2 Makabhewu 10 - Bhibhiliya Nya Guage

Guwusedzwa nya nombelo

¹ Makabhewu gumogo ni vangana vaye, na va gu vhikedwa khu Pfhumu, va di wandra nyaluphye Nyumba ya Nungungulu ni lidhoropa.

² Va di khungumulela siluvelo si nga bani si giridwe mitendrelani khu va nya mayigo, gumogo ni sihuru sawe nya miphaso.

³ Hwane nya gu na va agiside Nyumba ya Nungungulu, va di vbaha giluvelo nya giphya; khu nilo va nga wu dusago khu musiwindrini nya gutiye, va di ningela miphaso, hwane nya myaga mivili na va emide gu ningela miphaso; va di vbisa libani, va khondrisa dzikandriya, ni gu vega nyaluphye sibaba nya ningelo.

⁴ Na va giride esi, va di khidzima vbavbatshi va kuha mafu khu khovbe, va lombelela gukhavo Pfhumu a va vbulugise gu wona sigaradzo nya gufanane esi; aholu va gu pheledza gambe gu ghoha, a na va kawuke khu wuwadi, a si va ningeli mandzani ga va nya mayigo nya guvivbedwe khu monyo ni wughevenga.

⁵ Khu litshigu la limwedo nya gualakanye myaga nya gunyenyeziswe Nyumba ya Nungungulu khu valuveli, a gu litshigu nya magumavili na livbandre (25) nya ngima wa Kisilewu, gu di girwa khuwo nya guagiswe gwaye.

⁶ Va giride buzo yoyu khu gunengela nya gukhongolo ngudzu, buzo wu vbedzide gipimo nya livbandre na mararu matshigu. Wu di fanana ni buzo nya Mitshatsha, na va gu alakanya gukhavo, gikhatinyana hwane va di gu gira buzo yoyu nya wukhongolo nya Mitshatsha musigomoni ni mavbalani kha nga sirengo sa khabini.

⁷ Khu gighelo gyogyo, va di gu dzega nyagidogomelane, ni matamo nya gunyuge ni matamo nya migindru vaya rungudza Wule a nga va ninga tshivba nya guagise Wulanga Waye nya Guage.

⁸ Gu di vegwa nayo, khu lidangalila nya mufumo wu gurumedzago gukhuwo tigoni gwatshavbo ga Judheya gu girwa, khu mwaga ni mwaga, khu matshigu yamamowo, gialakanyiso nya buzo yoyu.

III. HUWELELO NYA MASOTSHWA YA JUDHA MAKABHEWU Gupadwa ga Gorigiya ni Thimoti

⁹ Hi vbedzide gu ganelela mafelo ya Antiyoko a ranwago pwani khu Epifaniyo.

¹⁰ Olu hi na ganela khu esi si giregidego matshiguni ya Antiyoko Ewupatori, mwamana wa Antiyoko nya guvivbedwe khu monyo, khu gu humbisa hi na ganela khu guvivba gu giridwego khu kotani nya dzinyimbi.

¹¹ Gikhati a phedego gufuma, mufumeli yoyu a di ningela thumo nya gugimbidzise mufumo ga moyo nya gukari nya gupwani khu Lisiya, muthangeli nya masotshwa ni mwamangulu wa sipandre sa Kelesiriya ni Finisiya.

¹² Khu guralo, Pitolomewu a ranwago pwani khu Makoroni, a di pimisa gu dzi yeyedza kha nga muthu nya gululame ga Vajudha khu gu wona guvivba va nga bani va giredwa, a di vbweta gu va fumela khu gurula,

¹³ aholu a di thuledzwa ga Ewupatori khu dzipari dza mufumeli. Kha nga gambe, khu gimbe gipandre, a nga bani a ranwa pwani mulogovedzi, kholu a nga diga Kipre, a nga bani a pharisidwe khu Filometori, ni olu a nga dzi ningelago gu thumela Antiyoko Epifaniyo, a di vbela tshivba khu gu wona gukhuye kha dzi kodzi gu thuma wufumu khu wuzundzo, a di dzi vbindrisa womi waye khu gu sela rendre nya gusonge.

¹⁴ Aholu Gorigiya na hathidwe gu khala muthangeli nya masotshwa nya sipandrengulu sile, a di gu livbela masotshwa nya gute khu mambe mayigo, gambe a di khedzisa gikhati gyatshavbo gasi gu dwanisa Vajudha.

¹⁵ Khu gikhati gya gimwegyo, va na Edhomi, vamune nya makhokhola nya mangi nya lisima, va gorosa Vajudha, khu gu hakha vale va nga tutumiswago khu Jerusalema, gikhati gyatshavbo va di vbanya khu dzinyimbi.

¹⁶ Khavbo avbo, Makabhewu gumogo ni vabangaladzi vaye, hwane nya gu na va giride nombelo ni gu lomba guphaswa khu Nungungulu, va di dhumela makhokhola ya Idhumeya.

¹⁷ Va di ma dwanisa khu tshivba ni tshivba, va gu ma wandra; va di pala avo va nga bani va gu dwana khu vbatshani nya mabhiyo va songa avo va nga bani va gu thegela mandzani gwawe; va songidwe gipimo nya magumavili magumi mazana (20.000) vama.

