2 Dzipfhumu 7 - Bhibhiliya Nya Guage

Elizewu a ngu tivisa gufumwa nya dzimbewu

¹ Khavbo avbo, Elizewu a di ganela, khuye: “Yingisani magana ya Pfhumu Nungungulu; Pfhumu Nungungulu a ngu ganela kharati, khuye: Mindru khu gikhati nya nga egi, pimo moyo nya wuguvbi nya wadi, wu na rengwa khu sikulu mweyo, ni mipimo mivili nya mala, yi na rengwa avba nyangwani ga Samariya khu sikulu mweyo basi.”

² Aholu ndruna mweyo ya mufumeli eyi a nga bani a gu khighela vbagyandzatunu gwaye, yi di phindrula muthu wa Nungungulu, khiyo: “Ambari Pfhumu Nungungulu a gu tula sihogo ndzadzini, ina silo soso si nga kodzega gu girega, gani?” Uye a di hakha, khuye: “Uwe u na si wona khu maho yago, aholu khu na nga si hodza.”

³ Vbanyangwatunu gu diri ni vama vana nya gudwale khu sokono, avo va di ganela khu gyawe, khavo: “Hi na khala sathu avba kala hifa, gani?

⁴ Ha gukhethu: Hi na bele dhoropani, hi na yafa khu ndzala, kholu dhoropani gu ni ndzala; aholu ha gu khala avba, hi nafa gambe; hongoleni hiya dzi ningela lizumboni ga Vaasiriya; va gu hi diga, hi na vbanya, aholu va gu hi songa, hi nafa basi.”

⁵ Va di khuga ni silambo va hongola lizumbotunu ga Vaasiriya; avbo va nga vbohago nyangwani, kha va ngaya mana muthu.

⁶ Kholu Pfhumu, a di pwadza lizumboni ga Vaasiriya, ligwaha nya dzikareta ni dzikavalu, kha nga ligwaha nya gikwata nya gikhongolo nya masotshwa; avbo va nga embelana khu gyawe, khavo: “Dzi woneleni kholu mufumeli wa Israyeli, a hi rambede vafumeli nya Vahiti ni vafumeli va Egipito guta hi sasela.”

⁷ Khu guralo, va di duga ni vbawutshigu va tutuma, va tshiya mitshatsha yawe, dzikavalu, ni dziburu dzawe; va tshiya wughovelo nyambana gilo, gasi gu vbanyisa womi wawe.

⁸ Va nya sokono vava na va vbohide, nyangwani nya wughovelo va di bela ga moyo nya mitshatsha, va hodza ni gu sela, va dzega vbale parata, ndralama ni guambala vaya si siha; va bwelo khavbo va wuya ga wumbe tshatsha vaya dusa gambe simbe silo vaya siha.

⁹ Khavbo avbo, va di ganela khu gyawe, khavo: “Kha ha gira gwadi! Kholu litshigu leli, litshigu nya mahungu nya yadi; aholu ethu ha gu degula hi lirela kala gugya, hi na tshuka hi dugedwa khu mhango; khu guralo, olu hongoleni ndrangani ga mufumeli.”

¹⁰ Khu guralo, va diya huwelela mahungu yaya ga vawoneleli nya dzinyangwa nya lidhoropa, khavo: “Hi di gu hongode lizumboni la Vaasiriya, aholu kha haya mana muthu, ambari gupwa lito nya muthu, hi di mana basi dzikavalu na dzi hungidwe, gumogo ni dziburu, mitshatsha na yi romo kha nga idzo yi nga bani yi romo khidzo khu gale.”

¹¹ Va di rana vawoneleli nya dzinyangwa, avo vaya tivisa va nyumbani ga mufumeli.

¹² Mufumeli a di wuga ni wutshigu a embela sithumi saye, khuye: “Olu nya gu vbweta gu mi embela gukheni Vaasiriya ginani va hi giredego. Avo va ngu dziti gwadi gukhavo ethu hi na ni ndzala nya yikhongolo; khu guralo, avo va di duga khu lizumboni vaya sihala khabini, na va gukhavo: Va gu duga khu dhoropani, hi na va mola na va nga gu vbanya, ethu hi bela dhoropani.”

¹³ Khavbo avbo, moyo nya sithumi saye, a di mu hakha, khuye: “Vambe va na dzege livbandre dzikavalu nya edzi dzi tshadego omu dhoropani, kholu dzi na gira gukhwatshi khu gidzemo gya na Israyeli, egi gi vbedego; nga hongoleni hi va rume hiya si wona.”

¹⁴ Khavbo avbo, va di dzega dzikavalu dzimbili ni dzikareta dzimbili; mufumeli a rumela vathu lizumbotunu ga Vaasiriya, na gukhuye: “Indrani mu ya wona!”

¹⁵ Va di khuga va landra kala tsongoni wa Joridhani, ndzilani va di wona na gu mbambamede myendra ni simbe sombo si nga dzudzugedwago khu Vaasiriya, gikhati va nga bani va tutuma; Khavbo avbo, va di resa myango vata tivisa mufumeli.

¹⁶ Khavbo avbo, vathu vatshavbo va di duga guya phanga lizumbo la Vaasiriya; vaya mana pimo nya wuguvbi nya wadi na wu gu rengiswa khu tengo nya guvbevbuge nya parata, ni mipimo mivili nya wuguvbi nya mala, wu rengiswa nuwo khu tengo nya guvbevbuge, kha nga idzo a nga ganelago khidzo Pfhumu Nungungulu.

¹⁷ Mufumeli a di rumela ndruna a nga bani na gu khighela vbagyandzatunu gwaye guya ghadha vbanyangwatunu; aholu vathu va di yi gandredzela yifa avbovbo, kha nga guganela ga muthu wa Nungungulu, a nga ganelago; gikhati mufumeli a nga relelago gwaye.

¹⁸ Khu kharati si di tadzisega esi muthu wa Nungungulu a nga ganelago ga mufumeli, khuye: “Mindru khu gikhati gegi, gu na manega mipimo mivili nya mala na yi rengwa khu tengo nya guvbevbuge khu gingerengere gimwegyo nya parata, ni pimo moyo nya wuguvbi khu gingerengere gimwegyo nya parata, nyangwani ga Samariya.”

¹⁹ Ndruna yile yi di ganedzide muthu wa Nungungulu, khiyo: “Ambari Pfhumu Nungungulu a gu tula sihogo, ina si ngu kodze gu girega isoso, khu magana yoyo, gani?” Ni uye a di mu embede, khuye: “Uwe kamwe u na si wona khu maho yago, aholu khu na si hodza.”

²⁰ Khu guralo, si di mu dugelela kholu, vathu va di mu gandredzela vbanyangwatunu, afa avbovbo.