2 Samuweli 13 - Bhibhiliya Nya Guage

Tamari a ngu sagedwa khu Amoni

¹ Abhisalamo, mwamana wa Dhavhidhe, a diri ni ndruye nya gumbure ngudzu, lina laye a nga bani nari uye Tamari. Amoni, mwamana wa Dhavhidhe, a di vbela mapimo khuye.

² Amoni a di vbisega ngudzu khu kotani ya ndriyaye Tamari, gu kala a dwala khu kotani yaye, kholu uye a di bani na ngari likendzi gu di si kodzegi gu Amoni a gira gilo avbo gwaye.

³ Aholu, Amoni a diri ni pari, lina laye nya gupwani Jonadhabhi, mwamana wa Simaya, ndruye wa Dhavhidhe; Jonadhabhi yoyu a di gengede ngudzu.

⁴ Uye a di mu embela, khuye: “Khu ginani matshigu yatshavbo u khalago na wu wondride nuri mwamana wa mufumeli? Wa gumba nyi embela khu ginani?” Khavbo avbo, Amoni a di mu hakha, khuye: “Nya gu dogorela Tamari ndruye wa ndriyangu Abhisalamo.”

⁵ Jonadhabhi a di mu embela, khuye: “Lala vbadawutunu gwago u gira gukhwatshi wa gu dwala; gasi babe wago a guta gukhuye a guta gu wusela, mu embele gukhuwe: Nya gu gu lomba gukheni u rumele ndriyangu Tamari a te ata nyi phulela na nyi gu mu wona bwelo khavbo a nyi ninga nyi hakha khu mandzani gwaye.”

⁶ Khu guralo, Amoni a di lala, a pembeledzela gukhwatshi a gu dwala; avbo mufumeli a ngatago guta mu wusela, Amoni a di embela mufumeli, khuye: “Nya gu gu lomba gukheni ndriyangu Tamari, ata nyi phulela sibaba sivili na nyi gu mu wona gasi nyi si hodza khu mandzani gwaye.”

⁷ Khu guralo, Dhavhidhe a di rumela mahungu yaya nyumbani ga Tamari, khuye: “Indra nyumbani ga ndriyago Amoni uya mu phulela guhodza.”

⁸ Tamari a diya nyumbani ga ndriyaye Amoni aya mu mana na lade. A di vbiredza gu dzega wuguvbi a wu suga a gira sibaba a phula na gu mu wona.

⁹ A di dzega litindzalo a si thela mbiyani na gu mu wona, aholu uye a di bomba guhodza. Amoni a di ganela, khuye: “Va na duge vatshavbo va guromo mbeli gwangu. Vatshavbo va di duga.”

¹⁰ Khavbo avbo, Amoni a di embela Tamari, khuye: “Resa guhodza makhuvini gwangu; gasi nyi ta khodza gu hodza khu mandzani gwago. Tamari a di dzega mikati a nga girago, a yi yisa makhuvini ga ndriyaye Amoni.”

¹¹ Avbo a nga mu ningago mbiya, uye a di mu mola, khuye: “Ndriyangu, delu u ta lala ni eni.”

¹² Aholu Tamari a di mu embela, khuye: “Ahihi ndriyangu, u nga nyi gurumedzi gu gira silo nya nga isoso, kholu omu tigoni ga Israyeli, kha va giri silo nya guhandruge nya isoso.

¹³ Kholu nyi naya hayi eni ni dzitshoni nya nga edzi? Uwe nuwe u na sayedwa kha nga moyo nya guhandruge wa Israyeli. Gasi olu nya gu gu lomba gukheni uya ganela ni mufumeli, kholu uye kha na nga nyi himbedzela gudzegwa khuwe.”

¹⁴ Aholu uye kha nga vbweta gu mu yingisa iso a nga bani na gu ganela, kha nga a nga bani nari ni tshivba gu vbindra uye, a di mu pfinya a lala naye.

¹⁵ Khu hwane, Amoni a di vbisega ngudzu monyo waye gu vbindra idzo a nga bani na gu vbisega khidzo khu gu mu haladza. A mu embela, khuye: “Khuga u hongole.”

¹⁶ Uye a di mu hakha, khuye: “Ahihi, ndriyangu; u mwalo fanelo nya gu nyi tutumise kharati; kholu wa gu nyi tutumisa kharati u na bani u giride gighoho nya gikhongolo nya guvbindre egi u nyi giredego.” Aholu uye kha nga mu yingisa.

¹⁷ A di rana lidzaha nya githumi gyaye a gi embela, khuye: “Dusa nyamayi yoyu vbavbandze, u khota lidimba.”

¹⁸ Uye a di ambade dzitshalu nya mavalavala, kholu vanyamahegyane nya makendzi va vafumeli va di gu ambala kharato, khu kharato githumi gya Amoni gi di mu dusa vbavbandze gi khota lidimba.

¹⁹ Khavbo avbo, Tamari a di baga nguma a dzi phorodza hungoni gwaye, a pferula guambala nya mavalavala a nga bani na ambade; a rwala mawogo hungoni a bwelela na gu lila.

