2 Samuweli 3 - Bhibhiliya Nya Guage

¹ Gu manegide nyimbi yi vbedzidego myaga nya yingi vbakari ga ndranga ya Dhavhidhe, ni ndranga ya Sawule, Dhavhidhe a di simama gu andra khu tshivba, aholu linyumba la Sawule li di bwelelela hwane.

Ndranga ya Dhavhidhe dhoropani ga Hebroni

² Sanana sa Dhavhidhe si nga velegwa dhoropani ga Hebroni, khesi: Matiwula, khu Aminoni a nga velegwa khu Ayinowami nya Mujezereyeli;

³ nya wuvili khu Kileyabhi, a nga velegwa khu Abhigayili ngadza mufi Nabhali, Mukarimeli; nya wuraru khu Abhisalamo, mwamana wa Mahaka, nyamahegyane wa Talimayi, mufumeli wa Gesuri;

⁴ nya wu na khu Adhoniya, mwamana wa Hagiti; nya livbandre khu Sefatiya, nya guvelegwe khu Abhitali;

⁵ nya livbandre na moyo khu Iteriyamu, wa Egala, uye nuye a diri ngadza Dhavhidhe. Esi khiso sanana sa Dhavhidhe a velegedwego dhoropani ga Hebroni.

⁶ Avbo gu nga dwanwa nyimbi vbakari ga linyumba la Sawule ni linyumba la Dhavhidhe, Abhineri a di emela linyumba la Sawule.

Abhineri a ngu gira gidzumeledzwano ni Dhavhidhe

⁷ Gi diromo gibhayi gya Sawule, gi nga bani gi ranwa khu lina nya gupwani Risipa, nyamahegyane wa Aya; Isobhoseti a di embela Abhineri, khuye: “Khu ginani u bhayidego ni gibhayi gya babe wangu?”

⁸ Khavbo avbo, Abhineri a di goroga ngudzu khu magana ya Isobhoseti a ganela, khuye: “Ina eni nyo va hungo nya yimbwa ya na Judha, gani? Kala na muhuno eni nyi nga gu girela wuhindzi ndranga ya babe wago Sawule, vandriyago, dzipari dzago, gima kha nya gu ningela mandzani ga Dhavhidhe, muhuno uwe u ngu nyi rwega nandru khu mahungu ya nyamayi yoyu.

⁹ Nungungulu a na nyi tsayise khu tshivba eni Abhineri, nya gumba gira iso Pfhumu Nungungulu a sambanyidego ga Dhavhidhe,

¹⁰ gu dzega mufumo wa Sawule, nyi wu tiyisa vbagikhalotunu ga Dhavhidhe, ga Israyeli ni ga na Judha, gukhugela Dhani kala Bherisebha!”

¹¹ Isobhoseti kha nga tiya gu hakha magana ya Abhineri, kholu a di gu mu thava.

¹² Khavbo avbo, Abhineri, a di rumela myango ga Dhavhidhe, a mu embela, khuye: “Gasi litigo la gu lumba mani? Gira gidzumeledzwano ni eni, nyi na gu phasa gu wuyisa vatshavbo va na Israyeli va lumba uwe.”

¹³ Dhavhidhe a di hakha, khuye: “Si khade; eni nyi na gira nago gidzumeledzwano, aholu khu malungelo yaya: Khu na nga wonana ni eni, wa gumba phela khu gu nyi resela Mikali, nyamahegyane wa Sawule, gikhati u vbwetago guta nyi wona.”

¹⁴ Khu hwane, Dhavhidhe a di rumela myango ga Isobhoseti, mwamana wa Sawule, a mu embela, khuye: “Nyi bweledzele mwangadzi wangu Mikali, nyi ningidwego gu khala wangu, khu kotani nyi nga songago lizana makhuna nya Vafilisitiya.”

¹⁵ Khu guralo, Isobhoseti, a di rumela gu va ya mu dzega ga mwama waye Palitiyeli, mwamana wa Layisi,

¹⁶ mwama waye a di mu vbwelegedza na gu lila khu kotani yaye, kala Bhawurimi. Abhineri a di embela Palitiyeli, khuye: “Bwelela gaya gwago.” Uye a di bwelela.

¹⁷ Abhineri a di ganela ni madhota ya na Israyeli a ma embela, khuye: “Gale ngudzu mu nga bani mu vbweta gukhenu Dhavhidhe a khale mufumeli.

¹⁸ Khu guralo, olu mu emiseni, kholu Pfhumu Nungungulu ganede khu Dhavhidhe, khuye: Khu kotani ya githumi gyangu Dhavhidhe, nyi na vbulugisa vathu vangu va na Israyeli, mandzani ga Vafilistiya, ni ga valala vawe vatshavbo.”

¹⁹ Abhineri a di pwadza gambe magana yaya, dzindzeveni dza va na Bhejami. A di khuga a hongola Hebroni na gu bangaladzwa khu magumavili vama, gasi gu ya tivisa ga Dhavhidhe, satshavbo si nga bani si hungidwe khu va na Israyeli ni va na Bhejami.

