2 Samuweli 8 - Bhibhiliya Nya Guage

Dzinyimbi nya guhambanelane dza Dhavhidhe

¹ Khu hwane nya esi, Dhavhidhe a diya sasela Vafilisitiya a va pala, a dzega tsindza nya mufumo mandzani ga Vafilisitiya.

² Pade gambe va na Mowabhi, a va ladzisa vbavbatshi, a va pima khu ngodzi, avo va nga bani va enedza dzingodzi dzimbili, a di va songa, avo va nga bani va enedza ngodzi mweyo basi, a di va diga va vbanya. Khu guralo, va na Mowabhi, va di khala sithumi ga Dhavhidhe, va henga khupo gwaye.

³ Dhavhidhe a di sasela gambe Hadhadhezeri, mwamana wa Reyobhi, mufumeli wa Zobha, gikhati uye a nga bani a hongola aya tiyisa mufumo waye tsongoni ga Ewufrate.

⁴ Dhavhidhe a di mu wandrela likhumi na livbandre na mavili mazana (1.700) vakhileli nya dzikavalu, ni magumavili magumi mazana (20.000) vama nya gugimbile khu mawundru, a pila misivba nya dzikavalu dzatshavbo nya gundrindre dzikareta, a tshiya basi nya gudingane lizana (100) nya idzo.

⁵ Gu dita Vaasiriya khu tigoni ga Dhamasiko, gasi guta phasedzela Hadhadhezeri, mufumeli wa Zobha, aholu Dhavhidhe a dita songa magumavili na mavili magumi mazana (22.000) vama nya va Siriya.

⁶ Dhavhidhe a di vega sikwata nya masotshwa nya gughadhe litigo la Dhamasiko; gasi Vaasiriya, va di khala sithumi ga Dhavhidhe, va mu livba khupo. Khu guralo, Pfhumu Nungungulu, a di ninga Dhavhidhe tshivba nya gupale gwatshavbo umo a nga bani na gu vbindra khumo.

⁷ Dhavhidhe a di dzega ga dzindruna dza Hadhadhezeri, sitshangu nya ndralama va nga bani vari naso, va si resa Jerusalema.

⁸ Mufumeli Dhavhidhe a di dzega gambe tengo nya wungi ngudzu nya sugu madhoropani ya Bhetani ni Bherotayi, ma nga bani ma gu lumba Hadhadhezeri.

⁹ Avbo Toyi, mufumeli wa Hamati, a nga pwago gupwani Dhavhidhe sasede dzinyimbi dzatshavbo dza Hadhadhezeri,

¹⁰ a di rumela mwanaye Joramo, guya mu losedzela ni gu mu zundza, kholu a nga dwana ni Hadhadhezeri a mu pala, (kholu Hadhadhezeri, a di gu tala gu dwanisa Toyi). Joramo a dita ni sombo nya ndralama, parata ni sugu.

¹¹ Khavbo avbo, mufumeli Dhavhidhe a di si phasela ga Pfhumu Nungungulu, gumogo ni parata ni ndralama a nga bani a yi phasede khu gale, a nga yi dzegago ga mayigo a nga ma khozisago a gu aya:

¹² Sa mayigoni ya Siriya, ya Mowabhi, sa na Amoni, sa Vafilisitiya ni sa va Amaleki ni iso a nga phanga ga Hadhadhezeri, mwamana wa Reyobhi mufumeli wa Zobha.

¹³ Dhavhidhe a di pwala ndruma ngudzu, gikhatini a nga bani a gu wuya khiyo nya gusasele Vaasiriya, kovani nya Munyu, avbo a nga songa likhumi na livbandre na mararu magumi mazana (18.000) vama.

¹⁴ A di vega sikwata nya masotshwa nya gu ghadhi tigoni ga Edhomi, vatshavbo va na Edhomi va di khala sithumi sa Dhavhidhe, ni Pfhumu Nungungulu a di ninga tshivba Dhavhidhe nya gupale gwatshavbo umo a nga bani na gu vbindra khumo.

Dzindruna dza Dhavhidhe

¹⁵ Dhavhidhe a di fumela litigo latshavbo la Israyeli, a lamula ni gu lulamisa mahungu ya vathu vatshavbo.

¹⁶ Jowabhi, mwamana wa Zeruwa, a diri uye muthangeli nya nyimbi; Josafati, mwamana wa Ayiludhe, a diri mulovi nya matimo.

¹⁷ Sadhoki, mwamana wa Ayitubhi, ni Ayimeleki, mwamana wa Abhiyatari, va diri vaphasi nya mhamba; Seraya, a diri mulovi.

¹⁸ Bhenaya, mwamana wa Joyadha, a diri muthangeli nya Vakereti ni Vapeleti; gasi sanana sa Dhavhidhe, si diri dzindruna dza mufumeli.