2 Dzipfhumu 20 - Bhibhiliya Nya Guage

Gudwala ga Ezekhiya

¹ Khu matshigu yale, Ezekhiya, a di dwala ngudzu nya guhadze gufa, muprofeti Isaya, mwamana wa Amosi, a dita avbo gwaye ata, khuye: “Pfhumu Nungungulu a ngu ganela kharati, khuye: Dongisela gwadi ndrangani gwago, kholu u ngu hadza gufa, khu na nga vbanya.”

² Khavbo avbo, Ezekhiya, a di thendregedza khovbe yaye a khedza ndzarini, a lombelela ga Pfhumu Nungungulu, khuye:

³ “Dundruga Pfhumu Nungungulu, idzo eni nyi gu thumedego khidzo, nyi gimbide gwadi mbeli gwago, khu lisine ni monyo wu lulamidego, nyi gira gwadi mbeli gwago.” Ezekhiya, a di lila khu wuvi waye watshavbo.

⁴ Avbo Isaya a nga khuga, na si gu dugi vbakari ni vbakari nya likupakupa, Lito la Pfhumu Nungungulu, li dita avbo gwaye li ta mu embela, khilo:

⁵ “Bwelela u ya embela Ezekhiya, muthangeli nya vathu vangu, khuwe: Pfhumu Nungungulu wa babe wago Dhavhidhe, a ngu ganela kharati, khuye: Nyi pwide nombelo wago, nyi wona ni marongo yago; nyi na gu vbanyisa; khu litshigu nya wuraru, u na gwela Nyumbani ga Pfhumu Nungungulu.

⁶ Nyi na engedzela gambe vbatengotunu gwago nya matshigu yago nya guvbanye, likhumi na livbandre myaga, nyi na gu vbulugisa mandzani ga mufumeli wa Asiriya, uwe gumogo ni lidhoropa leli, khu kotani nya lihaladzo langu ni lihaladzo nyi gu nalo khu githumi gyangu Dhavhidhe.”

⁷ Isaya a di engedza gambe a ganela, khuye: “Resani simbwandri nya dzindzawa, va di si dzega va todzela avbo gu nga bani na gu vbisa; Ezekhiya a di vbanya.”

⁸ Ezekhiya a di embela Isaya, khuye: “Khu gevbini giwonegiso gi yeyedzago gupwani Pfhumu Nungungulu a na nyi vbanyisa, ni gukhuye khu litshigu nya wuraru nyi na gwela Nyumbani ga Pfhumu Nungungulu, na?”

⁹ Isaya a di mu embela, khuye: “Gikombiso gi na gutago khu ga Pfhumu Nungungulu, nya guyeyedze gupwani Pfhumu Nungungulua na tadzisa magana a ganedego khegi: “Wa gu vbweta gukhuwe mwedzi wu hongola likhumi sigandro mbeli; mwendro wa gu vbweta gukhuwe wu bwelela likhumi sigandro hwane, gani?”

¹⁰ Khavbo avbo, Ezekhiya a di hakha, khuye: “Gu ngu vbevbuga gu mwedzi wuya likhumi sigandro mbeli, guvbindra gu bwelela hwane.”

¹¹ Khavbo avbo, muprofeti Isaya, a di rana Pfhumu Nungungulu, Uye a di bweledza mwedzi likhumi sigandro hwane, vbasigandrotunu nya nyumba ya Akazi, iso si nga bani si vbindridwe khu mwedzi.

Vakombisi va mufumeli wa Bhabhiloni

¹² Khu gikhati gile, Merodhaki-Bhaladhani, mwamana Wa Bhaladhani, mufumeli wa Bhabhiloni, a di rumela malangalila ni miningelo ga Ezekhiya, kholu a di pwide gupwani Ezekhiya a ngu dwala.

¹³ Ezekhiya a di tsakiswa khu myango yile, a va yeyedza nyumba yaye yatshavbo iyo yi nga bani yiri ni thomba yaye, parata, ndralama, mafura nya gutole nayo nya gunungele, ni matshari yaye yatshavbo ni thomba yaye yatshavbo; gimwalo ni gimwegyo a ngamba va yeyedza, gya ndrangani gwaye ni gya mufumo waye watshavbo.

¹⁴ Khavbo avbo, muprofeti Isaya, a dita ga mufumeli Ezekhiya, ata mu wudzisa, khuye: “Va di khavo ginani vathu vava va dzudego avbo gwago. Va guta khu hayi?” Ezekhiya a di hakha, khuye: “Va guta khu tigoni ga hwindzo ngudzu, Bhabhiloni.”

¹⁵ Isaya a di mu wudzisa, khuye: “Ginani va gi wonidego ndrangani gwago nya wufumu?” Ezekhiya a di mu hakha, khuye: “Satshavbo si guromo ndrangani gwangu nya wufumu va si wone; gimwalo na gimwegyo vbakari nya thomba yangu nyi ngamba va yeyedza.”

¹⁶ Khavbo avbo, Isaya a di embela Ezekhiya, khuye: “Yingisa iso a ganelago Pfhumu Nungungulu, wari, khuye:

¹⁷ Wona nya gukhuwe ma nguta matshigu aya nya gu satshavbo si guromo nyumbani gwago; ni satshavbo si nga hengeledzedwa khu vababe vago kala litshigu la muhuno, si na dzegwa si yiswa Bhabhiloni; Kholu Pfhumu Nungungulu a ganede khuye, gimwalo ni gimwegyo gi na tshidwago.

¹⁸ Ambari ni sanana sago nya livelego lago, si na dzegwa si ya girwa mithenwa nya guthumele nyumbani ga mufumeli wa Bhabhiloni.”

¹⁹ Khavbo avbo, Ezekhiya a di embela Isaya, khuye: “Magana yaya u ganedego ya Pfhumu Nungungulu khyadi!” A di engedza gambe, khuye: “Olu matshiguni yangu, kha gu na manega gambe gurula ni lisine, gani?”

Mahegiso nya mufumo wa Ezekhiya

²⁰ Yimbe mithumo ya Ezekhiya, tshivba yaye yatshavbo, idzo a vbahidego khidzo lidhamo ni sele nya gu ndrindre mati ma enedza dhoropani gwatshavbo gwa Jerusalema; satshavbo si lovidwe umo nya Libhuku nya Matimo ya Vafumeli va Judha.

²¹ Ezekhiya lade gumogo ni vavelegi vaye; wulangani gwaye fumide mwanaye Manasi.