2 Pedro 2 - Bhibhiliya Nya Guage

Vaprofeti ni vahevbudzi nya malipha

¹ Matshigu ya gale, va manegide vaprofeti nya malipha vbakari nya vathu, khu kharato gambe, va na manega vahevbudzi nya malipha vbakari gwanu. Va na hevbudza sihevbudzo nya gupfhungumule, nya malipha, va na danga Muhevbudzi a nga va vbanyisago. Isoso si na va gira va mbembiswa nyamba hwela.

² Vathu nya vangi va na simama gu vbanya mavbanyelo nya guvivbe. Khu kotani nya avo, vathu nya vangi va na ganela guvivba khu ndzila nya lisine.

³ Kotani nya misuwo nya dzitsapawu, vahevbudzi vovo nya malipha va na mi kalavela, va ganela mitsheketo nya gu yi vange. Gale na dongide mulamuli wawe, ni mumbembisi wawe wugide kha na hwela.

⁴ Nungungulu kha ditshedza dzingilozi dzi nga ghohago, aholu, a di dzi yisa phalani nya guete nya gidema a dzi diga mugidemani, a lindrela litshigu nya gu dzi lamule,

⁵ gambe Nungungulu kha ditshedza litigo la gale, aholu a di resa talo nya mati tigoni ga vale nya guvivbedwe khu myonyo, a vbulugisa Nowa basi ni vambe nya livbandre na vavili, afela gu ganela guvbanya nya gululame gwa Nungungulu.

⁶ Nungungulu mbembiside mayigo ya Sodhoma ni Ghomora, a ma pfhungumula khu nilo, kha nga giyeyedzo nya esi si na gu giregago ga ava va nya guvivbedwa khu myonyo.

⁷ Uye a di vbanyisa Loti, muthu nya wadi a nga bani a gu garadzega, kholu a di guti guvbanya nya vathu vale nya guvivbe.

⁸ Matshigu yatshavbo, mwama yoyo nya gululame a nga bani a gu vbanya vbakari gwawe, a di saniseka khu monyoni gwaye, khu gu wona ni gupwa silo nya guvivbe si nga bani si gu girwa khu vathu vale.

⁹ Pfhumu a ngu mati mano nya guvbulugise khayo ava va khodwago gwaye, a ngu kodza gambe gu vega tsayisoni ava nya guvivbedwe khu myonyo, kala litshigu nya gulamudwe.

¹⁰ Ngudzungudzu avo va landrelago gunavela nya silo nya guvivbe, va nyenya mufumo wa ndzadzini. Vahevbudzi vovo nya malipha va gu dzi girisa ni gu dzi gugumugisa, aholu, kha va khali hwanga gu vala sivangwa nya gwage sa Ndzadzini.

¹¹ Ambari dzingilozi dzi gu na ni tshivba ngudzu guvbindra vahevbudzi vovo nya malipha, kha dzi va thuledzi khu gu va vala mbeli ga Nungungulu.

¹² Aholu, vathu vovo va ngu fanana ni sivangwa nyambana mapimo, si velegedwago gusotwa si gu songwa. Avo va gu gira matshandza khu silo nyamba siti. Khu guralo, va na pfhungumudwa nga sirengo nya likhabi.

¹³ Va na livba khu sisaniso guvivba va nga girelago vakwawe. Avo va ngu tsakiswa khu dzitshoni ni gikhunguvanyiso, va gu hagana gikhati nya mihani khu mahaganelo yawe nya wukanganyisi, gikhati va hengelago nanu mibuzoni.

¹⁴ Kha va khedzi nyamayi nyamba mu dogorela, kha va garali khu gu gira sighoho. Va gu kanganyisa vathu nyamba tiya. Mapimo yawe khya gu alakanya gu mana dzitsapawu. Avovo va vadwe khu Nungungulu.

¹⁵ Va digide ndzila nya gululame va penga; va landra ndzila ya Bhalahama, gyanana gya Bheyori, a nga vbweta gughanya khu gu gira guvivba.

¹⁶ Uye a di kawukwa kotani nya sighoho saye. Kholu, buru yi si ganeligo, yi di ganela nga muthu, yi ganedza muprofeti wupumbuni gwaye.

¹⁷ Vathu vovo, va khade nga milambo nyambana mati, nga mapfhi ma pengiswago khu phuvbo; Nungungulu a va hathede wulanga nya gidema nya guthise ngudzu kala gupindruga.

¹⁸ Avo va gu ganela silo nya gu dzi khusedze nya wupumbu, va sengedzela vathu khu gunavela gwawe nya silo nya guvivbe ni wubhayi, va ndreyisa vale va guromo vbafuvbi ni gu duga ndzilani ya vale va vbanyago guvivbani.

¹⁹ Va gu va tumbisa gutshulega, aholu avo vari dzikhumbi nya silo nya guvivbe. Kholu, muthu ni muthu khumbi nya esi si mu fumago.

²⁰ Khu guralo, vale va nga muti Pfhumu ni Muvbanyisi wathu Jesu Kristo, va gu vbuluga ga sihena nya guvivbe nya litigo, khu hwane va gu wuya va modwa gambe khu silo sesi, va guta nyenyeza ngudzu guvbindra guhegulani.

²¹ A diri tshukwana va sa yiti ndzila nya gululame, guvbindra gu yiti va wuya khavbo va bwelela gambe muguvivbani, va hambana ni milayo nya yadi va hakhidego.

²² Iso si giregidego ga vathu vava gu yeyedza lisine nya esi si ganedwago nya gupwani: “Yimbwa ya gu bwelelela vbamagosetunu gwaye; khumba yi handzidwego ya gu bwelela yi ya puluwundra gambe maragani.”