2 Dzipfhumu 23 - Bhibhiliya Nya Guage

Josiya a ngu wusedza Gidzumeledzwano

¹ Khavbo avbo, mufumeli a di rumela gu tombaniswa vasingalagadzi yatshavbo ya Jerusalema ni ya Judha, ma ta tshangana naye.

² Mufumeli a di gwela Nyumbani ga Pfhumu Nungungulu, uye ni vathu vatshavbo va Judha, gumogo ni vavbanyi vatshavbo va Jerusalema, vaphasi nya mhamba, vaprofeti ni vathu vatshavbo, gukhugela avo nya vadugwane kala nya vakhongolo; gu hevbudwa na vapwa dzindzeveni gwawe magana yatshavbo nya Libhuku nya Gidzumeledzwano li nga tugudwago Nyumbani ga Pfhumu Nungungulu.

Guwusedzwa nya wukhongeli

³ Mufumeli a di khuga a ema nyangwani, a wusedza gidzumeledzwano mbeli ga Pfhumu Nungungulu, gukhuye a na landrela Pfhumu Nungungulu a landrisa Milayo yaye, magana yaye ni sileletelo saye khu monyo waye watshavbo ni hefemulo waye watshavbo a tiyisa magana nya gidzumeledzwano gegi, ma nga bani ma lovidwe libhukuni mule; vathu vatshavbo va di hungega ga gidzumeledzwano gegi.

⁴ Mufumeli a di rumela muphasi nya khongolo nya mhamba Hilikiya ni vaphasi nya vadugwana ni vasayisi va vbanyangwatunu, gasi va dusa khu Nyumbani gwa Pfhumu Nungungulu, satshavbo sikalango si nga bani si giredwe Bhahali ni gifananiso nya simbo nya guvatwe, ni libutho latshavbo la ndzadzini; aya si vbisa vbavbandze ga Jerusalema, mahangeni ya Kedhroni, nguma wakone a wu yisa Bheteli.

⁵ A di fuvisa gambe vaphasi nya mhamba va nga bani va emisidwe khu vafumeli va Judha, gu khala vavbisi nya mabani malangani nya gukhugege, ni dzindrangani dza na Judha ni vbavbandze ga Jerusalema, gumogo ni avo va nga bani va vbisela libani Bhahali, lidambo ni ngima, ni simbe sivangwa ni sivangwa satshavbo sa ndzadzini.

⁶ A di dusa gambe khu Nyumbani ga Pfhumu Nungungulu gifananiso nya simbo nya guvatwe, a gi yisa vbavbandze ga Jerusalema, kala gitsongwanani gya Kedhroni, aya gi vbisa bambe nya gitsongwana gya Kedhroni, nguma wakone a wu vbaladzela marowoni ya vathu va tigoni.

⁷ A di khungumula gambe dzinyumba dza vathu va nga bani va dzi ningedzela wubhayini, va nga bani va khade Nyumbani gwa Pfhumu Nungungulu, avbo vanyamayi va lugelago avbo mitshatsha nya gifananiso nya guvatwe.

⁸ A di rana vaphasi vatshavbo nya mhamba va dhoropani gwa Judha a nyenyezisa malangani gwatshavbo nya gukhugege, umo vaphasi nya mhamba va nga bani va vbisela umo libani, gukhugela Gebha kala Bherisebha; a khungumula malanga nya gukhugege nya dzinyangwa ma guromo ndzilani nya nyangwa ya Josuwa, muthangeli nya lidhoropa, li nga bani li khade khu phuvbo ga nyambade nya nyangwa nya gubele dhoropani.

⁹ Vaphasi nya mhamba va malangani nya gukhugege, va di si gweli va ya phasela giluvelotunu gya Pfhumu Nungungulu Jerusalema; aholu va di hodza sibaba nyambana mela vbakari ga vaphasi vakwawe nya mhamba.

¹⁰ A di nyenyezisa gambe Tofeti, wulanga nya guvbisedwe avbo, wu guromo kovani ga sanana sa Himoni, gasi gu si manegi ni moyo a yelago gu vbisa gyanana gyaye nya gikhwathana mwendro nya nyamahegyane a phasela Moloki.

