2 Samuweli 15 - Bhibhiliya Nya Guage

Abhisalamo a ngu wugela Dhavhidhe

¹ Hwane nya esi, Abhisalamo a di dzi vbwetela dzikareta ni dzikavalu, ni livbandre magumi vama gasi va tutumatutuma mbeli gwaye.

² Abhisalamo a di gu wuga vbadzimindrutunu aya ema vbafuvbi ni ndzila ya vbanyangwatunu; a wona ni wevbini a yisago mahungu wufumutunu gasi guya lamudwa, a mu rana avbo gwaye a mu wudzisa, khuye: “Wa guta khu dhoropani ga hayini?” Uye a mu hakhago, khuye: “Eni githumi gyago nya guta khu ga limwedo nya madhoropa nya lihundzu la na Israyeli.”

³ Khavbo avbo, Abhisalamo a di mu embela, khuye: “Wona, mahungu yago ma tshambide ni gululama, aholu mwalo a na ya gu yingisago khu gipandre gya wufumutunu.”

⁴ Abhisalamo a di engedza gambe, khuye: “Oh! Nari gupwani kheni va nyi vegago gu khala mufumeli tigoni, ni wevbini muthu atago avbo gwangu khu ketso mwendro khu mahungu, nyi di hadza guta mu lamula khu nayo ni lisine.”

⁵ Ni wevbini a nga bani a hidzimela vbafuvbi gwaye ata noga a yeyedza githawo, Abhisalamo a di hadza gu thawuludza mandza yaye a mu phara ni gu mu bhejari.

⁶ Abhisalamo a di gira kharati ga vatshavbo va na Israyeli va nga bani va guta vata vbweta mufumeli gasi gu lamudwa khuye, khu kharati Abhisalamo a di ndrindra myonyo nya vathu nya vangi va na Israyeli.

⁷ Khu hwane nya myaga mina, Abhisalamo a di embela mufumeli, khuye: “Nya gu lomba gukheni, nyi hongola Hebroni, nyi ya tadzisa gifungo gyangu ga Pfhumu Nungungulu.”

⁸ Kholu githumi gyago gikhati gi nga bani giri dhoropani ga Gesuri tigoni ga Siriya, nyi di dzi vegisede gukheni: “Pfhumu Nungungulu a gu nyi bweledza gambe Jerusalema, nyi naya mu thumela.”

⁹ Khavbo avbo, mufumeli a di mu embela, khuye: “Indra khu gurula.” Khavbo avbo, uye a di khuga a hongola Hebroni.

¹⁰ Abhisalamo a di rumela myango yi ya lembedza mahundzu yatshavbo ya na Israyeli, a va embela, khuye: “Mwa gupwani gudzuma nya pundru, mu na ganelani, khenu: Abhisalamo fumide Hebroni!”

¹¹ Abhisalamo a di ranide mazana mavili (200) vama va Jerusalema a hongola navo, na va siti gilo khu mahungu yoyo.

¹² Avbo Abhisalamo a nga bani a ningela miphaso, a di rana Ayitofeli nya Mugiloni, a nga bani nari moyo nya madhota ya Dhavhidhe nari dhoropani gwaye gwa Gilo. Gikungo gegi gi di tiya kholu, tengo nya vathu va nga bani va ema ni Abhisalamo wu di engedzelana gutala.

¹³ Khu guralo, gu dita muthu ga Dhavhidhe ata mu embela mahungu yoyo, khuye: “Vatshavbo va na Israyeli va dzi emisede gu landrela Abhisalamo.”

¹⁴ Dhavhidhe a di embela vathu vaye vatshavbo a nga bani nari navo Jerusalema, khuye: “Hongoleni hi thava khu guvbiredza, kholu mwalo a na gu vbulugago ga Abhisalamo! Hongoleni hi thave, gasi a si hi mani khu githugedza, hi thegedwa khu libango, gu sasedwa lidhoropa khu matshari.”

¹⁵ Vathu vaye va di hakha mufumeli wawe, khavo: “Khethu ava sithumi sago, si na girege satshavbo kha nga gu gola ga mufumeli, mune wathu.”

¹⁶ Mufumeli a di duga a hongola, a landredwa khu vatshavbo va nyumbani gwaye, aholu, mufumeli a di tshiya likhumi sibhayi saye si sayisa ndranga.

¹⁷ Avbo mufumeli a nga duga a hongola, a di landredwa khu vathu vatshavbo, vaya ema khu nyumba ya mahegiso.

¹⁸ Vathu vaye vatshavbo va di thanga mbeli gwaye; gumogo ni Vakereti vatshavbo, ni Vapeleti vatshavbo, ni Vageti vatshavbo, va diri livbandre na limwedo mazana va ngata khu Gati khu mawundru va thanga mbeli gwaye.

