2 Dzipfhumu 9 - Bhibhiliya Nya Guage

Jewu a ngu todzwa gu khala mufumeli wa Israyeli

¹ Khavbo avbo, muprofeti Elizewu a di rana moyo nya vapizane va vaprofeti a mu embela, khuye: “Hunga giwunu gyago khu libhandri, u phara mandzani gwago kheho yeyi nya mafura u hongola Ramoti-Gileyadhi;

² nu vbohide iyoyo, u na khedza umo a guromo Jewu, mwamana wa Josafani, tugulu wa Ninisi; u bela u mu khusa a ema vbakari ga vandriyaye, u mu yisa makhuvini ya vbakari.

³ U na dzega kheho nya mafura, u ma guhula hungoni gwaye, u ganela kharati, khuwe: Pfhumu Nungungulu a ngu ganela, kharati: Eni nyi ngu gu todza gu khala mufumeli wa Israyeli. Khavbo avbo, u na tula lidimba u tutuma, u nga hweli.”

⁴ Khu guralo, lidzaha lile nya muprofeti, li di khuga li hongola Ramoti-Gileyadhi.

⁵ Gikhati li bedego, vathangeli vatshavbo nya dzinyimbi va di khade vbale; a di ganela, khuye: “Muthangeli, nyi na ni lito nyi vbwetago gu gu embela.” Jewu a di hakha, khuye: “Ga mani wakone vbakari nya ethu?” Uye a di khuye: “Nya gu thula uwe muthangeli!”

⁶ Khavbo avbo, Jewu a di khuga a bela nyumbani, lidzaha li di mu guhulela mafura hungoni gwaye, li mu embela, khilo: “Pfhumu Nungungulu wa Israyeli a ngu ganela, kharati: Eni nyi ngu gu todza gu khala mufumeli wa vathu va Pfhumu Nungungulu ni wa Israyeli.

⁷ U na sasela nyumba ya Akabi, mune wago, gasi nyi phodza novba wa sithumi sangu, vaprofeti ni novba wa sithumi satshavbo sa Pfhumu Nungungulu, wu vbaladzidwego khu gyandza gya Jezabheli.

⁸ Ndranga yatshavbo ya Akabi yi na mbemba; nyi na fuvisa vama vatshavbo va nyumbani ga Akabi, dzikhumbi ambari va nya gutshulega tigoni ga Israyeli.

⁹ Kholu nyumba ya Akabi, nyi na yi gira kha nga idzo nyi nga gira nyumba ya Jerobhowamo, mwamana wa Nebhati, kha nga nyumba ya Bhahasa, mwamana wa Ayiya.

¹⁰ Jezabheli a na hodzwa khu dzimbwa mahangeni ya Jezireyeli, kha na mana ni muthu nya gu mu dzinge.” Khavbo avbo, a di tula lidimba a tutuma.

¹¹ Gikhati Jewu a dugidego a hongola ga sithumi sa mune waye, si di mu wudzisa, khiso: “Gwadi ulolo, gani? Muthu yoyo nya guhandruge a di tela ginani avbo gwago?” Uye a di va hakha, khuye: “Mu ngu muti gwadi muthu yoyu ni maganelelo yaye.”

¹² Aholu avo va di hakha, khavo: “Malipha yayo! Olu hi pwadzele.” Jewu a di va embela, khuye: A di khuye: Pfhumu Nungungulu wari, khuye: “Eni nyi gu todzide gu khala mufumeli wa Israyeli.”

¹³ Khavbo avbo, va di dzegela gu; muthu ni muthu a dusa mwendra waye a wu ladza vbavbatshi nya migondro yaye gasi gu gira sigandro, va womba pundru va huwelela, khavo: “Jewu a ngu fuma!”

Jewu a ngu songa Joramo ni Akaziya

¹⁴ Khu guralo, Jewu, mwamana wa Josafani, tugulu wa Ninisi, a di gira gikungo nya guwugele Joramo. Joramo khu gikhati gyogyo, a di gu sayisa Ramoti-Gileyadhi, uye gumogo ni va na Israyeli vatshavbo, khu kotani ya Hazayeli, mufumeli wa Siriya.

¹⁵ Aholu mufumeli Joramo, a di bwelela a hongola Jezireyeli, gasi gu ya thumwa silondra a nga giredwago khu Vaasiriya, gikhati a nga dwana ni Hazayeli, mufumeli wa Siriya, Jewu a di khuye: “Mwa gu bani mu pimisa kharato, gu vbwetega a si dugi muthu khu dhoropani, ambari gu nyemuga aya tivisa mahungu yaya Jezireyeli.”

¹⁶ Khavbo avbo, Jewu a di khilela kareta yaye nya nyimbi, a hongola Jezireyeli, kholu Joramo a diri vbadawutunu khu gu dwala. Akaziya, mufumeli wa Judha a di relede nuye guya mu wusela.

¹⁷ Muwoneleli a nga bani nari vbatshani nya likhokhola la Jezireyeli, avbo a nga wonago nyimbi ya Jewu, na yi guta a di khuye: “Nya gu wona na guta masotshwa nya nyimbi.” Joramo a di ganela, khuye: “Dzega mukhileli moyo nya kavalu a va khinga a va wudzisa, khuye: Gwadi, gani?”

¹⁸ Khavbo avbo, mukhileli nya kavalu a di mu khinga aya mu wudzisa, khuye: “Mufumeli a gu wudzisa, khuye: Gurula utago khugo, gani?” Jewu a di hakha, khuye: “Mahungu muni u gu navo uwe khu gurula, na? Leya avbovbo u nyi landra khu hwane gwangu.” Muwoneleli a di tivisa mufumeli, khuye: “Mwango wu vbohide avbo gwawe, aholu kha wu wuyi.”

