2 Dzipfhumu 8 - Bhibhiliya Nya Guage

Nyamayi nya Musunami a ngu bwelela tigoni gwawe

¹ Elizewu a di ganela ga nyamayi wule a nga mu wusela gyanana gyaye nya gufe, khuye: “Khuga uwe gumogo ni mwama wago, u ya luvela ga litigo u na gu li wonago, kholu Pfhumu Nungungulu, reside ndzala ga litigo leli, yi na gu vbedzago livbandre na mivili myaga.”

² Nyamayi wule a di khuga, kha nga guganela ga muthu wa Nungungulu; a di khuga gumogo ni lipango laye, vaya luvela tigoni ga Vafilisitiya, livbandre na mivili myaga.

³ Avbo gu nga vbelago livbandre na mivili myaga, nyamayi a di wuya khu tigoni ga Vafilisitiya, aya ga mufumeli aya lomba nyumba yaye ni gipeto gyaye.

⁴ Mufumeli a di gu bhula ni Geyazi, githumi gya muthu wa Nungungulu, a mu lomba gu a mu embeledzela sisamadziso nya sikhongolo si giridwego khu Elizewu.

⁵ Geyazi a di mu embeledzela idzo a wusidego khidzo lidzaha li nga bani na li fude; mayi wa lidzaha lile, a di laledza a lomba ndranga yaye ni marembwe yaye; Geyazi a di ganela ga mufumeli, khuye: Mune wangu, khuye oyu nyamayi wakone, ni gyanana gyakone gambe khigyo egi, gi nga vbanyiswago khu Elizewu.

⁶ Mufumeli a di wudzisa nyamayi, uye a di mu tshamusela; khavbo avbo, mufumeli a di mu ninga gimbe githumi a gi embela, khuye: “Mu bweledzele satshavbo si nga bani siri saye, ni mihandro yatshavbo yi dugidego khu mahangeni gwaye gukhugela litshigu lile a dugidego khilo, kala muhuno.”

Elizewu tigoni ga Dhamasiko

⁷ Khu hwane, Elizewu a dita Dhamasiko. Bheni-Hadhadhi, mufumeli wa Siriya, a di gu dwala; va diya mu tivisa, khavo: “Muthu wa Nungungulu vbohide omu.”

⁸ Khavbo avbo, mufumeli a di embela Hazayeli, khuye: “Dzega sagwati u phara mandzani gwago u ya wonana ni muthu wa Nungungulu; u wudzisa ga Pfhumu Nungungulu khavbo gwaye, khuwe: “Ina nyi na vbanya ga ngumbe yeyi, gani?”

⁹ Khu guralo, Hazayeli, a diya wonana naye, a dzega siningwa nya sadi nya wumburi sa Dhamasiko, nya gu rwadwe khu magumana dzingameriya; ata si vega mbeli gwaye a mu embela, khuye: “Mwanago Bheni-Hadhadhi, mufumeli wa Siriya, a nyi rumede avbo gwago guta gu wudzisa gukhuye: Ina ga ngumbe yeyi nyi na vbanya, gani?”

¹⁰ Elizewu a di mu hakha, khuye: “Indra u ya mu embela, khuwe: Khu madwali yaya khu na hawuluga; aholu Pfhumu Nungungulu a nyi yeyedzide gukhuye: Khu lisine u nafa.”

¹¹ Muthu wa Nungungulu a di khusa maho huye rwada mahoni gwaye kala a khala dzitshoni. Muthu wa Nungungulu a di lila.

¹² Khavbo avbo, Hazayeli, a di mu embela, khuye: “Mune wangu, khu ginani u lilago?” Uye a di mu hakha, khuye: “Kholu nyi ngu dziti gukheni u na girela guvivba va na Israyeli, u va vbisela makhokhola yawe, ni gu songa madzaha yawe khu matshari, u vbadzulela sanana sawe, u pferula sirumbu nya dzimimba dza vagadzi vawe.”

¹³ Hazayeli a di hakha, khuye: “Eni githumi gyago na nyiri eni mani nya gukala nyi gira silo nya guthise nya nga isoso, olu nyi gu yimbwa ya walo?” Elizewu, a di mu embela, khuye: “Pfhumu Nungungulu a nyi yeyedzide gukhuye uwe u na bani na wuri mufumeli wa Siriya.”

