2 Samuweli 6 - Bhibhiliya Nya Guage

IV. DHAVHIDHE NI NGASA NYA GIDZUMELEDZWANO Dhavhidhe a ngu wuyisa Ngasa nya Gidzumeledzwano Jerusalema

¹ Dhavhidhe a di engedza a tombanisa dzindrena dzatshavbo dza Israyeli, khu tengo nya magumararu magumi mazana (30.000).

² Khavbo avbo, Dhavhidhe, a di khuga ni vathu vaye vatshavbo a hongola Bhahala gwa Judha, gasi gu ya dzega Ngasa ya Nungungulu yi ranwago khu lina la Pfhumu Nungungulu nya dzinyimbi, a khadego vbatshani nya dzikerubhimi.

³ Ngasa ya Nungungulu va di yi thela umo nya kareta nya yiphya, va yi dusa khu nyumbani ga Abhinadhabhi yi guromo Gibheya; Uza ni Ayo, sanana sa Abhinadhabhi khavo va nga gimbidzisago kareta nya yiphya.

⁴ Va di yi dusa khu nyumbani ga Abhinadhabhi, yi nga bani yi romo gigomoni gya Gibheya, gumogo ni Ngasa ya Nungungulu, Ayo a di thangide mbeli nya Ngasa.

⁵ Dhavhidhe gumogo ni vatshavbo va na Israyeli, va di nengela mbeli ga Pfhumu Nungungulu, khu mafumbu yatshavbo nya siwombawomba nya dzingoma, nya gugirwe khu misimbo nya safira, mitandrandra, sitendre, singomana, sitshatsharo nya dzisimbi, dzitsholi ni sitoliyo.

⁶ Aholu avbo va nga vbohago vbagithalatunu gya Nakoni, Uza a di thawuludza mandza yaye gasi gu phara Ngasa ya Nungungulu kholu dzimombe dzi nga vbweta gu thega.

⁷ Khavbo avbo, li di khondra likhulo la Pfhumu Nungungulu a wugela Uza, Nungungulu a di dzegela gu mu veta avbovbo khu kotani nya makolo yaye, afela vbale vbafuvbi ni Ngasa ya Nungungulu.

⁸ Dhavhidhe a di vbisega kholu Pfhumu Nungungulu a nga tsayisago Uza, wulanga wule a wu rana khuye Perezi-Uza, kala na muhuno.

⁹ Litshigu lolo Dhavhidhe a di thava Nungungulu; a ganela, khuye: “Olu yi na bela kharini nyumbani gwangu Ngasa ya Pfhumu Nungungulu?”

¹⁰ Khavbo avbo, Dhavhidhe, kha nga dzumela gukhuye Ngasa ya Pfhumu Nungungulu yi bela nyumbani gwaye Dhoropani ga Dhavhidhe, aholu a di yisa nyumbani ga Obhedhi-Edhomi, Mugati.

¹¹ Ngasa ya Pfhumu Nungungulu yi di ya vbedza migima miraru nyumbani ga Obhedhi-Edhomi wa na Gati; Pfhumu Nungungulu a di kategisa Obhedhi-Edhomi ni ndranga yaye yatshavbo.

Ngasa yi ngu dzegwa yi yiswa Jerusalema

¹² Khavbo avbo, va di tivisa Dhavhidhe, khavo: “Pfhumu Nungungulu kategiside ndranga ya Obhedhi-Edhomi, ni satshavbo a gu naso, khu kotani nya guhaladze Ngasa ya Nungungulu, khu guralo Dhavhidhe a di hongola ga Obhedhi-Edhomi aya dzega Ngasa ya Nungungulu, a yi yisa Dhoropani ga Dhavhidhe khu litsako.

¹³ Avo va nga bani va rwala Ngasa ya Pfhumu Nungungulu, gikhati ni gikhati, va nga bani va gimbila livbandre na mweyo dzitawu va di gira miphaselo khu dzimombe ni dzinvuta nya gunone.

¹⁴ Dhavhidhe a di hana khu tshivba yaye yatshavbo mbeli ga Pfhumu Nungungulu na ambade efodhe nya seda.

¹⁵ Khu guralo, Dhavhidhe ni vatshavbo va na Israyeli, va di gwedzisa Ngasa ya Pfhumu Nungungulu, na va gu kulungela ni gu womba mipundru.

¹⁶ Avbo Ngasa ya Pfhumu Nungungulu yi nga belago Dhoropani, Mikali, nyamahegyane wa Sawule a di gu holelela khu vbagihogotunu a wona mufumeli Dhavhidhe na gu ndragandraga a hana mbeli ga Pfhumu Nungungulu, uye a di swireka monyoni gwaye.

¹⁷ Va di bedza Ngasa ya Pfhumu Nungungulu, va ya yi vega wulanga waye tshatshani wu nga bani wu dongisedwe khu Dhavhidhe; khavbo avbo, Dhavhidhe, a di ningela miphaselo nya guvbiswe ni miningelo nya gurule mbeli ga Pfhumu Nungungulu.

¹⁸ Avbo Dhavhidhe, a nga vbedzago gu ningela miphaselo nya guvbiswe ni miningelo nya gurule, a di kategisa vathu vatshavbo khu lina la Pfhumu Nungungulu nya Tshivba Yatshavbo.

¹⁹ A di kabanisela vathu vatshavbo ni gidzemo gyatshavbo gya na Israyeli, gukhugela ga vama kala ga vanyamayi, moyo ni moyo, a mana gipandre nya gibaba, gitsuwu nya nyama ni dziuvha nya gubange. Khavbo avbo, vathu va di phalalega, muthu ni muthu a hongola gaya gwaye.

Mikali a ngu kawuka Dhavhidhe

²⁰ Avbo Dhavhidhe a nga wuyago gaya gwaye gasi guta kategisa ndranga yaye, Mikali, nyamahegyane wa Sawule, a di duga, a khinga Dhavhidhe, a mu embela, khuye: “Wuzundzo muni a dzi zundzidego khuwo muhuno uye mufumeli wa Israyeli! Gu kala a funungula wutumbu waye mbeli ga sithumi nya vanyamayi sa sithumi saye, gukhwatshi muthu nyambana mapimo!”

²¹ Aholu, Dhavhidhe a di embela Mikali, khuye: “Eni nyi di hana mbeli ga Pfhumu Nungungulu, Uye a nyi hathidego wulangani ga babe wago, ni ndranga yaye yatshavbo, a nyi emisa gu thangela vathu va Pfhumu Nungungulu, a gu va na Israyeli, nyi na ni fanelo gu tsaka.

²² Nyi nga na gu engedza nyi dzi nogisa ngudzu nyi dzi thesa vbavbatshi gu wonani gwangu, aholu nyi na zundzwa khu sithumi sesi nya vanyamayi u si ganedego.”

²³ Khu guralo, Mikali, nyamahegyane wa Sawule, kha nga velega sanana kala gufani gwaye.