²⁰ Ndriyaye Abhisalamo, a di mu wudzisa, khuye: “Gasi khandri ndriyago Amoni, u nga bani nuri naye, gani? Olu degula ndriyangu. Uye i ndriyago, monyo wago wu nga tshaniseki khu mahungu yoyo.” Khu kharato Tamari a di khala nyumbani ga ndriyaye Abhisalamo, na gu vbisega ngudzu.

²¹ Avbo mufumeli Dhavhidhe a nga pwago silo satshavbo sesi, a di vila khu likhulo.

²² Aholu Abhisalamo kha nga ganela ni Amoni, nya sadi, ambari nya guvivbe; kholu Abhisalamo a di gu vengana ni Amoni, kholu a nga pfinya ndriyaye Tamari.

Abhisalamo a ngu songa Amoni

²³ Na gu vbindride myaga mivili, Abhisalamo a diri ni vagayi nya dzinvuta dzaye, tigoni ga Bhahali-Hazori, a guromo vbafuvbi ni Efrayimi, Abhisalamo a di ramba sanana satshavbo nya sikhwathana sa mufumeli.

²⁴ Abhisalamo a dita ga mufumeli ata, khuye: “Wona githumi gyago gi na ni vagayi vaye nya dzinvuta; nya gu lomba gukheni mufumeli ni vathu vago, mute ga githumi gyago.”

²⁵ Aholu mufumeli a di embela Abhisalamo, khuye: “Ahihi mwanangu, kha hi na hongola hatshavbo gasi hi si gu lemedzi ngudzu.” Abhisalamo ambari a nga mu gurumedzago, Dhavhidhe kha nga dzumela gu hongola naye, aholu a di mu kategisa.

²⁶ Khavbo avbo, Abhisalamo a di khuye: “Uwe wa gu tandrega, hi ninge ndriyathu Amoni hi hongole naye;” mufumeli, khuye: “Gasi u fela guya mu rini?”

²⁷ Gani olu, Abhisalamo a di mu gurumedza, kala a mu diga a hongola ni Amoni gumogo ni sanana satshavbo nya vama sa mufumeli.

²⁸ Abhisalamo a di leletela madzaha yaye, khuye: Khedzani gwadi, gikhati monyo wa Amoni wu na gu bani wu tsakide khu wadwa, eni nyi na mi embelani, kheni: Songani Amoni, enu mu songeni nyambana hwanga, kholu kheni nyi mi rumago! Tiyani mu khale vama nya dzindrena.

²⁹ Sithumi sa Abhisalamo si di gira Amoni kha nga idzo va nga leletedwago khidzo; khavbo avbo, sanana sa mufumeli si di khuga, muthu ni muthu a khilela kavalu yaye a tutuma.

³⁰ Na va ngari ndzilani, wu di vboha mwango ga Dhavhidhe wuya mu embela khuwo: “Abhisalamo a songide madzaha yago yatshavbo, mwalo a tshadego.”

³¹ Khavbo avbo, mufumeli a di khuga a pferula dzingandzu dzaye, a thega vbavbatshi; sithumi saye niso si di gira niso kharalo, nasiri ni dzingandzu nya guhagale.

³² Aholu Jonadhabhi, mwamana wa Simaya, ndruye wa Dhavhidhe, a di hakha, khuye: “Mufumeli ni mune wangu, u nga thurugi gukhuye ma vbede yatshavbo madzaha ya mufumeli, kholu uye a fudego basi khu Amoni, kholu gukhugela litshigu lile Amoni a nga pfinyago ndriyaye Tamari, Abhisalamo a di sambanya gu songa Amoni.

³³ Khu guralo, mufumeli wangu, u nga vbisegi monyo khu gu alakanya gukhuwe, madzaha yatshavbo ya mufumeli ma fude, kholu uye a fudego basi khu Amoni.

³⁴ Abhisalamo a di thava. Lidzaha nya muwoneleli li di khusa maho, li wona vathu nya vangi na va gu relela khu hwane gwaye, khu ndzila yi dugelago bambe nya gigomo.

³⁵ Khu guralo, Jonadhabhi a di embela mufumeli, khuye: “Wona, madzhaha ya mufumeli ma nguta khu yale; kha nga idzo gi ganedego khidzo githumi gyago.”

³⁶ Khavbo avbo, na nga gu vbedza gu ganela, madzaha ya mufumeli ma di vboha, ma ta khusa lito ma lila, Dhavhidhe nuye a lila gumogo ni sithumi saye khu huwa nya yikhongolo ngudzu.

Abhisalamo a ngu thavela Talimayi

³⁷ Khu kharati, Abhisalamo a di tutuma a thavela ga Talimayi, mwamana wa Amiyudhi, mufumeli wa Gesuri. Dhavhidhe a di lila mwanaye matshigu yale yatshavbo.

³⁸ Khu guralo, Abhisalamo a di thavela Gesuri aya khala iyoyo myaga miraru.

³⁹ Dhavhidhe a di hegisa gu lundra Abhisalamo kholu monyo waye wu di manega na wu rude hwane nya gu Amoni na fude.