2 Dzipfhumu 11 - Bhibhiliya Nya Guage

Ataliya a ngu rumela guya pfhungumudwa mufumo wa Judha

¹ Ataliya, mayi wa Akazi, na wonide gukhuye mwanaye songidwe, uye a di khuga aya sasela livelego latshavbo la nyumbani nya mufumo.

² Aholu Jeyosebha, nyamahegyane wa mufumeli Joramo, ndruye wa Akazi, a di dzega Jowasi, mwamana wa Akazi, a muba vbakari ga sanana sa mufumeli, si nga bani si gu songetedwa, aya mu siha ga musayisi waye a nga bani a manega nyumbani a lalago umo, a mu siha ga Ataliya, khu kharato, uye kha songwa.

³ Jeyosebha khade naye a sihala Nyumbani ga Pfhumu Nungungulu, livbandre na moyo myaga, Ataliya na gu fuma tigoni.

⁴ Khu mwaga nya livbandre na wuvili, Joyadha a di rumela gu ya rana vathangeli nya sikwata nya lizana, dzindruna gumogo ni vawoneleli, a bela gumogo navo Nyumbani ga Pfhumu Nungungulu, a gira navo gidzumeledzwano, a va sambanyisa Nyumbani ga Pfhumu Nungungulu, a va yeyedza gyanana gya mufumeli.

⁵ A va ninga nayo nya gukhuye: “Owu khu thumo mu yelago gu wu thuma. Gimbe gipandre gyanu nya wuraru gi na bele khu Sabhadho gi thuma gu ghadha nyumba ya mufumeli,

⁶ gimbe gipandre nya wuraru gi na khala vbanyangwatunu ya Suri, gimbe gipandre nya wuraru khu mwanya wa hwane nya vawoneleli; khu kharati, mu na ghadha nyumba yeyi gasi a si beli muthu.

⁷ Gasi enu mitsawa ya mivili ya vatshavbo avo va belago thumoni khu litshigu nya Sabhadho, va na ghadha Nyumba ya Pfhumu Nungungulu, vbafuvbi ni mufumeli.

⁸ Mu na randrela mufumeli, muthu ni muthu nari ni litshari laye mandzani, ni wevbini a na vbwetago gu bela ga dzindzarara dzanu mu songeni; enu mu na khala ni mufumeli, gikhati a belago ni gikhati a dugago.”

⁹ Khu guralo, vathangeli nya sikwata nya lizana va di gira kharato kha nga guleletela ga muphasi nya mhamba Joyadha; moyo ni moyo a di dzega vathu vaye, vatshavbo va belago thumoni khu Sabhadho, ni ava va nga bani va duga khu litshigu nya Sabhadho; va dita ga muphasi nya mhamba Joyadha.

¹⁰ Muphasi nya mhamba a di ningela ga mitsawa nya lizana, matshari ni sitshangu, esi si nga bani siri sa mufumeli Dhavhidhe si nga bani siri Nyumbani gwa Pfhumu Nungungulu.

¹¹ Vawoneleli, moyo ni moyo a di phara litshari mandzani gwaye, gukhugela nyamudye nya nyumba kala nyambade nya nyumba, vbafuvbi ni giluvelo va randrela nyumba ni mufumeli.

¹² Khavbo avbo, Joyadha a di dusa mwamana wa mufumeli a mu ambagisa gihugu nya wufumu, a mu ninga Libhuku nya nayo; va mu todza gu khala mufumeli, va khwakhwata mandza, khavo: “A na vbanye mufumeli!”

¹³ Ataliya na pwide magana ya vawoneleli ni ya vathu, a di bela khu vbakari nya vathu Nyumbani ga Pfhumu Nungungulu.

¹⁴ A di khedza a wona mufumeli nari vbafuvbi ni lidingo kha nga giolovedzo, vathangeli ni vawombi nya mipundru va diri ni mufumeli, vathu vatshavbo va tigoni va di tsakide va womba mipundru; khavbo avbo, Ataliya a di pferula dzingandzu dzaye, a womba huwa, khuye: “Wuwugeli! Wuwugeli!”

¹⁵ Aholu muphasi nya mhamba Joyadha a di leletela vathangeli nya mitsawa nya lizana (100) va nga bani va thangela masotshwa, khuye: “Mu duseni vbavbandze nya tshatsha, gambe muthu nya gukari a gu mu landra mu songeni khu litshari.” Kholu muphasi nya mhamba a di ganela, khuye: “Mu nga mu songini Nyumbani ga Pfhumu Nungungulu.”

¹⁶ “Va di mu mola khu mandza, va bela naye khu ndzila nya mwanya nya dzikavalu, va ya mu songela avbovbo.”

Gidzumeledzwano gya Joyadha

¹⁷ Joyadha a di gira gidzumeledzwano ni Pfhumu Nungungulu, mufumeli gumogo ni vathu gasi va khala vathu va Pfhumu Nungungulu, a di gira gambe gidzumeledzwano ni mufumeli ni vathu.

¹⁸ Vathu va tigoni va di ya bela nyumbani ga Bhahali, va ya yi khungumulela gumogo ni gu pandrelela siluvelo saye ni sifananiso saye, va songa Matani, muphasi nya mhamba wa Bhahali vbafuvbi ni siluvelo; khavbo avbo, muphasi nya mhamba a di emisa vasayisi va Nyumbani ga Pfhumu Nungungulu.

¹⁹ A di dzega vathangeli nya sikwata nya lizana (100), dzindruna, vawoneleli ni vathu vatshavbo va tigoni, va duga ni mufumeli khu Nyumbani ga Pfhumu Nungungulu va mu gimbidzisa khu ndzila yi belago khu mwanya nya vawoneleli, va bela nyumbani ga mufumeli; mufumeli Jowasi a di khala vbagikhalotunu nya dzipfhumu.

²⁰ Vathu vatshavbo va tigoni va di nengela ni lidhoropa li di rula, Ataliya va di mu songa khu litshari vbafuvbi ni nyumba ya mufumeli.

²¹ Jowasi a diri ni tanga nya livbandre na mivili myaga, gikhati va nga mu wumbelago gu khala mufumeli.