¹⁸ Livbandre na mana magumi mazana (9.000) nya vale va nga thavago, va di vbweta wulanga nya gusihale umo nya makhokhola mavili, ma gu na ni malungelo nya gu dzi kodze gu dzi vhikela ma gu randredwa.

¹⁹ Makabhewu a di tshiya Simoni, Josefa ni Zakewu gumogo ni vama nya vangi gasi gu tshala va dwana ni avo va nga thavelago makhokholani momo, ni gu va randrela, uye mune wurumba a di hongola umo litunga li nga bani li gu lomba khu tshivba.

²⁰ Vabangaladzi va Simoni, khu gukhathalela dzitsapawu, va di dzumela gu rengeledwa khu vale va nga bani varomo vbatshani nya dzilangwe dza dhoropani. Khu tengo nya livbandre na mavili magumi magumi mazana (70.000) dzidrakima, va di phasedzela gu thava tengo nya gukari nya vathu.

²¹ Makabhewu, na pwide sitiviso sesi, a di tshanganisa vathangeli nya litigo a gu thuledza masotshwa yale, khu kotani va rengisidego vandriyawe khu gu fela dzitsapawu, va gu tshula valala.

²² A di ruma gukhuye va songwe kha nga valogovedzi, khu gu landrela a di wandra makhokhola ya mavili.

²³ Litunga leli li nga thangedwago khuye mune, li mu dugelede gwadi, songide guvbindra magumavili magumi mazana (20.000) vama ga makhokhola ya mavili.

²⁴ Thimoti, a nga padwago khu Vajudha guphela, a di tombanisa masotshwa nya mangi ya mambe mayigo, a tshanganisa gambe tengo nya wungi nya vakhileli nya dzikavalu, nya gute khu Aziya. Va bela ndzilani va gimbila gu thonona Judheya, vari ni gikungo nya guye wandra litigo khu tshivba nya matshari.

²⁵ Thimoti gikhati a nga bani a gu hidzimela, Makabhewu ni vangana vaye va di dzi thedzela mafu hungoni, va di hunga giwunu khu libhandri nya miba.

²⁶ Va di khidzima vbafuvbi ni giluvelo, va gu lombelela ga Nungungulu gukhavo a va pwele wusiwana, a khale nala wa valala vawe, ni muwugeli wa vawugeli vawe, gukhedza khu gitumbiso nya nayo.

²⁷ Na va vbedzide gu gira nombelo, va di phara matshari, va gu duga va hongola hwindzo ni lidhoropa, va ya ghova mbeli ga nala.

²⁸ Khu mambagugya, mitsawa ya mivili nya masotshwa yi di dwana litunga, vambe va di tumba gupala, nasiri khu tshivba yawe basi, aholu khu giphaso gambe gya Pfhumu, gasi vambe, va di ya dzi ningela litungani, na va gu themba tshivba yawe basi.

²⁹ Vbakari nya tshimatshima nya litunga, valala va di wona na gu tumbuluga khu ndzadzini livbandre dzingwazi nya nyimbi nya guthavisege na dzi khilede dzikavalu dzi gu na ni matomu nya ndralama, dzi ngata emago khu mbeli, dzi gu thangela Vajudha.

³⁰ Dzingwazi dzimbili dzi di ema kheno ni eno gwa Makabhewu, dzi mu vega vbakari, dzi mu vhikela khu matshari yawe, va si mu digi a gu bayiswa. Khu gikhati gya gimwegyo, va di gu rinya siholoma ni gugendza valala, va gu va vbandza mahoni, va phalalega khu pfilupfilu, va mbemba na va tade khu gusamala.

³¹ Khu guralo, va di songwa magumavili magumi ni livbandre mazana (20.500) vama nya gugimbile khu mawundru, ni livbandre na limwedo mazana (600) nya vakhileli nya dzikavalu.

³² Thimoti a di thavela likhokholani nya tshivba ngudzu gu ranwago pwani Gezeri, muthangeli wakone nya gupwani khu Kereya.

³³ Makabhewu gumogo ni avo a nga bani ari navo, na va tade khu tshivba, va di randrela likhokhola, gipimo nya matshigu mana.

³⁴ Avo va nga bani va romo ndrani, khu gu themba gutiya nya likhokhola, va di vala nyamba hegisa ni gu ganela dzitshamba.

³⁵ Khu guralo, na gugide litshigu nya livbandre, tsawa moyo nya magumavili madzaha nya masotshwa ya Makabhewu, na va vbisegide khu likhulo khu gupwa magana nya guvale Nungungulu, va di ndraga libhiyo na va tiyide, va ya songa vatshavbo va nga bani va gu va wona mbeli gwawe.

³⁶ Vambe navo va di lita libhiyo, va rinya nilo mudzisikani, va gu vbisa vahembululi na va nga gu vbanya. Na ma ghwawuledwe malimba, ma di bela masotshwa ma nga bani ma nga tshade, gu wandrwa kharati lidhoropa.

³⁷ Va di songa Thimoti a nga bani a sihade namboni, va songa gambe ni ndriyaye Kereya ni Apolofani.

³⁸ Na gu vbindride esi, va di embelela dzindzimo ni sizimba ga Pfhumu a giridego siliwugiso nya sikhongolo khu gufela gu vhikela Israyeli, a gu va ninga gupala.