2 Vakorinto 10 - Bhibhiliya Nya Guage

Pawulo a ngu vhikela thumo waye nya wupostoli

¹ Eni, Pawulo, nya gu bani nyiri vbakari gwanu, nya gu dzi vbevbugisa, nya gu bani nyiri hwindzo, nya gu dzi lemedza. Nyi ngu mi lomba khu Kristo, oyu a nga dzi vega vbavbatshi ni gu dzi sodzisa.

² Nyi ngu mi lombani kheni, nya gu bani nyiri vbakari gwanu mu nga nyi gurumedzi gu girela wurena vale vambe, va gukhavo, eni nya gu gira esi khu tshivba nya wuthu.

³ Ina ha gu bani hi vbanyide khu wuthu kha hi dwaneli givili.

⁴ Matshari nyi dwanago khayo khandri ya wuthu, kholu tshivba nya ayo ya guta khu ga Nungungulu, ma gu khungumula mabhiyo yatshavbo, ni gu vbedza mapimo nya guvivbe,

⁵ hi na khungumule matshandza yatshavbo ma wugelago guti gwa Nungungulu, hi wuyisela mapimo yatshavbo nya wuthu, ma ta yingisa Kristo.

⁶ Nyi dzi emisede gutsayisa ni gwevbini guphungela, kala guyingisa gwanu Kristo gu vbelela.

⁷ Enu mwa gu wona silo khu vbavbandze. A gu bani a romo oyu a dzi tumbago, nya gukhuye a gu lumba Kristo, uyoyo a na pimise gwadi, kholu ethu nethu ha gu lumba Kristo.

⁸ Ambari na nyi dzi zundzide khu tshivba yeyi Pfhumu a nga hi ninga, kha nyi khali dzitshoni khiso, kholu nyi di ningwa gasi gu yi thumisa yi vbahe vbakari gwanu, nasiri gupfhungumula.

⁹ Kha hi vbweti gu mi thelani hwanga khu malangalila yathu.

¹⁰ Vambe va gu ganela, khavo: “Malangalila yaye ma lemede ma na ni tshivba, aholu ha gu bani hiri naye, vbevbugide ni givili gyaye, guganela gwaye kha gu phasi gilo.”

¹¹ Avovo va na khale na va gu dziti nya gukhavo, ambari nyi ganela khu hwindzo, mwendro khu lidangalila, ni gu gira esi nyi girago na nyiri vbakari gwanu, kheni muthu yoyo wa moyo.

¹² Eni kha nyi kodzi gu dinganisa ambari gu dzi fananisa ni vale va dzi yeyedzago nga vathu nya vakhongolo, kholu, avovo va mwalo mapimo, kholu va gu dzi dinganisa avo vamune khu wurumba wawe.

¹³ Aholu, ethu kha hi vbweti gu dzi khusedza guvbindra pimo khu thumo wathu, pimo yoyu Nungungulu, a hi ningidego, khuwo hi wu vbohisidego vbakari gwanu.

¹⁴ Kha hiyi hwindzo ngudzu khu gu dzi zundza gwathu, kha nga khwatshi kha ha vboha kala iyo gwanu, kholu, hi vbohide kala iyo gwanu na nyi gu ganela Mahungu nya Yadi ya Kristo.

¹⁵ Kha hi dzi zundzi gu vbindrisa, khu mithumo ya vambe vathu. Egi hi gi lindrelago nya guvbweta gu zundzega khu gu dandra nya gukhodwe gwanu, nga edzi Nungungulu a nyi pimedego khidzo.

¹⁶ Olu nya guvbweta gu dzega Mahungu nya Yadi nyi ma yisa mambe mayigo, vbavbandze nya litigo lanu. Khu kharalo kha nyi na dzi khusedza khu thumo wu giridwego khu vambe, ga litigo li va lumbago.

¹⁷ Oyu a vbwetago gu dzi khusedza, a na dzi khusedze Pfhumuni.

¹⁸ Kholu, oyu a dzi zundzago a dzi gira muthu nya khongolo, kha hakhwi, gu hakhwa oyu a zundzwago khu Pfhumu.