2 Dzikoronika 7 - Bhibhiliya Nya Guage

Gu wonega nya wudhumo wa Pfhumu Nungungulu

¹ Avbo Solomoni, a nga vbedzago gu lombelela, wu di relela nilo khu ndzadzini wuta vbisa nyama nya miphaso nya guvbiswe ni yimbe miphaso, wudhumo wa Pfhumu Nungungulu, wu di tadza Nyumba yatshavbo.

² Khu guralo, vaphasi nya mhamba kha va nga kodza gubela Nyumbani ga Pfhumu Nungungulu, kholu wudhumo waye wu di tadzide Nyumbani gwatshavbo.

³ Avbo va na Israyeli va nga wonago nilo nya wudhumo wa Pfhumu Nungungulu na wu gutshiga wu tadza nyumba, vatshavbo va di noga va tsitsa khu dzikhovbe mafuni va lombelela ni gu rungudza Nungungulu, khavo: “Rungudzani Pfhumu Nungungulu, kholu khwadi, wuhindzi waye wu ngu simama kala gupindruga.”

⁴ Mufumeli ni va na Israyeli vatshavbo, va di ningela miphaso mbeli ga Pfhumu Nungungulu.

⁵ Mufumeli Solomoni a di ningela miphaso ga Pfhumu Nungungulu nya magumavili na mavili magumi mazana (22.000) dzimombe, ni lizana ni magumavili magumi mazana (120.000) dzinvuta; khidzo kharati mufumeli ni vathu vatshavbo, va nga agisago khidzo Nyumba ya Pfhumu Nungungulu.

⁶ Vaphasi nya mhamba va di phela gu gira thumo wawe gumogo ni va na Levhi, na va pharide dzingoma nya wutsendze nya guwombele Pfhumu Nungungulu, edzi mufumeli Dhavhidhe a nga bani a va rumide gu gira gasi gudhumisa khidzo Pfhumu, kholu wuwadi waye khwa gu simama kala gupindruga, vaphasi nya mhamba va di gu womba mipundru na va khedzanide ni va na Levhi, vatshavbo va na Israyeli na va emide.

⁷ Solomoni a di agisa wulanga wu nga bani wuri khu vbakari nya hudzwe wu guromo mbeli nya Nyumba ya Pfhumu Nungungulu, vbale, uye a nga bani a ningede avbo miphaso nya guvbiswe, ni mafura nya sirengo nya miphaso nya gurule, kholu vbagiluvelotunu nya dzisimbi, egi Solomoni a nga bani a gi giride, yi di si eneli miningelo nya guvbiswe, ni miningelo nya guhodze ni mafura.

⁸ Buzo yoyu nya gu thangedwe khu Solomoni, ni vatshavbo va na Israyeli, wu vbedzide livbandre na mavili matshigu. Gu diri ni gidzemo nya gikhongolo ngudzu gi ngata tombana gukhugela nyangwani ga Hamati, kala tsongoni wa Egipito.

⁹ Khu litshigu nya livbandre na mararu gu di girwa tshangano nya guage, kholu va vbedzide livbandre na mavili matshigu na va guphasela gu agisa giluvelo, ni livbandre na mavili matshigu na gu girwa buzo.

¹⁰ Khu litshigu nya magumavili na mararu, khu ngima nya livbandre na wuvili, Solomoni a di phalalegisa vathu, muthu ni muthu a hongola gaya gwaye na va tsakide myonyoni gwawe, kholu Pfhumu Nungungulu, a di kategiside Dhavhidhe, Solomoni ni vathu vaye va na Israyeli.

Gidzumeledzwano gya Pfhumu ni Solomoni

¹¹ Khu kharati, Solomoni a di vbedza thumo nya guvbahe Nyumba ya Pfhumu Nungungulu, ni nyumba nya wufumu, satshavbo a nga bani a si suvide gu gira Nyumbani ga Pfhumu Nungungulu ni nyumbani gwaye, si di girega satshavbo.

¹² Khu guralo, Pfhumu Nungungulu a di wonega ni wutshigu ga Solomoni, a mu embela, khuye: “Nyi yingiside nombelo wago, wulanga wowu nyi wu hathide gu khala nyumba Yangu nya miphaselo.”

¹³ Nya gu sega gupindruga yi siwi ndzadzi, ni gu, nyi rumela mbasa guta vbedza marembwe yanu, ni gu, Nyi rumela mitungu ga vathu vangu;

¹⁴ vathu vangu, va ranwago khu lina langu, va gu dzi sodzisa ni gu va lombelela khu gu vbweta Lina Langu, va hambana ni dzindzila dzawe nya guvivbe, na nyiri kheno ndzadzini, nyi na va yingisa, nyi va tsetselela sighoho sawe, nyi vbodzisa litigo lawe.

¹⁵ Olu maho ni dzindzeve dzangu, si tulegide gu yingisa nombelo wa wulanga wowu,

¹⁶ kholu nyi hathide nyumba yeyi, Nyi yi agisa, gasi Lina Langu li kodze gu khala umo kala gupindruga; maho ni monyo wangu si na khedza umo gikhati gyatshavbo.

¹⁷ Gasi uwe, wa gu gimbila gwadi mbeli gwangu, kha nga idzo a giridego babe wago Dhavhidhe, u gira satshavbo iso nyi gu leletedego, u landrisa milayo ni sileletelo sangu,

¹⁸ Nyi na tiyisa gikhalo nya wufumu wago, kha nga gidzumeledzwano nyi giridego ni babe wago Dhavhidhe, Nyi nga, kheni: “Gima kha gu na hamugega muthu nya gudugele livelegoni gwago, gasi gu fumela Israyeli.”

¹⁹ Aholu mwa gu ndreya, mu hambana ni milayo ni sileletelo esi nyi mi ningidego, mu ya thumela vambe vanungungulu ni gu va khozela,

²⁰ Eni nyi na mi dusani khu ga litigo langu nyi mi ningidego, ni ga nyumba yeyi nyi yi agisedego Lina Langu, nyi mi dzudzuga hwindzo ni Eni, mu ya khala givalo ni gihegiso ga mayigo yatshavbo.

²¹ Khu nyumba yeyi nya wudhumo ngudzu, muthu watshavbo a na vbindrago khavba, a na liwuga, a ganela, khuye: Khu ginani Pfhumu Nungungulu a giridego esi ga nyumba yeyi ni ga litigo leli?

²² Va na phindrula, khavo: Kholu avo va nga hambana ni Pfhumu Nungungulu wa vababe vawe, oyu ava dusidego khu tigoni ga Egipito, vata namarela ga vambe vanungungulu, va va khidzimela ni gu va khozela. Khu guralo, Uye a va resede mabango yatshavbo yaya.