2 Dzipfhumu 1 - Bhibhiliya Nya Guage

III. MAHEGISO NYA MATIMO NYA MAVINGU YA ISRAYELI NI JUDHA Gufa gwa Akazi

¹ Hwane nya gufe gwa Akabi, Mowabhi a di wugela Israyeli.

² Akazi a nga bani ari vbatshani nya gitezi nya nyumba yaye tigoni ga Samariya, a di thega khu vbagihogotunu ata dzi bayisa ngudzu. Khavbo avbo, a di rumela myango a yi embela, khuye: “Indrani mu ya wudzisa Bhahali-Zebhubi, nungungulu wa Ekoroni, gasi nyi dziti gukheni ina nyi na vbanya ga ngumbe yeyi, gani?”

³ Aholu Ngilozi ya Pfhumu Nungungulu yi di embela Eliya, Mutesibhi, magana yaya, khiyo: “Khuga, u ya wonana ni myango ya mufumeli wa Samariya, u yi embela, khuwe: Ina omu tigoni ga Israyeli, mwalo Nungungulu nya gukala u ya wudzisa Bhahali-Zebhubi, nungungulu wa Ekoroni, gani?

⁴ Khu guralo, Iso a ganelago Pfhumu Nungungulu khesi: Khu na nga wuga khu vbadawutunu u ladego; kholu u nafa.” Khavbo avbo, Eliya a di khuga a hongola.

⁵ Myango yile yi di wuya ga Akazi, uye a ta yi wudzisa, khuye: “Khu ginani mu vbiredzago gu wuya?”

⁶ Avo va di mu hakha, khavo: “Hi di khingwa khu mwama moyo a hi embela, khuye: Bwelelani ga mufumeli a mu rumedego mu ya mu embela, khenu: Pfhumu Nungungulu a ngu ganela kharati, khuye: Ina omu tigoni ga Israyeli mwalo Nungungulu nya gukala u rumela gu ya wudzisa ga Bhahali-Zebhubi, nungungulu wa Ekoroni, gani? Khu guralo, uwe gima khu na nga wuga gambe khu vbadawutunu u ladego; kholu u nafa.”

⁷ Uye a di va wudzisa, khuye: “Muthu wakone a nga mi embela magana yoyo khwa makhalelo muni?”

⁸ Avo va di mu hakha, khavo: “A diri mwama moyo nya gu ambale malowo, na hungide libhandri nya lidowo giwununi.” Mufumeli a di va embela, khuye: “Khu Eliya, Mutesibhi.”

Eliya ni dzindruna dzitharu

⁹ Khavbo avbo, mufumeli a di vbiredza gu mu rumela muthangeli waye nya gikwata nya livbandre magumi, gumogo ni masotshwa yaye nya livbandre magumi. Aya ga Eliya a nga bani na khade tshokatunu nya gigomo, a mu embela, khuye: “Muthu wa Nungungulu, mufumeli a leletede gukhuye u tshiga khu guvbiredza!”

¹⁰ Eliya a di va hakha, khuye: “Nya gu bani nyiri muthu wa Nungungulu, wu na tshige nilo khu ndzadzini, wu ta gu mbembisa gumogo ni vathu vago nya livbandre magumi.” Khu guralo, wu di tshiga nilo khu ndzadzini wu ta mbembisa muthangeli ni vathu vaye nya livbandre magumi.

¹¹ Mufumeli a di rumela gambe mumbe muthangeli nya livbandre magumi ni vama nya livbandre magumi, uye a nga ya ganela ga Eliya, khuye: “Muthu wa Nungungulu, mufumeli a leletide gukhuye u tshige khu guvbiredza.”

¹² Eliya a di va hakha, khuye: “Nya gu bani nyiri muthu wa Nungungulu, wu na tshige nilo khu ndzadzini, wu ta mbembisa uwe gumogo ni vathu vago nya livbandre magumi.” Wu di tshiga nilo khu ndzadzini wu ta mbembisa ndruna gumogo ni vathu vaye nya livbandre magumi.

¹³ Mufumeli a di rumela gambe khu nyondro nya wuraru mumbe muthangeli nya livbandre magumi ni livbandre magumi vama, avbo uye a nga ya khidzima mbeli ga Eliya a mu lomba, khuye: “Muthu wa Nungungulu, vbanyisa womi wangu, ni wa vathu vava nya sithumi sago nya livbandre magumi.

¹⁴ Wona nya gukhuwe wu tshigide nilo khu ndzadzini wu ta vbisa dzindruna dzile dza dzimbili nya guphele ni vathu vawe nya livbandre magumi, aholu, eni nya gu gu lomba u vbanyisa womi wangu!”

¹⁵ Ngilozi ya Pfhumu Nungungulu yi di embela Eliya, khiyo: “Relela ni mwama yoyu. U nga khali hwanga khuye!” Eliya a di khuga a relela gumogo naye kala ga mufumeli.

¹⁶ Eliya a di embela mufumeli, khuye: “Pfhumu Nungungulu a ngu ganela kharati, khuye: Khu ginani u rumedego myango gu ya wudzisa Bhahali-Zebhubi, nungungulu wa Ekoroni? Ina omu tigoni ga Israyeli mwalo Nungungulu nya guyele gu ya wudzisa gwaye, gani? Khu guralo, vbadawutunu vbovbo u ladego, gima khu na nga wuga, kholu khu lisine u nafa.”

¹⁷ Akazi a difa, kha nga idzo a ganedego khidzo Pfhumu Nungungulu khu ga muprofeti Eliya. Vbgikhalotunu gwaye nya wufumu a di tshikedzwa khu ndriyaye Joramo, kholu Acazi kha nga velega sanana. Gu di gu vbindra myaga mivili hwane nya gu Joramu, mwamana wa Josafati na khade vbagikhalotunu nya wufumu wa tigoni ga Judha.

¹⁸ Gasi khu mambe matimo ya Akazi ni sigiro saye a giridego, si lovidwe umo nya Libhuku nya Matimo ya Vafumeli va Israyeli.