2 Dzipfhumu 15 - Bhibhiliya Nya Guage

Azariya a ngu fumela Judha

¹ Khu mwaga nya magumavili na livbandre na mivili nya gufume ga Jerobhowamo, mufumeli wa Israyeli, a di phela gufuma Azariya, mwamana wa Amaziya, mufumeli wa Judha.

² A diri ni likhumi na livbandre na moyo myaga gikhati a nga phelago khigyo gufuma; fumide Jerusalema livbandre magumi na mivili myaga. Lina la Mayi waye a di ranwa gupwani Jekoliya, givelegwa gya Jerusalema.

³ A di thuma mithumo nya gululame mahoni ga Pfhumu Nungungulu, kha nga idzo a nga thumago khidzo babe waye Amaziya.

⁴ Vbavbandze ga malangani nya gukhugege kha ma nga duswa; kholu vathu va di bani na va nga gu simama gu gira miphaselo ni gu vbisa libani, malangani nya gukhugege.

⁵ Pfhumu Nungungulu a di veta mufumeli Azariya, a dwala khu sokono kala litshigu a ngafago; a diya vbanyela vbavbandze nya nyumba nya vadwali nya sokono; aholu Jotamo, mwamana wa mufumeli, a di fumela ndranga ya mufumeli a lamula vathu va tigoni.

⁶ Yimbe mithumo ya Azariya, ni satshavbo a giridego, yi lovidwe umo nya Libhuku nya Matimo ya Vafumeli va Judha.

⁷ Azariya lade gumogo ni vavelegi vaye, va mu dzingide vbafuvbi ni vavelegi vaye Dhoropani ga Dhavhidhe; wulangani gwaye fumide mwanaye Jotamo.

Zakariya a ngu fuma livbandre na moyo migima

⁸ Khu mwaga nya magumararu na livbandre na miraru, nya gufume ga Azariya, mufumeli wa Judha, a di fuma Zakariya, mwamana wa Jerobhowamo, tigoni ga Israyeli ni Samariya, livbandre na moyo migima.

⁹ A di thuma mithumo nya guvivbe mahoni ga Pfhumu Nungungulu, kha nga idzo va nga girago vavelegi vaye; kha ndreya gilo ga sighoho sa Jerobhowamo, mwamana wa Nebhati, iso a nga ghohisago khiso Israyeli.

¹⁰ Salumi, mwamana wa Jabhesi, a di mu lemba a mu wugela, a mu songa na gu wonwa khu vathu. A phara uye ndronga nya wufumu.

¹¹ Yimbe mithumo ya Zakariya, yi lovidwe umo nya Libhuku nya Matimo ya Vafumeli va Israyeli.

¹² Aya khu magana ya Pfhumu Nungungulu a nga embelago Jewu, khuye: “Sanana sago, kala gitugulwana nya wu na; si na khala vbagikhalotunu nya wufumu wa na Israyeli.” Si di girega kharalo.

Salumi a ngu fuma Samariya ngima moyo basi

¹³ Salumi, mwamana wa Jabhesi, phede gu fuma khu mwaga nya magumararu na livbandre na mina nya gufume ga Uziya, mufumeli wa Judha; fumide ngima moyo basi tigoni ga Samariya.

¹⁴ Kholu Menayemi, mwamana wa Gadhi, a di khuga khu Tiriza, ata Samariya; ata sasela Salumi, mwamana wa Jabhesi, a mu songa tigoni ga Samariya, a fuma uye wulangani gwaye.

¹⁵ Yimbe mithumo ya Salumi, ni gikungo nya guwugele a giridego, yi lovidwe umo nya Mabhuku nya Matimo ya Vafumeli va Israyeli.

¹⁶ Khavbo avbo, Menayemi, a di sasela Tifisa, ni vatshavbo va nga bani varomo umomo, gumogo gambe ni mivbinganoni gwawe gukhugela Tiriza, kholu gu di bani gu si gu tudwi myanya yaye; a va sasela, a pferula khu vbakari sirumbu sa vanyamayi nya dzimimba.

Menayemi a ngu fumela va na Israyeli

¹⁷ Gukhugela khu mwaga nya magumararu na livbandre na mina nya gufume ga Azariya, mufumeli wa Judha, Menayemi, mwamana wa Gadhi, a phede gu fumela Israyeli, fumide Samariya likhumi myaga.

¹⁸ A di thuma mithumo nya guvivbe mahoni ga Pfhumu Nungungulu; matshiguni yaye yatshavbo kha nga hambana gilo ni sighoho sa Jerobhowamo, mwamana wa Nebhati, a nga ghohisago khiso va na Israyeli.

¹⁹ Khavbo avbo, Puli, mufumeli wa Asiriya, a dita guta wugela litigo la Israyeli; Menayemi, a di ningela ga Puli, likhumi mazana (1.000) dzitaleta nya parata, gasi a kodza gu mu phasedzela gu tiyisa wufumu mandzani gwaye.

