2 Samuweli 10 - Bhibhiliya Nya Guage

Dhavhidhe a ngu khozisa va na Amoni ni Vaasiriya

¹ Khu hwane nya esi, a difa mufumeli wa na Amoni, a fuma wulangani gwaye mwamana waye Hanumi.

² Khavbo avbo, Dhavhidhe a di ganela, khuye: “Nyi na girela wuhindzi Hanumi, mwamana wa Nahasi, kha nga idzo babe waye a nyi giredego neni.” Dhavhidhe a di rumela sithumi saye gasi guya mu tangadzisa khu kotani nya lufu la babe waye; sithumi sa Dhavhidhe si di vboha tigoni gwa na Amoni.

³ Aholu dzindruna dza na Amoni dzi di embela mune wawe, khidzo: “Hanumi, wa gu alakanya gukhuwe olu Dhavhidhe a nga rumela vathu guta gu tangadzisa a gu zundza babe wago, gani? Khandri a di rumela vathu vaye gasi guta wona lidhoropa leli a vbweta mano nya gu li khungumule, gani?”

⁴ Khavbo avbo, Hanumi, a di dzega sithumi sa Dhavhidhe, gimwegyo ni gimwegyo a gi vila giledzu gihaya gimwegyo, a va pilela gipandre gimwegyo nya dzingandzu dzawe kala maragoni a va bweledza va hongola.

⁵ Avbo Dhavhidhe a pwidego mahungu yaya, a di rumela vathu nya gu va khinge, kholu, vathu vava, va diri ni dzitshoni nya dzikhongolo ngudzu. Mufumeli a di rumela guya va embela, khuye: Simamani mu khala Jeriko, kala si dandra siledzu sanu, khavbo mu na wuyago.

⁶ Avbo va na Amoni va nga wonago gukhavo va vbahide livengo ga Dhavhidhe, avo va di rumela myango gu ya ramba magumavili magumi mazana (20.000) vama nya Vaasiriya va Bheti-Rehobhi, ni Vaasiriya va Zobha, ni likhumi mazana (1.000) vama va mufumeli wa Mahaka, ni likhumi na mavili magumi mazana (12.000) va mufumeli wa Tobhi.

⁷ Avbo Dhavhidhe a nga pwago esi, a di rumela Jowabhi ni masotshwa yatshavbo nya dzindrena.

⁸ Va na Amoni va di duga va ya fola ni matshari yawe khu vbanyangwatunu, aholu Vaasiriya va Zobha ni Reyobhi ni vama va Tobhi, ni va Mahaka, va di ema khu vbavbandze.

⁹ Avbo Jowabhi a nga wonago gukhuye, valala va mu khingide khu mbeli ni hwane, a di hatha vama nya dzindrena vbakari ga va na Israyeli gwatshavbo a hongola navo gu ya dwana ni Vaasiriya.

¹⁰ Avo va nga tshalago a di va ningela mandzani ga ndriyaye Abhisayi, gasi afela gu dwana ni va na Amoni.

¹¹ Jowabhi a mu embela, khuye: “Wa gu wona gukhuwe Vaasiriya va ngu nyi pala, uwe u nata nyi phasedzela, eni neni nya gu wona gukheni va na Amoni va ngu gu pala, nyi nata gu phasedzela.

¹² Tiya longo hi dwanela vathu ni madhoropa ya Nungungulu wathu; Pfhumu Nungungulu, a na gire iso a si wonago nari sadi mbeli gwaye.

¹³ Khavbo avbo, Jowabhi, gumogo ni vathu vaye va diya mbeli gu ya dwana ni Vaasiriya; Vaasiriya va di padwa va tutuma mbeli gwaye.

¹⁴ Avbo va na Amoni va nga wonago gukhavo Vaasiriya va padwe va tutuma, avo navo va di tutuma mbeli ga Abhisayi va wuya madhoropani; khavbo avbo, Jowabhi a di wuya a bwelela Jerusalema khiyo nya gudwane ni vana Amoni.

¹⁵ Avbo Vaasiriya va nga wonago gukhavo va padwe khu va na Israyeli, va di ya tombana gasi gu ya dzi wumbedza.

¹⁶ Hadhadhezeri a di rumela gu ya ranwa Vaasiriya va nga bani vari khisikheyi nya tsongo, Helani; Sobhaki, muthangeli nya nyimbi ya Hadhadhezeri, a di soma aya mbeli gwawe.

¹⁷ Avbo va nga tivisago Dhavhidhe mahungu yaya, uye a di tombanisa vatshavbo va na Israyeli, va tshatuga Joridhani va vboha Helani, Vaasiriya va di fode ni gu soma gu dwana ni Dhavhidhe.

¹⁸ Aholu Vaasiriya va di tutuma mbeli ga va na Israyeli, Dhavhidhe a di songa livbandre na mavili mazana (700) vama nya gugimbidzise dzikareta, ni magumana magumi mazana (40.000) vama nya gu khilele dzikavalu; a songa ni Sobhaki, muthangeli nya nyimbi.

¹⁹ Avbo vafumeli vatshavbo, ni sithumi sa Hadhadhezeri, va nga wonago gukhavo va padwe, va di lomba gurula ga va na Israyeli, va thumela va na Israyeli; khavbo avbo Vaasiriya kha va nga engedza gambe guta phasedzela va na Amoni.