2 Makabhewu 14 - Bhibhiliya Nya Guage

Gurula ni Nikanori

¹ Hwane nya myaga miraru, Judha gumogo ni dzipari dzaye va di tiviswa gupwani Dhemetriyo, mwamana wa Selewuko, tshigide siwoni ga Tiripoli, tigoni ga Fenisiya, ni masotshwa nya tshivba ngudzu, gumogo ni gikwata nya gikhongolo nya dzingalava nya nyimbi.

² A di dziti gambe gukhuye litigo lomo mandzani gwaye, hwane nya gu na ningide lufu Antiyoko gumogo ni muphasedzeli waye, Lisiya.

³ Ga matshigu yoyo, mwama nya gukari nya gupwani khu Alisimo, a nga bani ari khongolo nya vaphasi nya mhamba ga matshigu hwane, aholu a nga dzi nyenyezisa khu gudzina gwaye, khu gikhati nya gugurumedzwe gu landrisa tumbunugo nya mavbanyelo nya wuhedheni; na gu wona gukhuye a diri mwalo yimbe ndzila nya gu dzi vbanyise mwendro gu hidzimela gambe vbagiluvelotunu nya guage,

⁴ khu mwaga nya lizana ni livbandre magumi ni moyo (151), a diya manana ni mufumeli Dhemetriyo. A di mu ninga gihugu nya ndralama, litamo limwedo nya ngindru, a mu ninga gambe ni matamo nya gukari nya miolivha, ma talago gu ningedwa khu vakhozeli Nyumbani ga Nungungulu. Litshigu lile, kha mu embela gimbe gilo.

⁵ Aholu a di londrola gikhati nya gyadi gasi gu thumisa gikungo gyaye nya guvivbe, litshigu a ranidwego khu Dhemetriyo gu ya bela huwoni nya madhota, gasi gu wudziswa khu esi Vajudha va suvago ni gu si lindrela. Uye a di hakha, khuye:

⁶ “Vajudha vale, va ranwago pwani Vahasidhi, va thangedwago khu Judha Makabhewu, va gu wusa dzinyimbi ni gu kutsedzela gu wugela mufumo, gambe kha va digi litigo li mana gurula.

⁷ Khu gighelo gyogyo, eni kamwe, ambari nyi wandredwego wuzundzo wangu nya mavelego, nya gu ganela khu thumo nya wuphasi nya wukhongolo nya mhamba, olu nyi dzude avba;

⁸ nya guhegule khu kotani nya gutumbege ga esi si godwago khu mufumeli, nya wuvili, khu kotani nya gukhathalele wuwadi wa vathu va tigoni gwathu. Kholu khu kotani nya vhilinganya yi wuswago khu vale nyi nga va ganelago, litigo lathu latshavbo la gu vbanya gutshanisekani nya gukhongolo ngudzu.

⁹ Gikhati u na gu tiviswago silo satshavbo sesi, uwe mufumeli, khu wuwadi u wu wonegisago ga vatshavbo, gira satshavbo si vbwetegago gasi guvbanyisa litigo lathu ni lifumbu lathu li guromo mhangoni.

¹⁰ Kholu, na nga gu vbanya Judha, gu na garadza gu manega gurula tigoni.”

¹¹ Na ganede esi, dzimbe dzipari dza mufumeli dzi nga bani dzi si mu goli Judha, dzi di kutsedzela ngudzu likhulo la Dhemetriyo.

¹² Uye a di emisa khu guvbiredza Nikanori, muthangeli wa gale nya gikwata nya vakhileli nya dzindzofu, a mu gira ndruna ya Judheya, a mu ninga nayo

¹³ nya gukhuye a hongole aya songa Judha, a phalalegisa masotshwa yaye ni gu wumbedwa Alisimo kha nga muphasi nya mhamba ya Nyumbani nya yikhongolo ya Nungungulu.

¹⁴ Khu kharato, va nya mayigo va nga bani va digide Judheya khu gu thava Judha, va di ya dzi pata ga Nikanori, na va gu pimisa gukhavo wusiwana ni gutshaniseka ga Vajudha si na va resela gukhadzisega.

