2 Samuweli 7 - Bhibhiliya Nya Guage

Dhavhidhe a ngu gira gidzumeledzwano ni Pfhumu Nungungulu

¹ Avbo mufumeli Dhavhidhe a nga bani na khade nyumbani gwaye, Pfhumu Nungungulu na mu ningide gikhati nya guhefemule ga valala vaye, va nga bani va mu randrede,

² mufumeli a di ganela ni muprofeti Natani, khuye: “Nga wona, eni nya gu khala nyumbani nya gwadi nya sedhari, aholu Ngasa ya Pfhumu Nungungulu yi khala Tshatshani.”

³ Natani a di embela mufumeli, khuye: “Indra u ya gira satshavbo u si pimisago khu monyoni gwago, kholu Pfhumu Nungungulu a na ni uwe!”

⁴ Aholu, khu wutshigu wowo, lito la Pfhumu Nungungulu li dita ga muprofeti Natani, li ta, khilo:

⁵ “Indra uya embela githumi gyangu Dhavhidhe, khuwe: Pfhumu Nungungulu a ngu ganela kharati, khuye: U na nyi vbahela uwe nyumba nya gukhale Eni, gani?

⁶ Kholu gukhugela litshigu nyi dusidego va na Israyeli khu tigoni ga Egipito kala muhuno, kha nya khala nyumbani, aholu nyi diri mulegalegi, nyi khala ga tshatsha ni tshatsha.

⁷ Malangani yatshavbo nyi gimbidego ni va na Israyeli, ina nyi di nga ganela lito nya gukari ni moyo nya lihundzu lawe, avo nyi va rumidego gu havisa vathu vangu va na Israyeli nyi va embela, kheni: Khu ginani mu gumba nyi vbahela nyumba nya misimbo nya sedhari, gani?

⁸ Khu guralo, u na embela isoso githumi gyangu Dhavhidhe, khuwe: Pfhumu Nungungulu nya Tshivba Yatshavbo a ngu ganela kharati, khuye: Nyi gu duside khu wuhaviseloni nya guhavise dzinvuta, gasi u khale muthangeli wa vathu vangu, a gu va na Israyeli.

⁹ Eni nyi diri nago gwatshavbo umo u gimbidego khumo; nyi mbembiside valala vago mbeli gwago, nyi giride lina lago gukhwatshi lina nya vathu vakhongolo va guromo mafuni.

¹⁰ Nyi na dongisela wulanga ga vathu vangu va na Israyeli, nyi na va tiyisa gasi va vbaha umo, va si legalegi gambe, gima kha va na tshaniswa gambe khu vathu nya guvivbedwe khu monyo, kha nga guhegulani,

¹¹ gukhugela litshigu nyi vegidego valamuli ga vathu vangu, va na Israyeli, khu guralo nyi na gu hefemudza ga valala vago vatshavbo. Bwelo khavbo Pfhumu Nungungulu a na gu tivisa gukhuye uye a na gu vbahela nyumba.

¹² Matshigu nya guvbanye gwago ma gu vbela, uya lala ni vavelegi vago, Eni nyi na emisa hwane gwago, mwanago oyu a na dugago khu mahembeni gwago, nyi na tiyisa mufumo waye.

¹³ Uye a na vbaha nyumba yi na gu lumbago lina langu, Eni nyi na tiyisa gikhalo nya wufumu waye kala gupindruga.

¹⁴ Eni nyi na khala babe waye, ni uye a na khala gyanana gyangu; a gu gira mithumo nya guvivbe nyi na mu tsayisa khu ndronga nya vathu, khu lipitso nyi vetago khilo sanana nya vathu,

¹⁵ aholu kha nyi na dusa lihaladzo langu avbo gwaye, kha nga idzo nyi giridego ga Sawule, nyi mu dusidego mbeli gwangu.

¹⁶ Ndranga ni mufumo wago, si na simama kala gupindruga mbeli gwangu. Ni gikhalo nya wufumu wago gi na simama kala gupindruga.”

¹⁷ Natani a dita tshamusela Dhavhidhe magana yatshavbo nya giwoniso gegi.

Dhavhidhe a ngu bonga Pfhumu Nungungulu

¹⁸ Khavbo avbo, mufumeli Dhavhidhe a di bela aya khala Nyumbani ga Pfhumu Nungungulu, khuye: “Na nyiri mani eni Pfhumu Nungungulu, ni nyumba yangu yi ngava ya ginani nya gukala u nyi resa avba?

¹⁹ Ambari khu kharato, uwe Pfhumu Nungungulu, mahungu yaya u ma wone na mari ma dugwana mahoni gwago; u ganede gambe khu ndranga ya githumi gyago khu matshigu ma nga gutago. Uwe Pfhumu Nungungulu, igyogyo gihevbudzo ga vathu vatshavbo.

²⁰ Olu Dhavhidhe ginani a na engedzelago gambe gu ganela avbo gwago? Kholu Uwe Pfhumu Nungungulu u ngu giti githumi gyago.

²¹ Khu kotani nya lito lago, ni monyo wago, u giride wugulu watshavbo wowu, gasi wu wonege ga githumi gyago.

²² Khu guralo, u khongolo ngudzu uwe Pfhumu Nungungulu. Mwalo a fananago ni Uwe, gambe mwalo Nungungulu a vbindrago Uwe, kha nga hi sipwidego khu dzindzeve dzathu.

²³ Khu levbini litigo la omu mafuni li fananago ni vathu vago va na Israyeli, avo uwe Nungungulu u va tshudzisidego gasi gu khala vathu vago! U dzi girela lina nya likhongolo ni gu girela vathu vago silo si samadzisago ngudzu tigoni gwago, khu gu tutumisa vathu ni vanungungulu vawe mbeli ga vathu vago, u va tshudzisidego tigoni ga Egipito.

²⁴ U emiside vathu vago va na Israyeli, gasi va khale vathu vago kala gupindruga, Gasi uwe Pfhumu u khade Nungungulu wawe.

²⁵ Gasi olu Pfhumu Nungungulu, tadzisa gitumbiso u tumbisidego githumi gyago ni ga ndranga yaye, u gira kha nga idzo u ganedego khidzo.

²⁶ Khu guralo, lina lago li na khusedzwa kala gupindruga, gu ganedwa gupwani Pfhumu Nungungulu nya Tshivba Yatshavbo, Nungungulu wa na Israyeli! Khu guralo, nyumba ya githumi gyago Dhavhidhe yi na tiyiswa avbo gwago.

²⁷ Kholu uwe Pfhumu nya Tshivba Yatshavbo, Nungungulu wa na Israyeli, u tiviside githumi gyago, khuwe: Nyi na gu vbahela nyumba. Khu kharato, githumi gyago gi tiyide hwambo gu gu girela nombelo yoyu.

²⁸ Gasi olu Uwe Pfhumu Nungungulu, Uwe kamwe khuwe Nungungulu, magana yago khya lisine, u tumbiside ga githumi gyago wuwadi wowu.

²⁹ Gasi olu, dzumela gu kategisa nyumba ya githumi gyago, gasi yi simama mbeli gwago kala gupindruga, kholu, khuwe Pfhumu Nungungulu u ganedego isoso; gasi khu gikategiso gyago, nyumba ya githumi gyago, yi na katega kala gupindruga.”