2 Samuweli 11 - Bhibhiliya Nya Guage

Dhavhidhe a ngu bhaya ni Bheti-Sebha

¹ Khu mwaga wu nga landrelago, gikhati vafumeli va nga bani va duga guya nyimbitunu, Dhavhidhe a di rumela Jowabhi, gumogo ni vathu vaye vatshavbo va na Israyeli guya sasela va na Amoni; avo va diya ghova tigoni ga Rabha, aholu Dhavhidhe a di tshade Jerusalema.

² Khu limbe litshigu ni silambo, Dhavhidhe a di wuga khu vbadawutunu gwaye, a gimbilagimbila vbatshani nya langwe nya nyumba yaye nya wufumu; khavbo avbo, nari khu vbalangwetunu, a di wona nyamayi na gu hamba; nyamayi yoyu a di mburide ngudzu.

³ Dhavhidhe a di rumela vathu guya wudzisa khuye mani nyamayi wule. Avo va di mu embela, khavo: Khu Bheti-Sebha, nyamahegyane wa Eliyani, ngadza Uriya, Muhiti.

⁴ Dhavhidhe a di rumela vathu guya mu rana; uye a dita a ta lala naye; kholu a di dzi agiside manyalani nya migima yaye, khu hwane a di bwelela nyumbani gwaye.

⁵ Nyamayi yoyu a di khura mimba. A di rumela guya embela Dhavhidhe, khuye: “Nyi na ni mimba.”

⁶ Khavbo avbo, Dhavhidhe a di rumela mwango ga Jowabhi, guya mu embela, khuye: Rumela Uriya, Muhiti eno gwangu. Khu guralo, Jowabhi a di rumela Uriya, Muhiti ga Dhavhidhe.

⁷ Uriya na dzude ga Dhavhidhe, uye a di mu wudzisa khuye, womo kharini Jowabhi, vathu va gu khala kharini, ni nyimbi ya gu gimbila kharini.

⁸ Khu hwane Dhavhidhe a di embela Uriya, khuye: “Indra gaya gwago uya hamba migondro yago.” Avbo Uriya a nga dugago khu nyumbani nya wufumu, a di landredwa khu giningwa nya gudugele nyumbani ga mufumeli.

⁹ Aholu Uriya a di lala nyangwani ga mufumeli, gumogo ni satshavbo sithumi sa mufumeli waye, a si releli gaya gwaye.

¹⁰ Dhavhidhe a di embedwa gupwani: “Uriya kha relela gaya gwaye.” Dhavhidhe a di mu wudzisa, khuye: “Gasi khu wuyi khu guendrani, gani? Khu ginani u si vbohigo ndrangani gwago?”

¹¹ Uriya a di mu hakha khuye, Ngasa nya Gidzumeledzwano, yomo tshatshani; va na Israyeli ni va na Judha, gumogo ni mune wangu Jowabhi, ni sithumi sa mune wangu vomo vbavbandze; eni nyi ngu yela gu bela nyumbani gwangu, nyi hodza ni gu sela, nyi lala ni mwangadzi wangu, gani? Nyi ngu sambanya avbo gwago khu hefemulo wago gukheni, gima kha nyi na nga gira nya nga isoso.

¹² Dhavhidhe a di embela Uriya, khuye: “Khala avba muhuno ni mindru, nyi na gu bweledza u hongole.” Uriya a di khala dhoropani ga Jerusalema litshigu lile ni ilo li landrelago.

¹³ Dhavhidhe a di mu rana guta hodza ni gu sela naye ndrangani gwaye, a mu levisa; ni silambo, Uriya a di duga aya lala vbadawutunu gwaye, gumogo ni sithumi sa mune waye, a si hongoli gaya gwaye.

Gufa ga Uriya

¹⁴ Na gugide, Dhavhidhe a di lova lidangalila a li rumela ga Jowabhi khu mandzani ga Uriya.

¹⁵ Umo nya lidangalila a di lova, khuye: “ Vega Uriya khu avbo nyimbi yi vbisago ngudzu, mu mu diga avbo gasi a kodza gu songwa.”

¹⁶ Avbo Jowabhi a nga khedzisisa lidhoropa, uye a di vega Uriya khavbo a nga bani a wona vama nya dzindrena.

¹⁷ Khavbo avbo, vama va dhoropani mule, va di duga guta dwana ni Jowabhi; avbovbo gu songidwe vathu nya gukari nya sithumi sa Dhavhidhe gumogo nuye Uriya nya Muhiti.

¹⁸ Khavbo avbo, Jowabhi a di rumela gu ya tivisa ga Dhavhidhe satshavbo si nga dugelelago nyimbini, a di va leletela gambe, khuye:

¹⁹ Avbo u na vbedzago gu tivisa mufumeli mahungu nya nyimbi,

²⁰ Mufumeli a gupwa likhulo, a gu embela, khuye: “Khu ginani mu nga hidzimela vbafuvbi ni lidhoropa mu dwanela avbo? Kha mu dziti nya gukheni va na mi hakhani na vari khu dzindzarini, gani?

²¹ Gasi khu mani a nga songa Abhimeleki, mwamana wa Jerubheseti? Khandri nyamayi a nga rinya giwindri nya gitshindro nari eyi Tebhesi, gani? Khu ginani mu hidzimela vbafuvbi ni likhokhola? Khavbo avbo, u na mu embela, khuwe: Githumi gyago nigyo Uriya nya Muhiti gi fude.”

²² Mwango wule wu di phara ndzila wu hongola. Avbo wu nga vboha, wu diya tivisa Dhavhidhe satshavbo iso Jowabhi a nga mu rumela guya ganela.

²³ Mwango wu di embela Dhavhidhe khuwo: “Vama vale va diri ni tshivba gu vbindra ethu; va di ta hi dhumela na hiri vbavbandze, ethu hi di hirimisana navo kala vbanyangwani.

²⁴ Khavbo avbo, va nya malaho va di emide khu vbatshani nya likhokhola va khwandrela siholoma ga ethu sithumi sago, gu fude likhumi na livbandre na vararu sithumi sa mufumeli, gumogo ni githumi gyago Uriya, Muhiti.”

²⁵ Mufumeli Dhavhidhe a di hakha mwango, khuye: “U naya embela Jowabhi khuwe u nga tshaniseki ngudzu khu isoso kholu litshari la gu songa oyu ni wule; tshingisa nyimbi u dwana ni lidhoropa lolo kala u va pala; indra mu tiyisedza kharato Jowabhi.”

Dhavhidhe a ngu dzegana ni Bheti-Sebha

²⁶ Avbo ngadza Uriya a nga pwago gupwani mwama waye fude, a di mu lila.

²⁷ Avbo a nga vbedzago gu gira gililo, Dhavhidhe a di rumela va ya mu dzega ata nyumbani nya wufumu; ata khala mwangadzi waye a mu velegela gyanana nya gikhwathana. Aholu esi si giridwego khu Dhavhidhe si di vivbide mahoni ga Pfhumu Nungungulu.