2 Dzipfhumu 10 - Bhibhiliya Nya Guage

Jewu a ngu mbembisa ndranga ya Akabi

¹ Akabi a diri ni livbandre na mavili magumi sanana dhoropani ga Samariya; Jewu a di lova malangalila, a ma rumela Samariya ga vathangeli va Jezireyeli, ga madhota ni ga sithumi sa Akabi, khuye:

² “Me ni gu vbohedwani khu lidangalila leli, enu ni sanana sa mufumeli wanu gumogo ni dzikareta, dzikavalu ni lidhoropa nya likhongolo ni matshari;

³ khedzani vbakari ga sanana sa mufumeli wanu, mu hathe oyu a gu wadi a lulamidego guvbindra vatshavbo, a fanedego gu khala vbagikhalotunu gya babe waye, mu dwanela nyumba ya mufumeli wanu.”

⁴ Aholu avo va di tala ngudzu khu hwanga, khavo: “Ambari vafumeli vavili va ngamba tiya gu ema mbeli gwaye, ethu hi na kodza kharini gu tiya mbeli gwaye?”

⁵ Khavbo avbo, uye a nga bani nari kubanati nya nyumba ya mufumeli, ni muthangeli nya lidhoropa, madhota ni sithumi, va di rumela lito ga Jewu li gu, khilo: “Ethu hi sithumi sago, satshavbo u na hi embelago hi na gira; mwalo hi na gu mu emisago a khala mufumeli; gira iso si gu sadi mahoni gwago.”

⁶ A di lova gambe lidangalila nya wuvili, khuye: Mwa gu bani muri vathu vangu mu ema gumogo ni eni, ni gu yingisani magana yangu, mindru khu gikhati nya nga egi resani eno Jezireyeli, mihungo nya vama va gu sanana sa mufumeli wanu. Aholu, sanana sa mufumeli esi nya livbandre na mavili magumi, si diri mandzani ga madhota ya dhoropani va si fuya.

⁷ Avbo li nga vboha gwawe lidangalila, va di dzega sanana nya vama sa mufumeli, nya livbandre na mavili magumi va si songa va pila mihungo yawe va thela miravani va yi rumela ga Jewu, dhoropani ga Jezireyeli.

⁸ Wu dita mwango wuta mu tivisa khuwo: “Va reside mihungo ya sanana sa mufumeli.” Uye a di va hakha, khuye: “Mi vegeni nyangwani khu nyandra mbili kala mindru dzimindrudzile.”

⁹ Khu mindru gakone, uye a di duga ata ema a embela vathu vatshavbo, khuye: “Eni nyi lulamide, eni kheni nyi nga gira gikungo nya guwugele mufumeli wangu, nyi mu songa; gasi khu mani a songidego vatshavbo vava?

¹⁰ Olu, gu vbweta mu mati gwadi magana ya Pfhumu Nungungulu aya a ganedego khu mahungu nya ndranga ya Akabi. Gimwalo gi na thegago vbavbatshi, kholu Pfhumu Nungungulu tadziside iso a ganedego khavbo ga githumi gyaye Eliya.”

¹¹ Jewu a di sasela gambe vatshavbo va nga bani va tshade va nyumbani ga Akabi, tigoni ga Jezireyeli, gumogo ni madhota yaye, valongo vaye ni vaphasi vaye nya mhamba, kala gu si tshali ni moyo.

¹² Khavbo avbo, a di khuga a hongola Samariya. Nari ndzilani, tigoni ga Bheti-Ekedhi, avbo va tshanganago avbo vahavisi,

¹³ Jewu a di tshangana ni vandruye va Akazi, mufumeli wa Judha, a va wudzisa, khuye: Gasi khenu vamani? Avo va di hakha, khavo: “Ethu hi vandruye va Akazi; hi relede gasi guta wusela sanana sa mufumeli ni sanana sa Pfhumugadzi.”

¹⁴ Jewu a di va embela, khuye: “Va moleni na va nga gu vbanya.” Va di va mola na va nga gu vbanya, va di ya va songa vbafuvbi ni nambo wa Bheti-Ekedhi, va diri magumana na vavili vama, mwalo na moyo va mu tshidego.

Jewu a ngu manana ni Jonadhabhi

¹⁵ Gikhati a nga khuga khu vbale, a di ya tshangana ni Jonadhabhi, mwamana wa Rekabhi, a nga bani a mu khinga, a di mu losa a mu wudzisa, khuye: “Ina monyo wago wu ngu salalegiswa khu eni, kha nga idzo eni monyo wangu wu salalegiswago khu monyo wago, gani?” Jonadhabhi a di hakha, khuye: “A gu bani nari kharato nyi phare mandza; a di mu phara mandza a khilela naye karetani.”

¹⁶ A mu embela, khuye: “Hongole hatshavbo u na wona idzo eni nyi ningago khidzo githawo Pfhumu Nungungulu.” Va di mu bedza karetani gwaye.

¹⁷ Jewu, na va vbohide Samariya, a di ya sasela vatshavbo va na Akabi va nga bani na va tshade Samariya, kala a mbembisa vatshavbo kha nga idzo a ganelago khidzo Pfhumu Nungungulu ga Eliya.

