2 Vakorinto 6 - Bhibhiliya Nya Guage

Siwoniso nya thumo nya wupostoli wa Pawulo

¹ Ethu hi gu vaphasedzeli va Nungungulu, hi ngu mi khongotelani gukhethu, mu nga digi wu luzega wuhigo wa Nungungulu mu hakhidego.

² Kholu Uye a ngu ganela, khuye: “Nyi gu pwide khu gikhati nya gyadi, nyi gu phaside khu litshigu nya guvbanyiswe.” Khigyo egi gikhati nya gyadi. Khilo eli litshigu nya guvbanyiswe.

³ Ethu kha hi khunguvanyisi muthu khu mavbanyelo yathu, gasi thumo wathu wu si solegi.

⁴ Ga satshavbo hi ngu dzi wonegisa gukhethu hi sithumi sa Nungungulu, khu gu hunisela ngudzu, dzitshanisa, guhamuga, ni sigaradzo,

⁵ gukwamudwa, gukhothedwa, pfilupfilu, gukoroka, gukhevisela ni ndzala.

⁶ Hi ngu dzi wonegisa gambe khu mavbanyelo yathu nya yadi, khu guti lisine, khu gutimisela ni wuwadi, khu Liphuvbo nya Guage li vbanyago gwathu, khu lihaladzo lathu nyamba pembeledzela,

⁷ khu mahungu yathu nya lisine, ni tshivba ya Nungungulu khu matshari nya wululami, khu nyamudye ni nyambade.

⁸ Ha gu zundzwa khu vambe, hi vadwa khu vambe; vambe va gu ganela gwadi khu ethu, vambe va gu ganela guvivba. Va gu hi wona kha nga vathu nya malipha, gasi ethu ha gu ganela lisine.

⁹ Va gu hi gira kha nga vathu nyamba tidwa, ethu va hitigo gwadi. Gukhwatshi ha gufa, aholu hi na gu vbanya; va ngu hi tshanisa, aholu kha va hi songi.

¹⁰ Gukhwatshi hi swihade, aholu hi ngu nengela gikhati gyatshavbo; gukhwatshi hi sisiwana, aholu hi fumiside nya vangi; gukhwatshi hi mwalo gilo, aholu hi naso satshavbo.

¹¹ Vandriyathu Vakorinto, sihofu sathu, ethu hi ganede gwanu khu lisine lathu latshavbo; hi mi tuledeni myonyo yathu yatshavbo.

¹² Gi mwalo ni gimwegyo hi mi sihedego, enu khenu mu gu na ni wusihasihane.

¹³ Eni nyi ngu mi lombani kha nga babe a lombago ga sanana saye, gukheni nyi tuleleni myonyo yanu, kha nga eni neni nyi mi tuledego wangu.

Thavani guvivba

¹⁴ Mu nga hengeli guvbanya ni ava nyamba khodwa. Wu na manega kharini wuhengeli nya gululame ni guwegela? Gu ngu dzi kodza kharini gu hengela guwonegela ni gidema?

¹⁵ Gu mwalo gu hengela Kristo ni Sathane kha nga gambe gu gu mwalo ga oyu a khodwago ni oyu nyamba khodwa.

¹⁶ Gu mwalo gupwanana Nyumba ya Nungungulu ni vanungungulu nya malipha. Kholu ethu hi Nyumba ya Nungungulu a vbanyago, kha nga a ganelago uye mune Nungungulu, khuye: “Nyi na vbanya, nyi gu gimbila vbakari gwawe; eni nyi na khala Nungungulu wawe, avo va na khala vathu vangu.”

¹⁷ Khu kharato Pfhumu yi ngu ganela gambe, khiyo: “Dugani khu vbakari gwawe mu hambana navo mu nga khuhini gilo nya gunyenyeze.

¹⁸ Eni nyi na khala babe wanu, enu mu na khala sanana sangu nya madzaha ni dzimbiri.” Gu ganela Pfhumu nya Tshivba Yatshavbo.