²⁰ Abhineri gumogo ni magumavili vama a di hongola dhoropani ga Hebroni gasi gu ya manana ni Dhavhidhe; Dhavhidhe a di girela buzo nya gunengele Abhineri ni vathu va nga mu bangaladzago.

²¹ Abhineri a di embela Dhavhidhe, khuye: “Nyi na ya tombanisa vatshavbo va na Israyeli vate avbo ga mufumeli ni mune wangu; gasi vata gira gidzumeledzwano nago, u na fumela vatshavbo khu gudzina gwago.” Dhavhidhe a di tshadzisana ni Abhineri, uye a di hongola khu gurula.

Jowabhi a ngu songa Abhineri

²² Khavbo avbo, vathu va Dhavhidhe ni Jowabhi, va di vboha na va wuya khu nyimbitunu na va gu resa phango nya wukhongolo. Aholu Abhineri khu gikhati gyogyo a diri mwalo ga Dhavhidhe tigoni gumogo ni Hebroni, kholu a di tshadzisanide naye khu gurula.

²³ Avbo Jowabhi, a nga vbohago gumogo ni masotshwa a nga bani ari nawo, va di mu embela khavo; Abhineri, mwamana wa Neri, a di dzude a ta wonana ni mufumeli, uye a mu digide a bwelela khu gurula.

²⁴ Jowabhi a diya ga mufumeli, aya mu wudzisa, khuye: “Gasi ginani u giridego? Abhineri, mwamana wa Neri a di dzude avbo gwago; khu ginani u mu digidego a bwelela khu gurula?

²⁵ U ngu dziti nya gukhuwe uye a dzude avbo gwago gasi guta gu kanganyisa ni guta wona satshavbo iso u girago.”

²⁶ Avbo Jowabhi a nga dugago khavbo ga Dhavhidhe, a di rumela vathu gu landra Abhineri, va ya mu mana namboni gwa Sira. Dhavhidhe nyambati gilo.

²⁷ Avbo Abhineri a nga bwelelago aya Hebroni, Jowabhi a di mu rana khu phuvbo, gukhwatshi a gu vbweta gu ya bhula venga, a di mu paya vbagirumbutunu avbo vbale afa, a dzi phodzela kharati ga novba wa ndriyaye Asayeli.

²⁸ Dhavhidhe na pwide iso si nga dugelelago, a di samala, khuye: “Eni nyi mwalo nandru mbeli ga Pfhumu Nungungulu, khu novba wa Abhineri, mwamana wa Neri.

²⁹ Novba yoyu, wu na thegele hungoni ga Jowabhi ni valongo vaye! Gima gu nga tshuki gu hamugega muthu nyumbani ga Jowabhi nyamba dwala khu novba, nya sokono, gilima nya gugimbile khu dzindronga ambari gisiwana nya gulombe zomola.”

³⁰ Jowabhi ni ndriyaye Abhisayi, va di songa Abhineri, kholu uye a nga songago ndriyawe Asayeli, hwane nya litunga li nga manegago Gibheyoni.

³¹ Dhavhidhe a di embela Jowabhi ni masotshwa yaye yatshavbo, khuye: “Pferulani dzingandzu dzanu, mu ambala silendra mu lilani Abhineri!” Mufumeli Dhavhidhe, a di landra khu hwane nya lithatho.

³² Va di ya dzinga Abhineri dhoropani ga Hebroni; vbafuvbi ni lithowo Dhavhidhe a di womba huwa a lila, vathu vatshavbo va lila.

³³ Dhavhidhe a di emba ndzimo nya gililo a lila Abhineri, khuye: “Ina Abhineri a ngu yela gufa gukhwatshi khidzo li fudego khidzo liphuphulu, gani?

³⁴ Mawogo yago, kha ma nga hungwa gilo, ambari mawundru yago, kha ma hungwa khu makhetshe nya sugu. Wa gu fisa gukhwatshi muthu a thegedego mandzani ga sanana nya sighohi. Vathu vatshavbo va di mu lila.

³⁵ Khavbo avbo, vathu vatshavbo va di ta khongotela Dhavhidhe gukhavo a na hodze guhodza na gu ngari mihani; aholu mufumeli a di sambanya, khuye: “Pfhumu Nungungulu a na nyi tsayise khu tshivba nya gu hodza gibaba, mwendro gilogyogyo, na li si gu pfoli lidambo.”

³⁶ Vathu vatshavbo va di pwisisa ga mahungu yaya, kholu a diri silo nya guzundzege avbo gwawe.

³⁷ Khu litshigu lile, vathu vatshavbo ni va na Israyeli vatshavbo va di dziti gukhavo Abhineri, mwamana wa Neri, kha songwa khu guruma ga mufumeli.

³⁸ Mufumeli a di embela vathu vaye, khuye: “Kha mu dzitini nya gukhenu muhuno thegide muthangeli nya ndrena wa na Israyeli, gani?

³⁹ Gasi a gu bani ari eni, muhuno nyi vbede tshivba, ambari olu nyi wumbedwego gu khala mufumeli. Gasi vama vava nya sanana sa Zeruwa, va na ni tshivba nya gu nyi vbindre. Pfhumu Nungungulu a na ninge tshatshazelo gighohi khu tsayiso nya gighoho gyaye.”