¹⁹ Mufumeli a di embela Itayi nya Mugeti, khuye: “Uwe, khu ginani u hi landrago: Bwelela u nata khala ni oyu a nata fumago, kholu uwe u muluveli, u na bwelela tigoni gwanu.

²⁰ U ngari gu vboha vbanova, ina nyi nga gu dzega nyi legalega nago, eni nyi si guti umo nyi hongolago, gani? Bwelela uwe gumogo ni vandriyago. Wuhigo ni wuwadi wu na khale nago.”

²¹ Itayi a di hakha mufumeli, khuye: Nyi ngu sambanya khu Pfhumu Nungungulu a vbanyago ni ga womi wa mufumeli, mune wangu, kheni: “Gani khu hayi mufumeli, mune wangu, gani lufuni gani guvbanyani, githumi gyago, gi na bani giri nago.”

²² Dhavhidhe a di hakha Itayi, khuye: “Si lulamide, longoloka gumogo ni ethu.” Khavbo avbo, Itayi nya Mugati, a di fola gumogo ni vathu vatshavbo, ni ngamo yaye yatshavbo a nga bani nari nayo.

²³ Litigo latshavbo li di womba dzihuwa li lila, ni vathu vatshavbo navo gumogo ni mufumeli; va tshatuga tsongo wa Kedhroni, va thonona khu ndzila ya giwulani.

²⁴ A dita nuye Abhiyatari ni Sadhoki, ni vatshavbo va na Levhi, na va rwade Ngasa nya Gidzumeledzwano gya Nungungulu; va di vega vbale Ngasa nya Gidzumeledzwano gya Nungungulu kala vathu vatshavbo va duga dhoropani.

²⁵ Khu guralo, mufumeli a di embela Sadhoki, khuye: Bweledza dhoropani Ngasa nya Gidzumeledzwano ya Nungungulu. Nya gu mana wuhigo mbeli ga Pfhumu Nungungulu, uye a na nyi bweledza nyaluphye nyi ya yi wona ni gu wona nyumba yakone.

²⁶ Aholu Uye a gukhuye: “Eni kha nyi ngo tsakiswa gambe khuwe, eni nyi womo avba, a na gire guhaladza gwaye kheni.”

²⁷ Mufumeli a di embela muphasi nya mhamba Sadhoki, khuye: “Wona, gasi khandri uwe mwama nya liwoni, gani?” Bwelelani khu gurula muya dhoropani, gumogo ni sanana sanu mwanago Ayimahasi, Jonatane mwamana wa Abhiyatari.

²⁸ Eni nyi na simama gu sihala mwasini wa giwulani; kala nyipwa mahungu ya iyoyo gwanu.

²⁹ Khu guralo, Sadhoki ni Abhiyatari, va di bwelela Jerusalema ni Ngasa nya Gidzumeledzwano ya Nungungulu, vaya khala iyoyo.

³⁰ Khu guralo, Dhavhidhe a di gwela gigomo nya miolivha na gu lila na sa ambala silato, na fenengede hungoni; vathu vatshavbo va nga bani va mu landrela va di fenengela navo hungoni, va lila gumogo naye.

³¹ Khavbo avbo, va diya tivisa Dhavhidhe, khavo: “Ayitofeli nuye womo mugikungoni gya Abhisalamo.” Dhavhidhe a di ganela, khuye: “Pfhumu Nungungulu, hafumula wusingalagadzi wa Ayitofeli, wu khala wupumbu!”

³² Avbo Dhavhidhe a nga vboha tshokhatunu nya gigomo wulanga wu khozedwago avbo Nungungulu, Husayi, Muaraki, a di mu khinga na ambade libhadzi nya gulaphe nya sitsangala na tade hungoni gwaye khu kudzudzwane.

³³ Dhavhidhe a di mu embela, khuye: “Wa gu hongola ni eni nyi na ya gu lemedza;

³⁴ aholu wa gu bwelela dhoropani uya dzi ganelela ga Abhisalamo khuwe uwe u mufumeli wangu, eni nyi na khala githumi gyago, kha nga gale nyi khadego githumi gya babe wago, ni olu nyi na khala githumi gyago. Wa gu gira kharato, u na hi fuvisela wusingalagadzi wa Ayitofeli.

³⁵ Vaphasi nya mhamba Sadhoki ni Abhiyatari, va na bani vari nago. Satshavbo iso u na gu si pwago na si gu dugelela nyumbani nya wufumu, u naya embeledzela Sadhoki ni Abhiyatari.

³⁶ Wona nya gukhuwe avo va na ni sanana sawe sa sivili, Ayimahasi ni Jonatane, mwamana wa Sadhoki ni Abhiyatari; khavo u na gu va rumago guta nyi tivisa satshavbo u na gu si pwago.”

³⁷ Khavbo avbo, Husayi, pari ya Dhavhidhe, a di bwelela dhoropani; gikhati Abhisalamo a nga bani na gu bela Jerusalema.