²⁰ Menayemi, a di hengisa khupo ga va na Israyeli, ga satshavbo sitetema nya va nya gufuma, gasi a ningela ga mufumeli wa Asiriya, muthu ni muthu a di yela gu dusa livbandre magumi singerengere nya parata; khu guralo, mufumeli wa Asiriya a di bwelela khu guvbiredza nyamba khala tigoni mule.

²¹ Yimbe mithumo ya Menayemi, ni satshavbo a thumidego, yi lovidwe umo nya Libhuku nya Matimo ya Vafumeli va Israyeli.

²² Menayemi lade ni vavelegi vaye; wulangani gwaye, fumide mwanaye Pekaya.

Pekaya a ngu fumela litigo la Israyeli

²³ Khu mwaga nya livbandre magumi nya gufume ga Azariya mufumeli wa Judha; a di phela gufuma Pekaya, mwamana wa Menayemi, a fumede Israyeli ni Samariya, myaga mivili.

²⁴ A di thuma mithumo nya guvivbe mahoni ga Pfhumu Nungungulu; gima kha nga ndreya musighohoni sa Jerobhowamo, mwamana wa Nebhati, a nga ghohisa khiso va na Israyeli.

²⁵ Peka, mwamana wa ndruna yaye Remaliya, moyo nya ndruna yaye, a di dzega livbandre magumi vama va Gileyadhi a mu girela gikungo nya gu mu wugele aya mu songa Samariya namboni wa ndrangani ga mufumeli, gumogo ni Arigobhi ni Ariye; a fuma uye wulangani gwaye.

²⁶ Yimbe mithumo ya Pekaya ni satshavbo a giridego, yi lovidwe umo nya Libhuku nya Matimo ya Vafumeli va Israyeli.

Peka a ngu fumela litigo la Israyeli

²⁷ Khu mwaga nya livbandre magumi na mivili nya gufume ga Azariya, mufumeli wa Judha, a di phela gufuma Peka, Mwamana wa Remaliya, a fumela Israyeli ni Samariya, magumavili myaga.

²⁸ A di thuma mithumo nya guvivbe mahoni ga Pfhumu Nungungulu, gima kha nga ndreya ga sighoho sa Jerobhowamo, mwamana wa Nebhati, a nga ghohisago khiso va na Israyeli.

²⁹ Matshiguni ya Peka, mufumeli wa Israyeli, a dita Tigalati-Pileseri, mufumeli wa Asiriya, ata wandra Iyoni ni Abheli-Bheti-Mahaka, Janowa, ni Kedhesi, Hazori, Gileyadhi ni Galileya, ni litigo latshavbo la Nafitali, a vbagela vavbanyi vaye a va yisa Asiriya.

³⁰ Khavbo avbo, Ozeya, mwamana wa Ela, a di gira gikungo a wugela Peka, mwamana wa Remaliya, a mu dhumela, aya mu songa, a fuma uye wulangani gwaye, khu mwaga nya magumavili nya gufume ga Jotamo, mwamana wa Uziya.

³¹ Yimbe mithumo ya Peka ni satshavbo a giridego, yi lovidwe umo nya Libhuku nya Matimo ya vafumeli va Israyeli.

Jotamo a ngu fumela Judha

³² Khu mwaga nya wuvili nya gufume ga Peka, mwamana wa Remaliya, mufumeli wa Israyeli, a di phela gufuma Jotamo, mwamana wa Uziya, mufumeli wa Judha.

³³ A diri ni tanga nya magumavili na livbandre myaga gikhati phedego gu fuma, fumide Jerusalema likhumi na livbandre na moyo myaga. Lina la mayi waye a di ranwa gupwani khu Jerusa, nyamahegyane wa Sadhoki.

³⁴ A di thuma mithumo ya yadi mahoni ga Pfhumu Nungungulu; a di thuma nga idzo a nga thumago khidzo babe waye Uziya.

³⁵ Vbavbandze ga malangani nya gukhugege, kha ma nga duswa gilo; kholu vathu va di bani va nga gu gira miphaselo ni gu vbisa libani malangani nya gukhugege, a di gira Mwanya wa Vbatshani nya Nyumba ya Pfhumu Nungungulu.

³⁶ Yimbe mithumo ya Jotamo ni satshavbo a giridego, yi lovidwe umo nya Libhuku nya Matimo ya Vafumeli va Judha.

³⁷ Khu matshigu yoyo, Pfhumu Nungungulu a di phela gu rumela Rezimi, mufumeli wa Asiriya ni Peka, mwamana wa Remaliya, gu ya dhumela Judha.

³⁸ Jotamo lade gumogo ni vavelegi vaye, dzingidwe vbafuvbi ga vavelegi vaye Dhoropani ga babe waye Dhavhidhe; wulangani gwaye fumide mwanaye Akazi.