Jewu a ngu songa vakhozeli Vabhahali

¹⁸ Jewu a di tshanganisa vathu vatshavbo, a va embela, khuye: “Akabi thumede vbadugwana Bhahali, aholu Jewu a na mu thumela ngudzu.”

¹⁹ Khu guralo, olu nyi raneleni vaprofeti vatshavbo Vabhahali, sithumi saye satshavbo ni vaphasi nya mhamba vaye vatshavbo; a nga hamugegi ni moyo, kholu nyi ngu vbweta gu gira mhamba nya yikhongolo ngudzu nyi girela Bhahali; watshavbo wule a na gu hamugegago kha na vbanya. Aholu Jewu a di ganela esi khu mano nya gu vbwete gu mbembisa sithumi sa Bhahali.

²⁰ Jewu a di engedza gambe, khuye: “Rambani tshangano nya khongolo nya guage wa Bhahali.” Avo va di wu ramba.

²¹ Jewu a di rumela gambe mahungu tigoni gwatshavbo gwa Israyeli ni gu ranisa vakhozeli Vabhahali; va dita vatshavbo nyamba tshala ni moyo, vata bela nyumbani ga Bhahali, gu tala khu maphuvbo yatshavbo.

²² Jewu a di embela musayisi wa nyumbani nya guambale, khuye: “Dusa dzingandzu, u ningela vakhozeli vatshavbo Vabhahali.” Uye a di dusa vbavbandze dzingandzu dzodzo.

²³ Jewu ni Jonadhabhi, mwamana wa Rekabhi, va di bela nyumbani ga Bhahali. A embela vakhozeli Vabhahali, khuye: “Khedzani, mu wona gwadi gukhenu kha ga tshuka gu bela vbakari gwanu moyo nya githumi gya Pfhumu Nungungulu, vbavbandze basi ga sithumi sa Bhahali.”

²⁴ Va di bela gu ya ningela miphaso nya guvbiswe, Jewu a di emide khu vbavbandze na dongisede livbandre na mararu magumi vama, a va embela, khuye: “Moyo wanu a gu diga moyo nya vathu vava nyi mi ningago mandzani gwanu a vbanya, womi wanu wu na livbela muthu yoyo.”

²⁵ Avbo va nga vbedzago gu gira phaso nya guvbiswe, Jewu a di embela vawoneleli ni dzindruna dzaye, khuye: “Belani mu ya va sasela gu nga tshali ni moyo.” Khavbo avbo, vawoneleli ni dzindruna va di va sasela khu matshari, va va dzudzugela vbavbandze, khu hwane va di bela ndrani nya nyumba ya Bhahali,

²⁶ va ya dusa madingo nya sithombe sa nyumbani ga Bhahali va si vbisa.

²⁷ Va pandrelela gambe gifananiso gya Bhahali, va khungumulela ni nyumba ya Bhahali, va yi gira hanyumba kala na muhuno.

Mahegiso nya mufumo wa Jewu, mufumeli wa Israyeli

²⁸ Khu guralo, Jewu a di khungumula Bhahali tigoni gwa Israyeli.

²⁹ Ambari khu guralo, Jewu kha nga hambana ni sighoho sa Jerobhowamo, mwamana wa Nebhati, uye a nga ghohisa va na Israyeli, khu gu wumba simombyana nya ndralama, si nga bani siri Bheteli ni Dhani.

³⁰ Avbo Pfhumu Nungungulu a nga embelago Jewu, khuye: “Kha nga u thumidego mithumo ya yadi u gira esi si lulamidego mbeli gwangu, satshavbo iso nyi nga bani nyi si pimisa khu monyoni gwangu, u girede ndranga ya Akabi; khu guralo, sanana sago si na khala vbagikhalotunu nya wufumu wa Israyeli, kala gitugulwana nya wu na.”

³¹ Aholu, Jewu kha nga khathala gilo khu gu gimbila khu nayo wa Pfhumu Nungungulu wa Israyeli, ambari gu hambana ni sighoho sa Jerobhowamo, a nga ghohisa Israyeli.

³² Khu matshigu yale, Pfhumu Nungungulu a di phela gu vbungula litigo la na Israyeli; kholu Hazayeli a di va sasela khu mivbinganoni gwatshavbo gwa Israyeli,

³³ gukhugela Joridhani, kala Khugadambo, ni tigoni gwatshavbo ga Gileyadhi, gipandre gya na Gadhi, gya na Rubheni ni gya na Manasi; gukhugela Aroweri a khadego vbafuvbi ni gitsongwana gya Arinoni, Gileyadhi ni Bhasani.

³⁴ Mithumo yatshavbo ya Jewu ni satshavbo a giridego mufumoni gwaye gwatshavbo, yi lovidwe umo nya Libhuku nya Matimo ya Vafumeli va Israyeli.

³⁵ Jewu lade gumogo ni vavelegi vaye; va mu dzingide Samariya. Mwanaye Jeyowakazi fumide wulangani gwaye.

³⁶ Jewu fumide tigoni ga Israyeli ni Samariya gipimo nya magumavili na livbandre na miraru myaga.