¹⁹ Khavbo avbo, a di rumela mumbe mukhileli nya kavalu; na vbohide avbo gwawe, a di va wudzisa, khuye: “Mufumeli a ngu wudzisa, khuye: Gwadi lolo mutago khugo, gani?” Jewu a di mu hakha, khuye: “Uwe wa gu vbweta gurula gasi gu gu thuma ginani? Delu u nyi landra khu hwane.”

²⁰ Muwoneleli a di tivisa mufumeli, khuye: “Uye nuye a vbohide avbo gwawe, aholu kha wuyi; gani olu magimbidziselo yakone nya kareta gukhwatshi khya Jewu, tugulu wa Ninisi, kholu a gu gimbila khu wurena.”

²¹ Joramo a di khuye: “Ambagisa kareta yangu.” Va di mu ambagisela kareta yaye. Joramo mufumeli wa Israyeli, ni Akaziya, mufumeli va Judha, va di duga, moyo ni moyo karetani gwaye, va khinga Jewu, vaya mu mana mahangeni ya Nabhoti, nya Mujezireyeli.

²² Avbo Joramo a nga wonago Jewu, a di khuye: “Jewu, gwadi, gani?” A di mu hakha, khuye: “Gu na manega kharini gurula na wu nga wu simama wubhayi wa mayi wago Jezabheli ni wuloyi waye na wu ngari khu talo?”

²³ Joramo a di thendregedza a thava khu gu tutuma, a embela Akaziya, khuye: “Akaziya, avba yomo mhango?”

²⁴ Jewu a di dzega wulaho waye a wu khwandra khu tshivba a hekha Joramo, gighalala gi di bela khu magatani gi paya monyo gi duga khu vbakhanatunu a thega na fude karetani gwaye.

²⁵ Khavbo Avbo, Jewu a di embela ndruna yaye Bhidhikari, khuye: “Mu dzege u mu dzudzuga mahangeni ya Nabhoti, Mujezireyeli; kholu alakanya gikhati gile eni ni uwe avbo hi nga bani na hi khilede dzikavalu hi landra babe waye Akabi, dundruga gukhuwe Pfhumu Nungungulu a di ganede magana yaya, khuye:

²⁶ Khu lisine, a ngu ganela Pfhumu Nungungulu, kha nga vbanova nyi wonidego novba wa Nabhoti, u na wu livba idzosaye mahangeni momu, a ngu ganela Pfhumu Nungungulu. Olu mu khuse u mu dzudzuga mahangeni momu, kha nga idzo a ganedego khidzo Pfhumu Nungungulu.”

Jewu a ngu songa mufumeli wa Judha

²⁷ Avbo Akaziya, mufumeli wa Judha, a nga wonago esi, a di tutuma khu ndzila yi thononago Bheti-Hagani. Aholu Jewu a di mu landra a mu lundra, khuye: “Mu songeni nuye karetani gwaye.” Va di mu bayisa na gu gwela Guri, gu khadego vbafuvbi ni Ibhileyamu, a thava a tutumela Megidhu aya fela iyoyo.

²⁸ Sithumi saye, si di mu khiledza karetani si mu yisa Jerusalema, vaya mu dzinga ga lithowo li guromo vbafuvbi ni vavelegi vaye, Dhoropani ga Dhavhidhe.

²⁹ Akaziya phede gufuma Judha khu mwaga nya likhumi na moyo, nya gufume ga Joramo, mwamana wa Akabi.

Jewu a ngu songa Jezabheli ngadza Akabi

³⁰ Jewu a dita Jezireyeli, Jezabheli, na pwide gu vboha gwaye, a di todza maho yaye, a mburisela hungoni gwaye, a khedzisela khu vbagihogwanatunu.

³¹ Jewu na nga gu bela nyangwani nya lidhoropa, Jezabheli a di huwata, khuye: “Ina wa gu resa gurula uwe Ziniri, musongi wa mune wago, gani?”

³² Jewu a di khusa maho yaye a khedza vbagihogotunu a ganela, khuye: “Khu mani a emago ni eni? Khu mani? Mithenwa mivili mwendro miraru yaye, yi di hidzimela vbagihogotunu yi mu khedza.

³³ Khavbo avbo, Uye a di khuye: “Mu rinyeni khu vbatshani a thega vbavbatshi.” Avo va di mu rinya khu vbatshani a thega vbavbatshi, novba waye wu di mitegedzela ndzari ni dzikavalu, Jewu a mu pfara khu kareta.

³⁴ Hwane nya gu bani na hodzide ni gu sela, a di bela nyumbani a ganela, khuye: “Sayisani muyuyuteli yoyu, mu mu dzinga kholu nyamahegyane wa mufumeli.”

³⁵ Va di hongola gasi guya mu dzinga, aholu va diya mana basi girwarwa, migondro ni sandza.

³⁶ Khavbo avbo, va di wuya vata mu tivisa; uye a di va embela, khuye: “Aya khu magana ya Pfhumu Nungungulu, a ganedego khu ga githumi gyaye Eliya, Mutesibhi, khuye: Mahangeni ya Jezireyeli, dzimbwa dzi na hodza nyama ya Jezabheli.”

³⁷ Girumbi gya Jezabheli, gi na khala kha nga gitoromu mahangeni ya Jezireyeli; avbo gu na gumba ganedwa gambe gupwani: “Oyu khu Jezabheli.”