Nikanori a ngu gira pwanano ni Judha

¹⁵ Vajudha na va pwide mahungu nya gurumedwe nya masotshwa ya Nikanori ni wudhumeli wa va nya mayigo, va di phorola nguma hungoni ni gu lombelela ga wule a hathidego vathu vaye kala gupindruga; uye a nga vhikela thomba yaye gikhati gyatshavbo khu magirelo nya guwonege.

¹⁶ Khu guruma ga muthangeli wawe, masotshwa ma di hongola khu guvbiredza ma ya mana nala vbafuvbi ni talala wa Dhesawu.

¹⁷ Simoni, ndruye wa Judha, a di phede litunga ni Nikanori, aholu a di padwa khu kotani nya simbe sikwata ya valala si nga vbohago khu githugedza.

¹⁸ Ambari ulo, Nikanori, na gu yiti tshivba ni gutiya nya vama va Judha ni wundrena va dzi ningelago khuwo litungatunu khu gudwanela litigo lawe, a di wona nari tshukwana gu vbedza litunga nyamba vbaladza novba.

¹⁹ Khu kharato, a di rumela Posidhoniyo, Teyodhotu ni Matatiya gu ya hevbula ni Vajudha, mawonelo nya gugire pwanano nya gurule.

²⁰ Mawonelo yoyo nya pwanano nya gurule ma vbedzide gikhati nya gulaphe na ma gu hevbudwa; muthangeli nya khongolo a di ma tivisa ga masotshwa, ma dzumedwa khu vatshavbo.

²¹ Gu di vegwa litshigu nya gutshangane vathangeli khu gisihaledza. Khu phuvbo ga eno ni eno, gu di thanga kareta mweyo, va vega sikhalo sivili nya wuzundzo.

²² Judha a di vegedzela malangani nya gukhugege vama na va pharide matshari, na va dongide gu dwana va gu wona wuvivbi na wu dongisedwe khu valala. Tshangano wa vathangeli wu tsakiside.

²³ Nikanori a di hongola aya khala Jerusalema, nyamba khunguvanyisa muthu, a di vbangana gidzemo nya masotshwa a nga bani a guta nawo.

²⁴ Gikhati gyatshavbo a di vbweta gubangaladzana ni Judha khu wupari nya lisine.

²⁵ A di mu lomba gukhuye a dzege nyamayi, a velega sanana. Judha a di dzega nyamayi a vbanya na tshulegide.

Gupheledza nya gudwanisane

²⁶ Alisimo na wonide wupari nya wadi ga vathangeli va vavili, a di khedzisa gwadi malungelo nya gidzumeledzwano, a khuga a hongola ga Dhemetriyo, aya singedza Nikanori gukhuye a ngu wugela mufumo, kholu emiside Judha, nala nya mufumo, gu khala mutshikedzi waye.

²⁷ Mufumeli, na tadzidwe hungo khu malipha ya muthu yoyu nya guvivbedwe khu monyo, a di lovela lidangalila Nikanori, a gu mu embela khuye kha tsakiswa khu gidzumeledzwano gi giridwego. A di mu ninga nayo nya gukhuye a mole Makabhewu, a mu rumela Antiyokiya khu guvbiredza.

²⁸ Na hakhide gitiviso gegi, Nikanori a di vbisega gumogo ni marongo ni wusiwana khu gu gurumedzwa gu fanya gidzumeledzwano gi giridwego ni Judha, nyamba hakha gihoso nya gukari gwaye.

²⁹ Aholu, na si dzi kodzi gu hambanisa guruma ga mufumeli, a di luga mano, a virela gikhati nya gyadi nya gugire esi a rumidwego.

Nikanori a ngu thusedzela Vajudha

³⁰ Makabhewu a di wona gukhuye Nikanori a gu mu yeyedza khovbe nyambasi yadi, ni gukhuye wupari wawe kha wungari idzosaye ni gale, a di pimisa gukhuye magirelo yaya ma gu yeyedza guvivba. Khu guralo, a di tombanisa vathu nya vangi nya tsawa waye, a gu mwalalega mahoni ga Nikanori.

