2 Dzipfhumu 22 - Bhibhiliya Nya Guage

Josiya a ngu fumela Judha

¹ Josiya a diri ni tanga nya livbandre na miraru myaga, gikhati a phedego gu fuma, fumide Jerusalema magumararu na moyo myaga. Lina la mayi waye a diri uye Jedhidha, nyamahegyane wa Adhaya, wa Bhozikati.

² A di thuma mithumo nya gululame mahoni ga Pfhumu Nungungulu, a di landrisa khu gutumbega dzindzila dza babe waye Dhavhidhe, nyamba ndreyela nyamudye ambari nyambade.

Gutugudwa ga libhuku nya Nayo

³ Khu mwaga nya likhumi na livbandre na miraru nya gufume ga mufumeli Josiya, mufumeli a di rumela Nyumbani ga Pfhumu Nungungulu, mulovi Safani, mwamana wa Azaliya, mwamana wa Mesulamo, a mu embela, khuye:

⁴ “Indra ga muphasi nya khongolo nya mhamba Hilikiya, gasi a duse gyuma gyatshavbo gi residwego Nyumbani gwa Pfhumu Nungungulu, gi nga hengiswago ga vathu khu vasayisi nya myanya ya Nyumbani gwa Pfhumu Nungungulu.

⁵ U gi ningela mandzani ga vale va pharidego thumo nya gululamisele Nyumba ya Pfhumu Nungungulu gasi va livba khigyo sithumi si tshikedzelago malufa nya Nyumba ya Pfhumu Nungungulu,

⁶ a gu vavati, vavbahi, ni avo va vbahago khu siwindri ni gu renga misimbo, siwindri nya guvatwe gasi gu lulamedza nyumba.

⁷ Aholu va disi wudziswi gilo khu mahungu nya gyuma va nga bani va gu ningwa, kholu avo va di thuma khu gu tumbega.”

⁸ Khavbo avbo, Hilikiya, muphasi nya khongolo nya mhamba, a di embela mulovi Safani, khuye: “Nyi tugude Libhuku nya Nayo Nyumbani ga Pfhumu Nungungulu.” Hilikiya a di ningela Libhuku nya Nayo mandzani ga Safani; uye a di li hevbula.

⁹ Khavbo avbo, mulovi Safani, a diya ga mufumeli aya mu embela, khuye: “Sithumi sago si hengiside gyuma gi nga bani giri nyumbani; giya ningedwa mandzani ga vaphari nya mithumo nya gu lulamedze Nyumba ya Pfhumu Nungungulu.”

¹⁰ Mulovi Safani, a di pwadzela gambe, mufumeli, khuye: “Muphasi nya mhamba Hilikiya, a nyi ningide Libhuku.” Safani a di li hevbula mbeli ga mufumeli.

¹¹ Avbo mufumeli a nga yingisago milowo nya Libhuku nya Nayo, a di pferula dzingandzu dzaye;

¹² mufumeli a leletela muphasi nya mhamba Hilikiya, Ayikamo, mwamana wa Safani, Akibhori, mwamana wa Mikeya, ni mulovi Safani ni Asaya githumi gya mufumeli, a va embela, khuye:

¹³ “Indrani mu ya wudzisa khu eni ga Pfhumu Nungungulu, khu vathu vatshavbo, ni va na Judha, khu mahungu nya magana nya libhuku leli li tugudwego; kholu likhulo ya Pfhumu Nungungulu yi khondride ngudzu vbakari gwathu. Kholu vavelegi vathu, kha va yingisa gilo magana nya libhuku leli, ni gu gira satshavbo kha nga idzo si lovidwego khidzo.”

Hulidha muprofeti nya nyamayi

¹⁴ Khavbo avbo, muphasi nya mhamba Hilikiya, ni Ayikamo, Akibhori, Safani ni Asaya, va diya ga muprofeti nya nyamayi Hulidha, mwangadzi wa Salumi, mwamana wa Tikivha, mwamana wa Harasi, musayisi nya dzingandzu; a di vbahide Jerusalema; khu gipandre nya wuvili nya lidhoropa, va ya ganela naye.

¹⁵ Nyamayi a di va embela, khuye: “Pfhumu Nungungulu wa Israyeli, a ngu ganela kharati, khuye: Embelani muthu a mi rumedego guta avbo gwangu, khenu:

¹⁶ Pfhumu Nungungulu a ngu ganela kharati, khuye: Nyi na resa libango ga wulanga wowu, ni ga vathu vaye vatshavbo a gu magana yatshavbo nya libhuku leli ma hevbudwego khu mufumeli wa Judha.

¹⁷ Kholu va nyi pfhurarede, va vbisela libani vambe vanungungulu, va nyi gorosa khu mithumo yatshavbo nya mandza yawe, khu guralo, likhulo langu, li di vila khu wulanga wowu, gima kha li na tshimega.

¹⁸ Aholu mufumeli wa Judha, a mi rumedego guta wudzisa Pfhumu Nungungulu, mu embeleni esi, khenu: Pfhumu Nungungulu wa Israyeli, a ngu ganela mayelano ni magana mu ma pwidego, khuye:

¹⁹ Kha nga monyo wago wu thurugidego, u dzi thesa mbeli ga Pfhumu Nungungulu, gikhati u pwidego magana nyi ganedego khu mahungu nya wulanga wowu, ni ga vavbanyi vaye, gupwani wu na mbembiswa wu khala giwula ni gihegiso, u pferula dzingandzu dzago u lila mbeli gwangu, Eni neni nyi gu yingiside; a ngu ganela Pfhumu Nungungulu.

²⁰ Khu guralo, nyi na gu tshanganisa gumogo ni vavelegi vago, u na dzingwa thowoni gwago khu gurula, gasi maho yago ma si woni dzimhango nyi na gu dzi rumelago tigoni momu.” Khavbo avbo, va di bweledza ga mufumeli magana yaya va nga embedwago khu muprofeti nya nyamayi.