¹¹ Fuviside gambe ni dzikavalu, edzi vafumeli va Judha va nga bani va dzi phasede gasi gu dzi thumisa umo nya wukhozeli nya lidambo nyangwani nya Nyumba ya Pfhumu Nungungulu, vbafuvbi ni nyumbani ga Natani-Meleki, thenwa a nga bani na gu wonelela wulanga wule; a vbisa khu nilo dzikareta nya guphasedwe wukhozeli nya lidambo.

¹² Mufumeli a di khungumula gambe siluvelo si nga bani na siri vbatshani nya nyumba ya Akazi, si nga girwago khu vafumeli va Judha, a khungumula gambe ni siluvelo si nga girwago khu Manasi, umo nya makupakupa ya mavili nya Nyumba ya Pfhumu Nungungulu, a di si khungumula, kudzudzwane wakone, a wu vbaladza gitsongwanani gya Kedhroni.

¹³ Mufumeli a di tshipisa gambe malanga nya gukhugege ma nga bani ma khedzanide ni Jerusalema, nyamudye ga gigomo gya Masiti, ayo ma nga bani ma vbahedwe Asitaroti khu Solomoni, mufumeli wa Israyeli, nungungulu nya manyala wa Vasidhoni, ni ga Khemosi, manyala ya va na Mowabhi, ni ga Milikamo, manyala ya sanana sa Amoni.

¹⁴ A di khungumula gambe sifananiso, a pilela ni madingo nya gifananiso gya Asitaroti, malanga yakone a ma tadza khu marambo nya vathu.

Giluvelo gya Bheteli gi ngu tshipiswa ni gu khungumuledwa

¹⁵ Ambari ni giluvelo nigyo gi bani giri Bheteli ni wulanga nya gukhugege uwo wu nga girwago khu Jerobhowamo, mwamana wa Nebhati, uye a nga ghohisa vatshavbo va na Israyeli; gumogo ni giluvelo gyogyo, ni wulanga nya gukhugege si di khungumudwa, nyumba yakone a yi vbisa yi khala nguma, a vbisa gifananiso gya Asitaroti.

¹⁶ Josiya a di thendregedza a khedza marowo ma nga bani ma romo vbagigomotunu, a di rumela guya dzegwa marambo ya marowoni mule, ata ma vbisa vbagiluvelotunu vbale, a di gi nyenyezisa kharalo, kha nga idzo Pfhumu Nungungulu a ganedego khu magana ya muthu wa Nungungulu, gikhati a ganedego magana yaya.

¹⁷ Khavbo avbo, mufumeli a di wudzisa, khuye: “Gialakanyiso gya mani egi nyi gi wonago?” Vathu va dhoropani va di mu hakha, khavo: “Lithowo la muthu wa Nungungulu, a dzudego khu tigoni ga Judha, ata tivisa khu silo sesi u ngari gu si girago khu giluvelo gya Bheteli.”

¹⁸ Khavbo avbo, Josiya a di va embela, khuye: “Gi digeni gi khala, a nga manegi ni moyo nya gu khuhe marambo yagyo.” Khu guralo, va di diga marambo yaye ma khala gumogo ni marambo ya muprofeti a ngatago khu Samariya.

¹⁹ Vbavbandze nya esi, Josiya a di dusa gambe dzinyumba dzatshavbo dza malangani nya gukhugege, ma nga bani ma romo madhoropani ga Samariya, ma nga bani ma giridwe khu vafumeli va Israyeli, gasi gu gorosa Pfhumu Nungungulu, a ma gira kha nga idzo a nga girago khidzo tigoni ga Bheteli.

²⁰ A di songa vatshavbo vaphasi nya mhamba va malangani nya gukhugege ma nga bani na mari vbale, a dzega marambo nya vathu a ma vbisa vbasiluvelotunu sawe; khu hwane a di bwelela Jerusalema.

Buzo nya Phasika

²¹ Mufumeli Josiya, a di leletela vathu vatshavbo, khuye: “Girani Buzo nya Phasika ga Pfhumu Nungungulu wanu, kha nga idzo gu lovidwego khidzo umo nya Libhuku nya Gidzumeledzwano.”

²² Kholu gima kha ga nga girwa Phasika nya nga eyi, gukhugela matshiguni ya valamuli, avo va nga lamulago Israyeli, ambari ga matshigu yatshavbo ya vafumeli va Israyeli ni ga vafumeli va Judha.

²³ Aholu khu mwaga nya likhumi na livbandre na miraru nya gufume ga mufumeli Josiya; Phasika yeyi, yi phasedwe Pfhumu Nungungulu, dhoropani ga Jerusalema.

