusiwana, ga Nungungulu, wa gu vanga guvbindrugedza gu yisago guvbanyani; aholu wusiwana wa mafuni wa gu vanga gufa.

¹¹ Enu mu timisede wusiwana avbo mu nga tsakisani Nungungulu, wonani mihandro yakone: Nga wonani gu dzi garadza gwanu nya gungi, divalelo yanu, githawo gyanu, gusuva gwanu, gu sayisa gwanu ni gutiya gwanu gu tsayisa gighohi. Mu yeyedzide khu satshavbo sesi gukhenu mu mwalo nandru ga mahungu yaya.

¹² Khu guralo, nya gu bani nyi mi lovede, kha nya lova khu kotani nya oyu a nga gira guvivba, ambari ga oyu a nga giredwa guvivba, nyi di lova gasi gu yeyedza gu lomba gwanu khu ethu mbeli ga Nungungulu, khu kota nya guralo hi thaveledwe.

¹³ Aholu, vbavbandze nya ogu gutangadziswa hi gu manidego, hi ngu tsakiswa gambe ngudzu khu gu wona gutsaka ga Tito. Kholu uye nengede ngudzu khu edzi mu nga mu hakhago khidzo.

¹⁴ Eni nyi di mu embede Tito kheni nyi ngu dzipwa matshandza khu enu, kha nya thedwa dzitshoni. Kha nga a gu lisine satshavbo iso hi mi embedego, kharato gambe, gu wonegide nari lisine esi hi nga ganelago ga Tito khethu: Hi ngu dzipwa matshandza khu enu.

¹⁵ Lihaladzo laye khu enu la gu engedzela ngudzu, a gu dundruga gu yingisa gwanu mwatshavbo edzi mu nga mu hakha khidzo khu githawo nya gikhongolo ngudzu.

¹⁶ Nya gutsaka, kholu nyi ngu mi tumbani ga silo satshavbo.