2 Dzipfhumu 24 - Bhibhiliya Nya Guage

Wudhumeli wa Nabhukodhonosori

¹ Matshiguni ya Jeyowakimi, Nabhukodhonosori, mufumeli wa Bhabhiloni a dita mu dhumela, uye a di khala githumi gyaye khu gipimo nya myaga miraru. Khu hwane a di vbindrugedza a mu wugela.

² Nungungulu a di mu rumela masotshwa nya Vakalidhiya, nya Vaasiriya, ya na Mowabhi ni ya na Amoni, guya sasela Judha, kha nga guganela ga Pfhumu Nungungulu, a ganedego khu ga sithumi saye, vaprofeti.

³ Si giregide kamwe khu lisine, kha nga guleletela ga Pfhumu Nungungulu, esi si dugelede ga Judha a mu dusidego mbeli gwaye, khu kotani nya sighoho sa Manasi, gu khedza khu satshavbo a giridego;

⁴ gumogo gambe khu kotani nya novba a wu vbaladzidego nyambana nandru, a tadza Jerusalema gwatshavbo khu novba nyambana nandru; khu guralo, Pfhumu Nungungulu, kha dzumela gu mu tsetselela.

⁵ Yimbe mithumo ya Jeyowakimi ni satshavbo iso a giridego, si lovidwe umo nya Libhuku nya Matimo ya Vafumeli va Judha.

⁶ Jeyowakimi, lade gumogo ni vavelegi vaye, mwanaye Jowakimi khuye a fumidego wulangani gwaye.

⁷ Mufumeli wa Egipito, gima kha nga duga gambe ni masotshwa khu tigoni gwaye, kholu mufumeli wa Bhabhiloni, a di dzega satshavbo iso si nga bani si gu lumba mufumeli wa Egipito, gukhugela tsongo wa Egipito, kala tsongoni wa Ewufrate.

Guphela nya wugumbi

⁸ Jowakimi a diri ni likhumi na livbandre na miraru myaga nya guvelegwe, gikhati a nga phelago gu fuma; fumide migima miraru Jerusalema. Lina la mayi waye a diri uye Newusita, nyamahegyane wa Elinatani, givelegwa gya Jerusalema.

⁹ A di thuma mithumo nya guvivbe mahoni ga Pfhumu Nungungulu, a landrela dzindzila dza babe waye.

¹⁰ Khu gikhati gyogyo, sithumi sa Nabhukodhonosori, mufumeli wa Bhabhiloni, si dita guta sasela Jerusalema, si mu randrela.

¹¹ Gikhati sithumi saye si nga bani si li randrede, Nabhukodhonosori, mufumeli wa Bhabhiloni a dita nuye dhoropani.

¹² Khavbo avbo, Jowakimi, mufumeli wa Judha, a di duga dhoropani aya dzi ningela ga mufumeli wa Bhabhiloni; uye gumogo ni mayi waye, sithumi saye, dzindruna ni mithenwa yaye; mufumeli wa Bhabhiloni, a di va mola a va gira dzikhumbi; gu diri mwaga nya livbandre na miraru nya gufume gwaye.

¹³ A di dzega vbale thomba yatshavbo ya Nyumbani gwa Pfhumu Nungungulu, ni yatshavbo thomba ya nyumbani ga mufumeli; a pandrelela sombo satshavbo nya ndralama, si nga girwago khu Solomoni mufumeli wa Israyeli, Nyumbani gwa Pfhumu Nungungulu, kha nga idzo a nga bani na ganede khidzo Pfhumu Nungungulu.

¹⁴ A di vbagela vatshavbo va Jerusalema, gumogo ni dzindruna, ni vama vatshavbo nya guthavisege, vatshavbo va diri likhumi magumi mazana (10.000) sibotshwa, vavati vatshavbo ni vapfhuli nya dzisimbi; mwalo a nga tshalago, vbavbandze basi ga sisiwana sa tigoni.

¹⁵ A di vbagela Jowakimi, a mu yisa Bhabhiloni; gumogo ni mayi wa mufumeli, vagadzi va mufumeli, mithenwa yaye ni sitetema sa tigoni, va di vbagedwa khu Jerusalema, va yiswa Bhabhiloni.

¹⁶ Vatshavbo vama nya dzindrena, va diri livbandre na mavili magumi mazana (7.000), vavati ni vapfhuli nya dzisimbi, va diri likhumi mazana (1.000) vama, avo va nga bani va kodza gu phara matshari va hongola nyimbitunu, ava va di dzegwa khu mufumeli wa Bhabhiloni a va vbagela a va yisa Bhabhiloni.

¹⁷ Mufumeli wa Bhabhiloni, a di emisa babe dugwane waye Mataniya, gu khala mufumeli wulangani ga Jowakimi, a mu vbindrugedza lina laye a mu rana khuye, khu Zedhekiya.

Mufumo wa Zedhekiya

¹⁸ Zedhekiya a diri ni magumavili na moyo myaga nya guvelegwe, gikhati a nga phelago gu fuma; fumide likhumi na moyo myaga Jerusalema. Lina la mayi waye a diri uye Hamutali, nyamahegyane wa Jeremiya, givelegwa gya Libhina.

¹⁹ A di thuma mithumo nya guvivbe mahoni ga Pfhumu Nungungulu, kha nga satshavbo si giridwego khu babe waye Jowakimi.

²⁰ Si giregide kharalo khu kotani nya likhulo la Pfhumu Nungungulu, a wugela Jerusalema ni Judha, gumogo ni gu va dusa mbeli gwaye; aholu Zedhekiya a di wugela mufumeli wa Bhabhiloni.