¹⁴ Khavbo avbo, a di khuga khavbo ga Elizewu, ata ga mune waye ata mu wudzisa, khuye: “A di gu embela ginani Elizewu?” Uye a di mu hakha, khuye: “A di khuye khu lisine u na hawuluga.”

¹⁵ Khu litshigu li landrelago, Hazayeli, a di dzega vholwe a wu peta a wu nega matini a fenengedza khovbe ya mufumeli a mu sokhovedza khuwo kala uye afa. Hazayeli a di fuma wulangani gwaye.

Jeyoramo mufumeli wa Judha

¹⁶ Khu mwaga nya livbandre nya gufume ga Jeyoramo, mwamana wa Akabi, mufumeli wa Israyeli, na nga gu fuma Josafati tigoni ga Judha, a phede gufuma mwanaye Jeyoramo tigoni ga Judha.

¹⁷ Uye a diri ni tanga nya magumararu na mivili myaga gikhati a phedego gu fuma, fumide Jerusalema gipimo nya livbandre na miraru myaga.

¹⁸ A di landrela dzindzila dza vafumeli va Israyeli, kha nga idzo va nga girago khidzo va nyumbani ga Akabi, kholu mwangadzi waye a diri nyamahegyane wa Akabi; a di thuma mithumo nya guvivbe mbeli ga Pfhumu Nungungulu.

¹⁹ Aholu, khu kotani nya lihaladzo ga githumi gyaye Dhavhidhe, Pfhumu Nungungulu kha dzina gu pfhungumula Judha, kha nga a nga bani a mu tumbiside gukhuye a na mu ninga mwenge vbakari ga sanana saye kala gupindruga.

Edhomi a ngu wugela Judha

²⁰ Matshiguni gwaye, va na Edhomi va di tereka va dzi emisela mufumeli wawe, va bomba gu rumwa khu Judha.

²¹ Khu guralo, Jeyoramo a di vbindra khu Zayiri ni dzikareta dzaye dzatshavbo; a di wuga ni wutshigu aya sasela va na Edhomi, va nga bani va mu randrede, gumogo ni vathangeli nya dzikareta; khu guralo, vathu vaye va phalalega va hongola mitshatshani gwawe.

²² Khu guralo, va na Edhomi va dzi hambaniside ni va na Judha kala na muhuno; khu gikhati gyogyo Libhina nuye a di dzi hambanisa.

²³ Yimbe mithumo ya Jeyoramo ni satshavbo iso a giridego, si lovidwe umo nya Libhuku nya Matimo ya Vafumeli va Judha.

²⁴ Jeyoramo a di lala gumogo ni vavelegi vaye, a dzingwa gumogo ni vavelegi vaye Dhoropani ga Dhavhidhe; wulangani gwaye fumide mwanaye Akazi.

Mufumo wa Akazi

²⁵ Khu mwaga nya likhumi na mivili nya gufume ga Joramo, mwamana wa Akabi, mufumeli wa Israyeli, a di phela gu fuma tigoni ga Judha Akazi, mwamana wa Jeyoramo, mufumeli wa Judha.

²⁶ Akazi a diri ni tanga nya magumavili na mivili myaga, gikhati a phedego gu fuma, fumide mwaga moyo Jerusalema; Lina la mayi waye a diri uye Ataliya, nyamahegyane wa Oniri, mufumeli wa Israyeli.

²⁷ A di gimbila khu ndzila ya na Akabi, a di thuma mithumo nya guvivbe mbeli ga Pfhumu Nungungulu, kha nga va na Akabi, kholu a diri mwane wa ndrangani gwa Akabi.

²⁸ A di soma nyimbi gumogo ni Joramo, mwamana wa Akabi, vaya dwana ni Hazayeli, mufumeli wa Siriya, Ramoti wa Gileyadhi, Vaasiriya va di bayisa Joramo.

²⁹ Khavbo avbo, mufumeli Joramo a di bwelela Jezereyeli guta thumwa dzimbanga a nga paywago khu Vaasiriya, tigoni ga Rama, gikhati a nga bani na gu dwana ni Hazayeli mufumeli wa Vaasiriya; Akazi, mwamana wa Jeyoramo, mufumeli wa Judha, a di relela tigoni ga Jezireyeli gu ya wona Joramo, mwamana wa Akabi, kholu a di gu dwala.