²⁴ Josiya, a di lundra gambe vanyadzisolo, va nya gufemba, sithungulu, sifananiso ni manyala yatshavbo ma nga bani na ma gu wonega tigoni ga Judha ni Jerusalema, gasi gu tiyisa magana nya Nayo, ma nga bani ma lovidwe umo nya Libhuku li nga tugudwago khu muphasi nya khongolo nya mhamba Hilikiya, Nyumbani ga Pfhumu Nungungulu.

²⁵ Vbakari ga vafumeli avo va nga hegulago khavo, mwalo a godzanego naye khu guvbindrugedza a wuya ga Pfhumu Nungungulu, khu monyo waye watshavbo, ni hefemulo waye watshavbo, ni tshivba yaye yatshavbo kha nga idzo wu lombago khidzo Nayo wa Mosi; khu hwane gwaye, mwalo a dugeledego nya gu gufanana naye.

²⁶ Ambari khu guralo, likhulo la Pfhumu Nungungulu, gima kha la nga bosa, kholu li di gu khondra khu tshivba, kholu a di gu gorogela Vajudha, khu kotani nya satshavbo a nga gorogiswago khiso khu Manasi.

²⁷ Pfhumu Nungungulu a di ganela, khuye: “Judha nuye, nyi na mu dusa mbeli gwangu, kha nga idzo nyi dusidego khidzo Israyeli, nyi nyenya lidhoropa leli la Jerusalema nyi li hathidego; gumogo gambe ni nyumba nyi nga ganelago gukheni: Lina langu li na khala umo.”

Gufa ga Josiya

²⁸ Yimbe mithumo ya Josiya ni satshavbo a giridego, si lovidwe umo nya Libhuku nya Matimo ya Vafumeli va Judha.

²⁹ Matshiguni gwaye, Faro-Neko, mufumeli wa Egipito, a dita dhumela mufumeli wa Asiriya, tsongoni wa Ewufrate; mufumeli Josiya, a di mu khinga; avbo Faro-Neko a nga mu wona a di mu songa tigoni ga Megidhu.

³⁰ Sithumi saye si di mu dzega khu Megidhu, va mu resa Jerusalema, va ta mu dzinga thowoni gwaye; vathu va tigoni va di dzega Jowakazi, mwamana wa Josiya, va mu todza khu mafura, va mu gira mufumeli, a fuma wulangani gwa babe waye.

Mufumo wa Jowakazi, mufumeli wa Judha

³¹ Jowakazi a diri ni magumavili na miraru myaga, gikhati a nga phela gu fuma, fumide migima miraru Jerusalema. Lina la mayi waye a diri uye Hamutali, nyamahegyane wa Jeremiya, wa Libhina.

³² A di thuma mithumo nya guvivbe mahoni ga Pfhumu Nungungulu, a landrela iso va nga girago vavelegi vaye.

³³ Aholu Faro-Neko, a diya mu mola Ribala, tigoni ga Hamati, gasi a si fumi gambe Jerusalema; a di dusa nayo nya gukhuye, tigoni gu hengwe khupo nya lizana dzitaleta nya parata, ni taleta mweyo nya ndralama.

³⁴ Faro-Neko, a di emisa gambe Eliyakimi, mwamana wa Josiya, gu khala mufumeli, wulangani wa babe waye Josiya, a mu vbindrugedza lina khuye khu Jeyowakimi, aholu Faro-Neko a di dzega Jowakazi, a hongola naye Egipito aya fela iyoyo.

³⁵ Jeyowakimi a di ningela ga Faro parata ni ndralama a nga yi lombago; aholu uye a di leletela vathu gukhuye va duse dzitsapawu dzodzo nya khupo, kha nga gu leletela ga Faro, uye a di guruvedza vathu vatshavbo va tigoni gu dusa parata ni ndralama va ningela ga Faro-Neko.

³⁶ Jeyowakimi a diri ni magumavili na livbandre myaga nya guvelegwe, gikhati a phedego gufuma; fumide Jerusalema likhumi na moyo myaga. Lina la mayi waye a di gu ranwa gupwani khu Zebhidha, nyamahegyane wa Pedhaya, givelegwa gya Ruma.

³⁷ A di thuma mithumo nya guvivbe mahoni ga Pfhumu Nungungulu, a landrela dzindzila dza vavelegi vaye.