³¹ Gikhati Nikanori a tugudego gukhuye padwe khu wugengeli wa Judha, a di hongola ga Nyumba nya yikhongolo ni lisima ya Nungungulu, umo vaphasi nya mhamba va nga bani va gu ningela phaso, a va gurumedza gukhuye va mu ninge mwama wule.

³² Khu vbale, vaphasi nya mhamba va di mu sambanyela gukhavo kha va muti avbo a manegelago avbo mwama a mu vbwetago.

³³ Khavbo avbo, a di khusa mandza a nonedza Nyumba ya Nungungulu, a gu sambanya, khuye: “Mwa gumba nyi ningani Judha na hungidwe, nyi na pfhungumula Nyumba yeyi ya Nungungulu, nyi na khungumula giluvelo, wulanga wa wumowo nyi na vbaha nyumba nya wuzundzo ya Bhaku.” Na ganede esi a di khuga a hongola.

³⁴ Khavbo avbo, vaphasi nya mhamba, va di khusedza mandza ndzadzini va lombelela ga wule gikhati gyatshavbo a dwanelago vathu vaye, va ganela, khavo:

³⁵ “Pfhumu nya Sivangwa Satshavbo, uwe u si keneledwigo khu gilo, u dzinide gu mana nyumba nya nombelo vbakari gwathu gasi u vbanye umo.

³⁶ Khu guralo, Uwe Nungungulu nya Guage ngudzu, Pfhumu nya guage gwatshavbo, vhikela Nyumba yeyi yi ngari guagiswago, yi vbulugise gunyenyeza gwatshavbo, olu kala gupindruga.”

Gu songwa ga Razi

³⁷ Gu giregide gambe gu Razi, moyo nya madhota ya Jerusalema, aya thuledzwa ga Nikanori. A diri mwama nya gukhathalele vathu va tigoni gwawe, a di gu tidwa ngudzu ni gu ningwa githawo, a di gu ranwa pwani babe wa Vajudha, khu kotani nya wuwadi waye.

³⁸ Gale, khu gikhati nya gubombe wuhedheni, a di singedzwa gupwani a ngu thumisa Gijudha, khu Gijudha a di ningela givili gyaye ni womi waye na tiyide.

³⁹ Nikanori, a nga bani a vbweta gu yeyedza wulala waye nya guthise ga Vajudha, a di ruma guvbindra livbandre mazana (500) vama gasi gu ya mu mola.

⁴⁰ A di gu pimisa gukhuye khu gu mu mola, gu na girega gigaradzo nya guthise ga Vajudha.

⁴¹ Aholu, gikhati masotshwa ma nga bani ma gu wandra likhokhola nya nyumba ni gu gurumedza gubela, na va ningidwe nayo nya gu khondrise nilo ni gu vbisa malimba, Razi, na gu vbweta gu modwa, a di dzi paya khu litshari laye.

⁴² A di wona nari tshukwana gufa na agide guvbindra gu thegela mandzani ga vathu nya guvivbedwe khu myonyo ni gu hakha gunyenyeza gu hambanago ni wuzundzo waye.

⁴³ Aholu khu kotani nya phiredza a nga dzi bayisago khiyo, gilondra kha gya vboha avbo nya gu mu songe. Kha nga ulo masotshwa ma nga belago nyumbani gwaye, uye a di tutuma a ya lita vbatshani nya libhiyo, khu gutiyisela a di dzi digeledza gasi gu thegela vbatshani gwawe.

⁴⁴ Aholu, avo khu guvbiredza va di ndreya phuvbo, Razi, a di thega wulanga va nga wu diga liphanga.

⁴⁵ Kha nga a nga bani a gu dagata na tade khu guvbisega, a di khuga, ambari ulo novba waye wu nga bani wu goga kha nga gifefe khumo nya silondra saye nya guthise, a di tsemakanya khu vbakari nya gidzemo na gu tutuma. A di lita ga giwindri nya dzitshoka nya guvbire.

⁴⁶ Na vbede novba a di dusa mahembe khu mandza yaye, a gu ma rinya vbatshani ga valala, na gu lomba ga Pfhumu nya womi ni liphuvbo khuye gi na vbohe gikhati nya guwuyisedwe nyaluphye mahembe yaye. Wu di vbela kharati womi waye.